ក្លិបបឹងកេត សមាជិកពានរង្វាន់លីគកំពូលកម្ពុជា Metfone Cambodian League 2018 បានប្រកាសថា ក្លិបបានបញ្ជូនកីឡាករ៣ចេញពីយុវជនថ្នាលរបស់ខ្លួនទៅប្រកួតក្នុងពានរង្វាន់បាល់ទាត់អន្តរជាតិមួយ ដែលមានអញ្ជើញ និង រៀបចំដោយក្លិបយក្សនៅប្រទេសអេស្ប៉ាញ FC Barcelona ធ្វើឡើងនៅប្រទេសចិន។
យោងតាមសេចក្តីប្រកាសបន្ថែមរបស់ក្លិបជើងឯក៣សម័យកាលមួយនេះបានបញ្ជាក់ថា «កីឡាករទាំង៣ របស់សាលាបាល់ទាត់បឹងកេត បានទៅដល់ប្រទេសចិន ដោយសុវត្ថិភាពហើយ ដើម្បីចូលរួមក្នុងពានរង្វាន់ FCBEscola China Tournament ដែលរៀបចំដោយ Barcelona។ ពានរង្វាន់នេះនឹងចាប់ផ្ដើមពីថ្ងៃទី១៩ ដល់២២ ខែកក្កដា ឆ្នាំ២០១៨។ កីឡាករ ស្រេង ម៉ានិតសត្យា និង ស្រេង ម៉ានិតចិត្រា នឹងចូលរួមជាមួយយុវជនក្រោមអាយុ១៦ឆ្នាំ រីឯកីឡាករ ប៉ិល សុសីហរាជ ហៅ WILLIAM នឹងចូលរួមជាមួយឈុតក្រោមអាយុ១០ឆ្នាំ»។
កីឡាករទាំងបីនាក់ខាងលើ ទើបតែបញ្ចប់ការហ្វឹកហាត់នៅសាលាបាល់ទាត់របស់ក្លិបអ្នកមានបុណ្យ Barcelona នៅសឹង្ហបុរី កាលពីប៉ុន្មានសប្ដាហ៍មុន ហើយត្រូវបានគ្រូបង្វឹកនៅទីនោះពេញចិត្តនឹងទេពកោសល្យរបស់ពួកគេ ទើបកោះហៅពួកគេត្រូវបានកោះហៅនិងអញ្ជើញឲ្យចូលរួមការប្រកួតពានរង្វាន់នៅប្រទេសចិន ដែលរៀបចំដោយក្លិប Barcelona នេះ។
កាលពីដើមឆ្នាំកន្លងទៅបឹងកេត ធ្លាប់បានបញ្ជូនកុមារាឈ្មោះ Kasidef Vasunan ហៅ Dome ដែលមានឪពុកជាជនជាតិថៃ និងម្តាយជាជនជាតិខ្មែរ ទៅហ្វឹកហាត់រយៈពេល៥ថ្ងៃនៅទឹកដីCamp Nou របស់ក្លិបយក្ស FC Barcelona ក្នុងប្រទេសអេស្ប៉ាញ។ មូលហេតុដែល Dome មានឱកាសទៅហ្វឹកហាត់នៅទឹកដីអឺរ៉ុបមួយនេះក៏ព្រោះតែរូបគេបានធ្វើតេស្តសមត្ថភាពដោយជោគជ័យនៅសាលាបាល់ទាត់របស់ក្លិបអេស្ប៉ាញ មួយនេះនៅប្រទេសសិង្ហបុរី ដែលកីឡាករទាំង៣នាក់នេះ ទៅហ្វឹកហាត់នេះផងដែរ៕
Source: Kampuchea Thmey Daily
0 Comments