កម្មវិធីប្រកួតវគ្គពាក់កណ្ដាលផ្តាច់ព្រ័ត្រគូទី២នឹងចាប់ផ្តើមដំណើរការនៅថ្ងៃអាទិត្យ ទី២ ខែកញ្ញា ឆ្នាំ២០១៨ នេះប្រចាំពានរង្វាន់បាល់ទាត់សម្តេចអគ្គមហាសេនាបតីតេជោ ហ៊ុន សែន ឆ្នាំទី១២ (Hun Sen Cup 2018) ក្រោមការរៀបចំពីសំណាក់គណៈកម្មការប្រកួតបាល់ទាត់ជាតិ(CNCC) សេនាធិការរបស់សហព័ន្ធកីឡាបាល់ទាត់កម្ពុជា។
គូទី២វគ្គពាក់កណ្ដាលផ្តាច់ព្រ័ត្រនេះក្រុមអគ្គស្នងការដ្ឋាននគរបាលជាតិ (ប៉ូលីស) ត្រូវប៉ះក្រុមអង្គរថាយហ្គឺរ នៅវេលាម៉ោង៦និង៣០នាទីល្ងាច ថ្ងៃសៅរ៍ ទី២ ខែកញ្ញា ឆ្នាំ២០១៨ លើទីលានពហុកីឡដ្ឋានជាតិក្នុងរាជធានីភ្នំពេញ ព្រមទាំងមានផ្សាយផ្ទាល់តាមប៉ុស្តិ៍ទូរទស្សន៍ BTV News ផងដែរ។
ចំពោះក្រុមអគ្គស្នងការដ្ឋាននគរបាលជាតិ ជាបេក្ខភាពមួយដែលមិនអាចមើលរំលងក្នុងការដណ្តើមកៅអីឡើងទៅលេងវគ្គផ្តាច់ព្រ័ត្រ ខណៈក្រុមនេះធ្លាប់បានគ្រងជើងឯកពានរង្វាន់ម្តងរួចមកហើយកាលពីឆ្នាំ២០១៤ ក្រោយឈ្នះលើក្រុមបៀលប្រាយយូណាយធីតក្នុងវគ្គផ្តាច់ព្រ័ត្រ ២ទល់០។ លោក សារ៉េត ស៊ីដន ដែលជាគ្រូជំនួយត្រូវបានក្លិបតែងតាំងឱ្យធ្វើជាគ្រូបង្វឹកដើម្បីដឹកនាំក្រុមនៅរដូវកាលនេះផងដែរ។
ចំណែកលោកOriol Mohedano គ្រូបង្វឹកក្រុមអង្គរថាយហ្គឺរ បានលើកឡើងថា «ការប្រកួតនេះគឺពិសេស ណាស់សម្រាប់ក្រុមយើង គឺអាចនិយាយថាប្រៀបដូចវគ្គផ្ដាច់ព្រ័ត្រអីចឹង ទោះបីវាមិនមែនវគ្គផ្ដាច់ព្រ័ត្រក្ដី ព្រោះថាយើងលេងនៅទឹកដីកណ្ដាល និងលេងតែមួយជើងប៉ុណ្ណោះ។ ពួកយើងរំភើបនិងរីករាយក្នុងការលេងប្រកួតនេះ។ វាជាការល្បងសមត្ថភាពសម្រាប់ក្រុមទាំងពីរ។ ពួកយើងនឹងរៀបចំឲ្យបានល្អសម្រាប់ការប្រកួត»។
បុរសជនជាតិអេស្ប៉ាញរូបនេះបន្តថា «ពិតណាស់ពួកយើងចង់ឡើងទៅវគ្គផ្ដាច់ព្រ័ត្រ។ ប៉ូលិសជាក្រុមល្អមួយ ហើយពួកគេរីកចម្រើនឡើងពីមួយពេលទៅមួយពេល និងមានបទពិសោធន៍ច្រើនលើទីលាន។ ខ្ញុំគោរពពួកគេខ្លាំងណាស់។ ពួកគេជាក្រុមខ្លាំងមួយ។ ថ្វីបើពួកគេមិនអាចប្រជែងជើងឯកមិត្តហ្វូនខេមបូឌានលីគ តែពួកគេមានភាពគ្រោះថ្នាក់ ហើយពួកយើងបានលេងទល់នឹងពួកគេរួចហើយ យើងដឹងថា ពួកគេល្អយ៉ាងណា។ ពួកយើងនឹងព្យាយាមហើយសង្ឃឹមថា យើងបានឡើងទៅវគ្គផ្ដាច់ព្រ័ត្រ»។
តាំងពីបង្កើតក្លិបមកក្រុមអង្គរថាយហ្គឺរ ធ្លាប់មានបទពិសោធន៍ធ្វើបានល្អកាលពីឆ្នាំ២០១៥ ដោយដណ្តើមបានកៅអីឡើងទៅលេងដល់វគ្គពាក់កណ្ដាលផ្តាច់ព្រ័ត្រ តែត្រូវចាញ់ក្រុមព្រះខ័នរាជស្វាយរៀង ២ទល់០ តែបានប្រកួតឈ្នះលើក្រុមអគ្គស្នងការដ្ឋាននគរបាលជាតិ វិញនៅវគ្គដណ្តើមចំណាត់ថ្នាក់ លេខ៣ ដោយលទ្ធផល៣ទល់០៕
Source: Kampuchea Thmey Daily
0 Comments