ភ្នំពេញ ៖ ជនសង្ស័យ២នាក់បានជិះម៉ូតូឌុបគ្នាធ្វើសកម្មភាពឆក់កាបូបគេដោយមិនស្គាល់ ភូមិសាស្ត្រ ក្រោយពីឆក់កាបូបបានសម្រេចហើយ ម្ចាស់ជិះម៉ូតូដេញតាមរហូតដល់ផ្លូវទាល់ទៅមុខលែងរួច អស់ជម្រើសផ្តួលម៉ូតូចោលចុះរត់មិនរួច ត្រូវបានប្រជាពលរដ្ឋជួយដេញចាប់បានម្នាក់ហើយម្នាក់ទៀត រត់គេចខ្លួនបាត់កាលពីវេលាម៉ោង៥និង៣០នាទីល្ងាច ថ្ងៃទី១៧ ខែកក្កដា ឆ្នាំ២០១៨ ស្ថិតនៅតាមផ្លូវជាតិលេខ៣ ភូមិព្រៃព្រីងត្បូង សង្កាត់ចោមចៅ៣ ខណ្ឌពោធិ៍សែនជ័យ។
ជនសង្ស័យម្នាក់ចាប់ខ្លួនបាន ឈ្មោះ ញ៉ែម បុរី ភេទប្រុស អាយុ២៦ឆ្នាំ មុខរបរមិនពិតប្រាកដ ស្រុកកំណើតនៅភូមិអង្ក្រង ឃុំអង្គពពេល ស្រុកគងពិសី ខេត្តកំពង់ស្ពឺ រីឯបក្ខពួកម្នាក់ទៀតរត់គេចខ្លួនបាត់។ ជនសង្ស័យទាំង២នាក់ជិះម៉ូតូធ្វើសកម្មភាពម៉ាក Duke ពណ៌ខ្មៅលាយស ពាក់ស្លាកលេខភ្នំពេញ1FL-1777។ ចំណែកជនរងគ្រោះឈ្មោះ រិទ្ធ ចាន់ណារី ភេទស្រី អាយុ៣៩ឆ្នាំ មុខរបរកម្មកររោងចក្រ ស្នាក់ភូមិព្រៃព្រីងខាងត្បូង សង្កាត់ចោមចៅ៣ ខណ្ឌពោធិ៍សែនជ័យ មានភូមិកំណើតនៅភូមិជម្ពូវ័នសង្កាត់ចោមចៅ៣ ខណ្ឌពោធិ៍សែនជ័យនិងប្តីឈ្មោះឃុត បូរ៉ាវី អាយុ៣៩ឆ្នាំ មុខរបរកម្មកររោងចក្រ មានស្រុកកំណើត ភូមិពងទឹក សង្កាត់ពងទឹក ខណ្ឌដង្កោ។ ដោយឡែកកាបូប ដែលជនសង្ស័យឆក់បានពណ៌ក្រហម មានទូរស័ព្ទដៃមួយគ្រឿងនិងលុយមួយចំនួនទៀត។
តាមសម្តីជនរងគ្រោះបានឲ្យដឹងថា មុនកើតហេតុពួកគាត់ជិះម៉ូតូឌុបគ្នាចេញពីធ្វើការរោងចក្របំណងទៅហួសផ្សាររកទិញម្ហូបសិនមុនចូលផ្ទះ ដោយជិះតាមផ្លូវជាតិលេខ៣ ពីត្បូងទៅជើងលុះមកដល់ចំណុចកើតហេតុ ស្រាប់តែមានជនសង្ស័យពីរនាក់ជិះម៉ូតូម៉ាកDuke តាមពីក្រោយពេលមកដល់ទន្ទឹមគ្នា ក៏ធ្វើសកម្មភាពឆក់យកកាបូបពីដៃប្រពន្ធ គាត់បានសម្រេចហើយព្យាយាមបើកម៉ូតូរត់គេចសរសៀរតាមរបងបន្ទាយបញ្ជាការដ្ឋានកងពលតូចលេខ៧០សំដៅឡើងឆ្ពោះទៅខាងផ្លូវជាតិលេខ៤ ក៏ប៉ុន្តែផ្លូវលំខាងក្រោយតំបន់នោះ ស្មុគស្មាញកាច់កុងបត់បែនច្រើនធ្វើឲ្យជនសង្ស័យដែលមិនស្គាល់ភូមិសាស្ត្របើករត់ទៅដល់ផ្លូវទាល់ ទៅមុខលែងរួចជម្រើសចុងក្រោយពួកគេបានផ្តួលម៉ូតូចុះរត់គេចខ្លួន តែបានជនរងគ្រោះជំនាញខាងបើកម៉ូតូដែរតាមទាន់ស្រែកផ្អើលពលរដ្ឋជួយដេញចាប់បានម្នាក់ និង រត់គេចខ្លួនបាត់ម្នាក់។
ក្រោយពីចាប់ខ្លួនបានជនសង្ស័យម្នាក់ រួមជាមួយម៉ូតូមួយគ្រឿង សមត្ថកិច្ចនាំខ្លួនទៅសាកសួរនៅប៉ុស្តិ៍ចោមចៅ៣ ដើម្បីសាកសួរ និង កសាងសំណុំរឿងបញ្ជូនទៅផ្នែកជំនាញ ព្រហ្មទណ្ឌនៃអធិការដ្ឋាននគរបាលខណ្ឌចាត់ការបន្តទៅតាមនីតិវិធី ចំណែកសម្ភារៈកាបូបលុយដែលជនសង្ស័យឆក់បាននោះ សមត្ថកិច្ចដកហូតបានមកវិញ ហើយប្រគល់ជូនជនរងគ្រោះវិញ៕
Source: Kampuchea Thmey Daily
0 Comments