ការប្រកួតជម្រុះដណ្ដើមខ្សែក្រវាត់ជើងឯកCarabao រដូវកាលទី៦ ទម្ងន់៥៧ គីឡូក្រាម នៅសង្វៀនទូរទស្សន៍SEATV នៅរសៀលថ្ងៃសៅរ៍ទី០៤ ខែសីហា ឆ្នាំ២០១៨នេះ ជាការប្រកួតសប្ដាហ៍ចុងក្រោយ និងជុំក្រោយ រវាងអ្នកប្រដាល់កម្ពុជាធន មករា សមាគមកីឡាប្រដាល់ក្រសួងការពារជាតិ និង អ្នកប្រដាល់ថៃ Phat Seila ហើយអ្នកប្រដាល់កម្ពុជាឈុត សេរីវ៉ាន់ថង ក្លិបរាហ៊ូកីឡាខេត្តបាត់ដំបង និងអ្នកប្រដាល់ថៃ Phat Thou។
សម្រាប់ជំនួបក្នុងជុំទី៤ចុងក្រោយនេះ ធន មករានិង ឈុត សេរីវ៉ាន់ថង ត្រូវប្រជែងគ្នាដណ្ដើមកៅអីវគ្គផ្ដាច់ព្រ័ត្រក្នុង ខណៈដែលឡុង ជិន ក្លិបខ្លារខិនមានរិទ្ធ គេទទួលបានកៅអីវគ្គផ្តាច់ព្រ័ត្រមួយរួចទៅហើយ ដោយ៤ប្រកួតឈ្នះទាំង៤ប្រកួតនោះ ហើយនៅសល់មួយកន្លែងទៀតនោះ គឺសម្រាប់ធន មករា និងឈុត សេរីវ៉ាន់ថង ប្រជែងគ្នាយកក្នុងជំនួបចុងក្រោយនេះ។
យ៉ាងណា ធន មករា ទោះបីជាឈ្នះ Phat Seila ក្នុងការប្រកួតលើកចុងក្រោយនេះក្តី ក៏ការឈ្នះរបស់គេត្រូវតែទាមទារឈ្នះក្នុងទឹកទី១ ហើយក្នុងវិនាទីតិចបំផុតដែរ ព្រោះឈុត សេរីវ៉ាន់ថង ក្នុងការឈ្នះបីប្រកួតកន្លងមកនេះ មាន១ប្រកួតគេវាយដៃគូអោយបោះបង់ចោលការប្រកួតក្នុងទឹកទី១ប៉ុណ្ណោះ ម្ល៉ោះហើយធន មករា ទោះបីឈ្នះ Phat Seila ដោយពិន្ទុឬក្នុងទឹកទី២-៣-៤ក្តីក៏នៅតែចាញ់ឈុត សេរីវ៉ាន់ថង មិនបានឡើងទៅផ្តាច់ព្រ័ត្រជួបជាមួយឡុង ជិនដែរ គឺនៅតែឈុត សេរីវ៉ាន់ថងជាអ្នកឡើងទៅជួបឡុង ជិនដដែលទេ។
រវាង ធន មករា និង Phat Seilaនេះ ពួកគេទាំងពីរនាក់នេះ មិនធ្លាប់ជួបគ្នាទេកន្លងមក។ មករាគេទើបតែឡើងប្រកួតជាមួយថៃបាន៣លើកក្នុងជម្រុះខ្សែក្រវាត់នេះប៉ុណ្ណោះ ឯPhat Seila គេជាអ្នកប្រដាល់ចាស់ធ្លាប់មកប្រកួតនៅស្រុកខ្មែរញឹកញាប់ហើយកន្លងមក។
ធន មករា និង Phat Seila នេះ តាមការកត់សម្គាល់ឃើញនោះ អ្នកប្រដាល់ថៃរូបនេះ ប្រហែលជាមិនអាចឈ្នះធន មករា បាននោះឡើយ ព្រោះថា Phat Seila ៣ប្រកួតកន្លងមក គេវាយចាញ់ទាំង៣ប្រកួតមាន៣ពិន្ទុប៉ុណ្ណោះ ឯធន មករា ៣ប្រកួតកន្លងមកដូចគ្នា គេវាយឈ្នះពីរប្រកួតចាញ់១ប្រកួត មាន៧ពិន្ទុ។
