រដ្ឋាភិបាលសហរដ្ឋអាមេរិក បានបន្តឃុំឃាំងកុមារអន្តោប្រវេសន៍ខុសច្បាប់ចំនួន៥៦៥នាក់ក្នុងរយៈពេល៣សប្ដាហ៍ បន្ទាប់ពីតុលាការកំណត់ឲ្យពួកគេជួបជុំជាមួយឪពុកម្តាយឬអាណាព្យាបាលវិញ។
នោះរួមបញ្ចូលទាំងកុមារចំនួន២៤នាក់ ដែលមានអាយុ៥ឆ្នាំឬក្មេងជាងនេះផងដែរ ដែលត្រូវបានមើលថែដោយការិយាល័យជំរកជនភៀសខ្លួន (ORR) របស់ក្រសួងសុខាភិបាលនិងសេវាមនុស្ស។
ORR បានរាយការណ៍ថា ឪពុកម្តាយរបស់ក្មេងចំនួន៣៦៦នាក់ក្នុងចំណោម៥៦៥នាក់គឺស្ថិតនៅខាងក្រៅសហរដ្ឋអាមេរិកដែលជាហេតុធ្វើឲ្យការជួបជុំគ្នាមានភាពលំបាក។
ORR បានរាយការណ៍ទៀតថា ឪពុកម្តាយរបស់កុមារ១៥៤នាក់បាននិយាយថា ពួកគេមិនចង់រួបរួមគ្នាជាមួយកូនៗវិញទេ។ ហើយកុមារជាង១៨០នាក់មិនអាចត្រូវបានបញ្ជូនទៅឪពុកម្តាយវិញទេដោយសារតែឪពុកម្តាយទាំងនោះត្រូវបានគេចាត់ទុកថាជាការគំរាមកំហែងដល់កូនៗ។
កាលពីដើមឆ្នាំនេះ រដ្ឋាភិបាលបានបំបែកកុមារជាង២,៥០០នាក់ពីឪពុកម្តាយរបស់ពួកគេបន្ទាប់ពីគ្រួសារជាច្រើនបានឆ្លងកាត់ព្រំដែនអាមេរិក-ម៉ិកស៊ិកដោយខុសច្បាប់ជាមួយគោលបំណងស្នាក់នៅក្នុងប្រទេសនេះ។
ក្រុមសិទ្ធិមនុស្សបានជំទាស់នឹងការបំបែកនេះហើយចៅក្រមសហព័ន្ធនៅរដ្ឋកាលីហ្វ័រនីញ៉ាបានបញ្ជាឲ្យក្រុមគ្រួសារត្រូវជួបជុំគ្នាវិញនៅត្រឹមថ្ងៃទី២៦ខែកក្កដា។
ក្រសួងសន្ដិសុខមាតុភូមិដែលត្រួតពិនិត្យគោលនយោបាយអន្តោប្រវេសន៍ខុសច្បាប់បាននិយាយថា ឪពុកម្តាយមួយចំនួនបានទទួលយកការបញ្ជូនត្រឡប់ទៅព្រំដែនវិញដោយបន្សល់ទុកកូនៗឲ្យរស់នៅសហរដ្ឋអាមេរិកហើយសង្ឃឹមថានឹងចូលរួមជាមួយពួកគេនៅពេលក្រោយដោយស្របច្បាប់។
ORR បាននិយាយនៅក្នុងឯកសាររបស់ខ្លួនថា ខ្លួនកំពុងបន្តព្យាយាមដាក់កុមារឲ្យត្រឡប់មកវិញជាមួយឪពុកម្តាយឬសាច់ញាតិរបស់ពួកគេនៅក្នុងសហរដ្ឋអាមេរិក៕
Source: Kampuchea Thmey Daily
0 Comments