ធា​រី ចន្ថា​ប៊ី​ន ត្រូវ​ជួយ​ប្រកួត​ក្នុង​ពានរង្វាន់ 2018 Malaysia Cup សិន​ មុនធ្វើដំណើរ​មក​ហ្វឹកហាត់​ជាមួយ​ក្រុម​ជម្រើសជាតិ

កីឡាករ ធា​រី ចន្ថា​ប៊ី​ន ដែល​ទើប​កោះ​ហៅចូល​ក្រុម​ជម្រើសជាតិ​កម្ពុជា គឺជា​កីឡាករ​តែ​១​រូប​គត់​កំពុង​ប្រកប​អាជីព​នៅ​ក្លិប Teregganu FA សមាជិក​ពានរង្វាន់​លី​គ​កំពូល​ប្រទេស​ម៉ាឡេស៊ី (Malaysia Super League) រដូវ​កាល​ឆ្នាំ​២០១៨​នៅពេលនេះ ខណៈ​ក្លិប​របស់​កីឡាករ​រូបនេះ​កំពុង​បន្ត​យុទ្ធនាការ​ប្រកួត​ក្នុង​ពានរង្វាន់ 2018 Malaysia Cup​។

សម្រាប់​ប្រកួត​បន្ត​របស់​ក្រុម Teregganu FA ត្រៀម​ប៉ះ​ក្រុម Perak នៅវេលា​ម៉ោង​៨​យប់​ថ្ងៃអាទិត្យ ទី​២ ខែកញ្ញា ឆ្នាំ​២០១៨ លើ​ទីលាន​កីឡដ្ឋាន Sultan Ismail Nasiruddin Shah Stadium ក្នុង​ទីក្រុង​Kuala Terengganu​។ ចំពោះ​កីឡាករ ធា​រី ចន្ថា​ប៊ី​ន នឹង​ធ្វើ​ដំណើរ​ត្រឡប់មក​មាតុភូមិ​វិញ​ក្រោយ​បញ្ចប់​ការប្រកួត​នេះ ដើម្បី​ចូលរួម​ហ្វឹកហាត់​ក្នុង​ក្រុម​ជម្រើសជាតិ​កម្ពុជា ត្រៀម​ប្រកួត​មិត្តភាព​អន្តរជាតិ​ជាមួយ​ជម្រើសជាតិ​ម៉ាឡេស៊ី នៅ​ថ្ងៃទី​១០ ខែកញ្ញា ខាងមុខ​។



ប្រកួត​ចុងក្រោយ​ក្រុម Teregganu FA បាន​បន្ត​យកឈ្នះ​លើ​ក្រុម Felcra ក្នុង​ជើង​ទី​២​នៃ​ពានរង្វាន់ 2018 Malaysia Cup ប្រចាំ​វគ្គ​ជម្រុះ​តាម​ពូ​ល​នៅ​យប់​ថ្ងៃ​សៅរ៍ ទី​២៥ ខែសីហា ឆ្នាំ​២០១៨ ខណៈ​ក្រុម​នេះ​ធ្លាប់បាន​ប្រកួត​ឈ្នះ​លើ​ក្រុម​Kuala Lumpur ៥​ទល់​១ កាលពី​ថ្ងៃទី​៤ ខែសីហា ហើយ​បន្ត​ឈ្នះ​ក្រុម Perak ៤​ទល់​៣ ជា​បន្ត​ទៀត​នៅ​ថ្ងៃទី​១១ ខែសីហា ឆ្នាំ​២០១៨ និង​នៅ​ថ្ងៃទី​១៨ ខែសីហា ក្រុម​នេះ​បាន​ស្មើគ្នា​ជាមួយ​ក្រុម​Felcra​សមាជិក​ពានរង្វាន់​លី​គ​លំដាប់​ទី​២​របស់​ម៉ាឡេស៊ី ២​ទល់​២​។

សូម​បញ្ជាក់​ថា ​ពានរង្វាន់ 2018 Malaysia Cup មាន​ក្រុម​ចំនួន​១៦​ឡើងទៅ​វគ្គ​ចែក​ពូ​ល​ដែលមាន​៤​ពូ​ល​។ ចំពោះ​ពូ​ល A មាន​ក្រុម Terengganu, Kuala Lumpur, Perak, Felcra ហើយ​ពូ​ល B មាន Felda United, Melaka Unite, PDRM ពូ​ល C មាន MISC-MIFA, Jorhor, Kelantan, Kedah និង​ពូ​ល D មាន Pahang, Sadah, PKNP, Selangor​។ តាម​គម្រោង​ក្រុម​ខ្លាំង​តាម​ពូ​ល​ចំនួន​២​ក្រុម​នឹងមាន​ឈ្មោះ​ឡើងទៅ​វគ្គ​៨​ក្រុម​ចុងក្រោយ​និង​បន្ត​ប្រកួត​រហូតដល់​វគ្គ​ផ្តាច់ព្រ័ត្រ​។



​សូម​រំលឹកថា​ កម្ពុជា មាន​កីឡាករ​ឆ្នើមៗ​ចំនួន​៤​រូប​ចេញទៅ​ប្រកប​អាជីព​នៅ​ពានរង្វាន់​លី​គ​កំពូល​ប្រទេស​ម៉ាឡេស៊ី នៅ​ដើមរដូវ​កាល​ឆ្នាំ​២០១៨ នេះ​ដោយ​ក្នុងនោះ​មាន​កែវ សុខ​ផេង លេង​នៅ​ក្លិប PKNP FC កីឡាករ ចាន់ វឌ្ឍនាកា Panhag FA និង​កីឡាករ ធា​រី ចន្ថា​ប៊ី​ន ទៅកាន់​ក្លិប​Terengganu FC និង​កីឡាករ ប្រាក់ មុន្នី​ឧ​ត្ត​ម លេង​នៅ​ក្លិប​Negeri Sembilan​។ ក្នុងចំណោម​អ្នក​ទាំង​៤​មានតែ​កីឡាករ កែវ សុខ​ផេង ប៉ុណ្ណោះ ដែល​រក​គ្រាប់​បាល់​ឲ្យ​ក្រុម​បាន​មុនគេ​។ ប៉ុន្តែ​ពេលនេះ កែវ សុខ​ផេង ប្រាក់ មុន្នី​ឧ​ត្ត​ម និង ចាន់ វឌ្ឍនាកា ត្រូវបាន​ក្លិប​ដកចេញ​ពី​បញ្ជី​ក្នុង​ក្រុម ដោយ​នៅសល់តែ ធា​រី ចន្ថា​ប៊ី​ន ម្នាក់​ប៉ុណ្ណោះ​៕

Source: Kampuchea Thmey Daily