បន្ទាយមានជ័យ ៖ ចោរជើងឆើតម្នាក់ចូលលួចលុយនិងសម្ភារៈមួយចំនួនធំក្នុងផ្ទះគេត្រូវបានកម្លាំងអាវុធហត្ថក្រុងប៉ោយប៉ៃតឃាត់ភ្លាមៗបាននៅវេលាម៉ោង៣រសៀលថ្ងៃទី១៣ ខែកក្កដា ឆ្នាំ២០១៨ នៅចំណុចក្រោយផ្សារកណ្តាល ស្ថិតនៅភូមិផ្សារកណ្តាល សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ។
លោកវរសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុងប៉ោយប៉ែតបានប្រាប់អ្នកយកព័ត៌មានឲ្យដឹងថា ក្រោយពីបានទទួលពាក្យបណ្តឹងរបស់ឈ្មោះស៊ាន ប៉ាហ៊ី ភេទប្រុស អាយុ ៣១ឆ្នាំ រស់នៅភូមិផ្សារកណ្តាល សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ បានប្តឹងអំពីបទចោរចូលលួចទ្រព្យសម្បត្តិក្នុងផ្ទះរបស់ខ្លួនក្រោយពីបានទទួលហើយលោកបានដឹកនាំកម្លាំងអាវុធហត្ថ១ក្រុមចុះឃាត់ខ្លួនជនសង្ស័យបានភ្លាមៗមានឈ្មោះ លី ពៅ ភេទប្រុស អាយុ ៣៧ឆ្នាំ មានទីលំនៅភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ និង ធ្វើការរឹបអូសទ្រព្យសម្បត្តិពីចោរវិញបានមួយចំនួនជនសង្ស័យបានបញ្ជូនមកទីបញ្ជាការកងរាជអាវុធហត្ថខេត្តដើម្បីចាត់ការបន្ត។
លោកវរសេនីយ៍ឯក ម៉ែន ភិរម្យ មេបញ្ជាការរងកងរាជអាវុធហត្ថខេត្ត ទទួលការងារយុត្តិធម៌ ដោយបានការអនុញ្ញាតពីលោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យ។
ក្រោយធ្វើការសាកសួរ ជនសង្ស័យបានសារភាពថា នៅថ្ងៃកើតហេតុនោះ ខ្លួនបានដើរលេង លុះដល់ចំណុចផ្ទះជនរងគ្រោះ ឃើញទ្វាររបង និងផ្ទះមិនបានបិទ ហើយឃើញមានមនុស្សស្រីចំណាស់ម្នាក់កំពុងដេកលក់ ខ្លួនក៏ចូលក្នុងផ្ទះ និងបានលួចយកទូរស័ព្ទដៃ និងកាបូប ហើយគេចចេញតែម្តង ក្រោយលួចបានរួចហើយ យកលុយទៅ ផឹកស៊ីអស់ប្រាក់ចំនួន ៦.០០០បាតត្រូវបានសមត្ថកិច្ចកងរាជអាវុធហត្ថឃាត់ខ្លួនតែម្តង។
ចំណែកជនរងគ្រោះវិញខ្លួនបានបាត់ទូរស័ព្ទដៃម៉ាក អូប៉ូចំនួន ១គ្រឿងម៉ាកអាយផែតចំនួន១គ្រឿង កាបូបដៃចំនួន១ ក្នុងនោះមានលុយចំនួន ១២.០០០បាត កាតធនាគារ ១ អត្តសញ្ញាណប័ណ្ណចំនួន ១ និងឯកសារមួយចំនួនទៀតផង។
ក្រោយពីបានចម្លើយទាំង២រួចមក កម្លាំងអាវុធហត្ថបានកសាងសំណុំរឿងបញ្ជូនជនសង្ស័យ រួមជាមួយវត្ថុតាងទៅតុលាការ ដើម្បីចាត់ការទៅតាមនីតិវិធីច្បាប់៕
Source: Kampuchea Thmey Daily
0 Comments