ភាគីពាក់ព័ន្ធទាំងក្លិបភ្នំពេញក្រោន និងក្លិបវិសាខា សមាជិកពានរង្វាន់លីគកំពូលកម្ពុជា (Metfone Cambodian League) បានប្រកាសគាំទ្រចំណាត់ការរបស់សហព័ន្ធកីឡាបាល់ទាត់កម្ពុជា (ស.ប.ក) ដែលបានដំណោះស្រាយជុំវិញវិវាទលើការផ្ទេរកីឡាករ ៥នាក់ ដែលមានប្រភពពីក្រុមថ្នាលយុវជនភ្នំពេញក្រោន ទៅកាន់ក្លិបបាល់ទាត់វិសាខាដែលបានបង្កឲ្យមានភាពភ្ញាក់ផ្អើលជាខ្លាំងនៅក្នុងចំណោមអ្នកគាំទ្រវិស័យបាល់ទាត់កម្ពុជាក្នុងរយៈកាលប៉ុន្មានថ្ងៃកន្លងមកនេះ។
កីឡាករ៥នាក់ដែលពាក់ព័ន្ធនោះមានកីឡាករ អ៊ុក សុវណ្ណ, អ៊ិន សូដាវីត, ស៊ិន កក្កដា, គីមឆាយ៉ា និងកែន ច័ន្ទសុភ័ក្ត្រ។ យោងតាមសេចក្តីប្រកាសព័ត៌មានរបស់ក្លិបទាំង២ខាងលើសុទ្ធតែបញ្ជាក់ក្នុងខ្លឹមសារដូចគ្នាថា ក្លិបទទួលយកដំណោះស្រាយដូចដែលមានកំណត់នៅក្នុងសេចក្តីប្រកាសព័ត៌មានលេខ១១៩/១៨ ស.ណ/ស.ប.ក ចុះថ្ងៃទី២៦ ខែធ្នូ ឆ្នាំ២០១៨ របស់សហព័ន្ធកីឡាបាល់ទាត់កម្ពុជាដោយក្លិបបាល់ទាត់ភ្នំពេញក្រោន យល់ព្រមទទួលយកប្រាក់ឧបត្ថម្ភពីក្លឹបបាល់ទាត់វិសាខា ជាថ្លៃហូបចុក ស្នាក់នៅ និងបណ្តុះបណ្តាលលើកីឡាករទាំង ៥នាក់ស្របទៅតាមលទ្ធផលនៃការពិភាក្សាគ្នាកន្លងមក ព្រមទាំងអនុលោមទៅតាមការបញ្ជាក់នៅក្នុងសេចក្តីថ្លែងការណ៍របស់ក្លិបបាល់ទាត់ភ្នំពេញក្រោន ដែលបានធ្វើឡើងនាថ្ងៃទី១៧ ខែធ្នូ ឆ្នាំ២០១៨កន្លងមកផងដែរ។
ក្លិបទាំង២បានប្រកាសគាំទ្រចំពោះជំហររបស់សហព័ន្ធកីឡាបាល់ទាត់កម្ពុជា ដែលគ្រោងនឹងដាក់ឆ្លងពង្រាងច្បាប់ស្តីពីការគ្រប់គ្រង និងការផ្ទេរកីឡាករក្នុងស្រុក នៅក្នុងមហាសន្និបាតពេញអង្គរបស់សហព័ន្ធកីឡាបាល់ទាត់កម្ពុជា ដែលនឹងប្រព្រឹត្តទៅនៅដើមឆ្នាំ២០១៩ ខាងមុខនេះ ដើម្បីបំពេញនូវភាពចន្លោះប្រហោងនៃច្បាប់ និងការពារកុំឲ្យកើតមានអរិភាពដូចអ្វីដែលក្លិបបាល់ទាត់ភ្នំពេញក្រោន ទើបតែបានជួបប្រទះនោះ។ ជាងនេះទៅទៀត យន្តការគតិយុត្តិនេះនឹងធានានូវដំណើរអភិវឌ្ឍន៍នៃវិស័យបាល់ទាត់កម្ពុជា ជាពិសេសលើកទឹកចិត្តដល់បណ្តាក្លិបបាល់ទាត់នានាចូលរួមយ៉ាងផុសផុលក្នុងការបណ្តុះបណ្តាលធនធានកីឡាករជំនាន់ក្រោយឲ្យបានកាន់តែច្រើនថែមទៀត ព្រមទាំងដើម្បីបញ្ចៀសនូវបញ្ហាណាមួយជាយថាហេតុនាពេលអនាគតពាក់ព័ន្ធនឹងការផ្ទេរកីឡាករក្នុងស្រុកដែលអាចនឹងត្រូវធ្វើឡើងដោយគ្មានតម្លាភាព ឬតាមរយៈរូបភាពអវិជ្ជមានណាមួយនោះ។
ទាំងក្លិបភ្នំពេញក្រោន និងវិសាខា សូមថ្លែងអំណរគុណយ៉ាងជ្រាលជ្រៅចំពោះសាធារណជន ពិសេសអ្នកគាំទ្រនិងបណ្តាញសារព័ត៌មាននានា ដែលបានតាមដានយ៉ាងយកចិត្តទុកដាក់លើករណីនេះ ដោយបានបង្ហាញឲ្យឃើញនូវការគាំទ្រដ៏ខ្លាំងក្លាចំពោះវិស័យកីឡាបាល់ទាត់កម្ពុជា៕
Source: Kampuchea Thmey Daily
0 Comments