Phat Seila មានកម្ពស់១,៦០ម៉ែត្រ ខណៈធន មករា មានកម្ពស់១,៦៨ម៉ែត្រ។ Seila គេមានកំណត់ត្រាប្រកួតចំនួនតែ៧៩លើកប៉ុណ្ណោះ ក្នុងនោះឈ្នះ៦៦លើក ចាញ់១២លើក និងស្មើ០១លើក។ ចំណែកធន មករា គេមានប្រវត្តិប្រកួតចំនួន៥៥លើក ឈ្នះ៤៧ លើក ចាញ់០៦លើក និងស្មើ០២លើក ។
ទោះជាយ៉ាងណាក្តី សម្រាប់ការជួបគ្នានេះ ពុំអាចសន្និដ្ឋានមុនថា អ្នកណាឈ្នះ អ្នកណាចាញ់នោះឡើយ ហើយពីរនាក់នេះ ក៏មិនអាចអ្នកណាមើលស្រាលអ្នកណាបានដែរ។
ចំពោះការជួបគ្នារវាង ឈុត សេរីវ៉ាន់ថងនិង Phat Thou វិញ គូនេះក៏ប្រហែលជាមិនពិបាកទស្សន៍ទាយដែរទេ។ត្បិតថា អ្នកប្រដាល់ Phat Thouនេះ ក៏មិនខ្លាំងនិងល្អជាងសេរីវ៉ាន់ថង នោះដែរ។
ឈុត សេរីវ៉ាន់ថង ជាអ្នកប្រដាល់ស្រករក្រោយ តែរបៀបវាយរបស់គេល្អនិងខ្លាំង ព្រមទាំង រហ័សរហួន ហើយកម្លាំងនិងទឹកចិត្តរបស់គេក៏ខ្លាំងនិងធំណាស់ដែរ។ សេរីវ៉ាន់ថង ធ្លាប់ប្រកួតជាមួយអ្នកប្រដាល់ថៃចំនួន១០នាក់ហើយកន្លងមក ដោយវាយឈ្នះថៃទាំង១០នាក់មិនដែលចាញ់ទេ ។ ឈុត សេរីវ៉ាន់ថងមានកម្ពស់១,៦៨ ម៉ែត្រ គេមានកំនត់ត្រាប្រកួត៥៧លើក ឈ្នះ៥០លើក ចាញ់០៦លើក និងស្មើ០១លើក ។ ទោះជាយ៉ាងណា សេរីវ៉ាន់ថង គេជាអ្នកប្រដាល់ដែលល្អនិងមានទំនុកចិត្ត។
ចំពោះ Phat Thou វិញ គេមានប្រវត្តិប្រកួតចំនួន៨៨លើក ឈ្នះ៦៨លើក ចាញ់១៩លើក និងស្មើ០១លើក។ ទោះបីគេមិនធ្លាប់ជួបគ្នាក៏ពិតមែន តែមើលទៅ Phat Thou អាចយ៉ាប់ជាមួយ សេរីវ៉ាន់ថងហើយ។ ចាំមើល ការប្រកួតក្នុងជុំទី៤ចុងក្រោយនេះ រវាងឈុត សេរីវ៉ាន់ថង និង Phat Thou តើនរណារកបាន៣ពិន្ទុនោះ ?។ យ៉ាងណា ឈុត សេរីវ៉ាន់ថង គេចាំបាច់ត្រូវតែយកឈ្នះ Phat Thouឲ្យបាន ដើម្បីឡើងទៅជួបឡុង ជិន ក្នុងវគ្គផ្តាច់ព្រ័ត្រដណ្តើមខ្សែក្រវាត់ខារ៉ាបាវទម្ងន់៥៧គីឡូក្រាមនោះ។
អ្នកប្រដាល់ពីរនាក់នេះ ឆ្លងកាត់ការប្រកួតបីលើកកន្លងមកនោះ គឺឈុត សេរីវ៉ាន់ថង គេឈ្នះទាំង៣ប្រកួត មាន៩ពិន្ទុ ហើយ Phat Thou គេវាយចាញ់ទាំងបីប្រកួត មាន៣ពិន្ទុប៉ុណ្ណោះ៕
Source: Kampuchea Thmey Daily
0 Comments