ភ្នំពេញ ៖ លោកជំទាវកិត្តិសង្គហបណ្ឌិតម៉ែន សំអន បានថ្លែងថា ការចូលរួមថែរក្សាការពារវប្បធម៌ខ្មែរគឺជាការចូលរួមខ្ពស់ក្នុងការលើកស្ទួយកិត្តិយសជាតិពីព្រោះថា វប្បធម៌របស់ប្រទេសនីមួយៗនៅលើពិភពលោកគឺជាកញ្ចក់សម្រាប់ឆ្លុះបញ្ចាំងពីរបៀបរបបនៃការអភិវឌ្ ជឿនលឿនរបស់ប្រទេសនោះ។
លោកជំទាវកិត្តិសង្គហបណ្ឌិតថ្លែងបែបនោះ នៅមជ្ឈមណ្ឌលពិព័រណ៍កោះពេជ្រ នាថ្ងៃទី២២ខែកញ្ញានេះខណៈលោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជា មួយរដ្ឋសភា-ព្រឹទ្ធសភា និងអធិការកិច្ច តំណាងសម្ដេចអគ្គមហាសេនាបតីតេជោ ហ៊ុន សែន អញ្ជើញចូលរួមក្នុងពិធី សម្ពោធបើកពិព័រណ៍អាពាហ៍ពិពាហ៍លើកទី៥ មហោស្រពសិល្បៈដណ្ដាំស្លម្ហូប អាហារខ្មែរលើកទី១៩ និងការបង្ហាញម៉ូតសម្លៀកបំពាក់ប្រពៃណីលើកទី១៨ នៅ មជ្ឈមណ្ឌលសន្និបាត និងពិព័រណ៍កោះពេជ្រ។
លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជា មួយរដ្ឋសភា-ព្រឹទ្ធសភា និងអធិការកិច្ច មានប្រសាសន៍លើកឡើងថា ក្នុងនាមសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ក្នុងឱកាសសម្ពោធបើកពិព័រណ៍អាពាហ៍ពិពាហ៍លើកទី៥ មហោស្រពសិល្បៈដណ្ដាំស្លម្ហូបអាហារខ្មែរលើកទី១៩ និងការបង្ហាញម៉ូតសម្លៀកបំពាក់ប្រពៃណីលើកទី១៨ ដែលបានប្រព្រឹត្តទៅនៅថ្ងៃទី ២២ -២៣ ខែកញ្ញា ឆ្នាំ២០១៨នៅ មជ្ឈមណ្ឌលសន្និបាត និងពិព័រណ៍កោះពេជ្រដ៏មហោឱឡារិកនាពេលនេះ។
លោកជំទាវកិត្តិសង្គហបណ្ឌិតឧបនាយករដ្ឋមន្ត្រីបានបញ្ជាក់ថាជារៀងរាល់ឆ្នាំក្រសួងវប្បធម៌បានផ្តួច ផ្តើមឱ្យមានការរៀបចំព្រឹត្តិការណ៍ពិព័រណ៍អាពាហ៍ពិពាហ៍ មហោ ស្រពសិល្បៈ តាមរាជធានី ខេត្ត និងអង្គការសហគម ដោយ មានដៃគូឯកជនជាច្រើនចូលរួម។ ព្រឹត្តិការណ៍នេះមានគោលបំណងបំផុសចលនាមហាជន ជាពិសេស យុវជនឲ្យចូលរួមថែរក្សា ការពារ និងលើកស្ទួយសិល្បៈវប្បធម៌ជាតិ ពិសេស ទម្រង់អាពាហ៍ពិពាហ៍ ម្ហូបអារហារ និងសម្លៀកបំពាក់ប្រពៃណីខ្មែរ ដែលជាផ្នែកដ៏សំខាន់មួយនៃវប្បធម៌ជាតិ ដោយបណ្ដុះនូវស្មារតីស្រលាញ់ការយល់ដឹងអំពីគុណតម្លៃ និងការផ្ទេរបន្តទៅឲ្យអ្នកជាជំនាន់ក្រោយ។
លោកជំទាវកិត្តិសង្គហបណ្ឌិត ម៉ែន សំអន បានថ្លែងបន្តទៀតថា នេះជាការជួយពង្រឹងសមត្ថភាពសិល្បៈ ផ្លាស់ប្តូរ បទពិសោធន៍ និងលើកកម្ពស់គុណភាពផលិតផលវប្ប ធម៌ ដើម្បីឈានទៅសហការ និងប្រកួត ប្រជែងជាមួយបណ្ដាប្រទេសក្នុងតំបន់ និងពិភពលោក ដោយទាញយកអត្ថប្រយោជន៍ពីវិស័យវប្បធម៌នេះ ក្នុងការរួមចំណែកអភិវឌ្ឍន៍សេដ្ឋកិច្ចជាតិ និងសេចក្តីត្រូវការរបស់មហាជន។
លោកជំទាវកិត្តិសង្គហបណ្ឌិត ម៉ែន សំអន បានចាត់ទុកថា ការរៀបចំពិព័រណ៍ និងមហោស្រពសិល្បៈនាពេលនេះ ជាព្រឹត្តិការណ៍វប្បធម៌ដ៏មានសារៈសំខាន់ ដែលរួមវិភាគទានដោយផ្ទាល់ដល់ការអភិរក្ស ផ្សព្វផ្សាយ និងលើកស្ទួយតម្លៃនៃបេតិកភណ្ឌវប្បធម៌ជាតិឲ្យកាន់តែរីកចម្រើន ក្នុងក្របខណ្ឌ នៃកិច្ច សហការល្អ រវាងស្ថាប័នរដ្ឋ និងវិស័យឯកជន អង្គការមហាជន សហគមន៍ និងសប្បុរសជននានាដែលជាដៃគូអភិវឌ្ឍន៍ក្នុងការប្រមែប្រមូលពូនផ្ដុំការចូលរួម ស្របតាមគោលការណ៍”រដ្ឋជាអ្នកគ្រប់ គ្រង គាំពារ ដៃគូឯកជនជាអ្នកអនុវត្ត”។
ព្រះរាជាណាចក្រកម្ពុជា ជាផែនដីដែលសម្បូរដោយសម្បត្តិធម្មជាតិបេតិកភណ្ឌវប្បធម៌ ទាំងរូបី និងអរូបី ដែលបុព្វបុរសដូនតាយើងបានបន្សល់ទុកមកជាច្រើនជំនាន់ ធ្វើឱ្យកេរ្តិ៍ឈ្មើរបស់កម្ពុជាល្បីរន្ទឺសុសសាយនៅលើពិភពលោក។
ក្រៅពីសម្បត្តិបេតិកភណ្ឌវប្បធម៌រូបី ដូចជាប្រាសាទបុរាណ និងរមណីយដ្ឋានប្រវត្តិសាស្ត្រច្រើនរាប់ពាន់នៅពាសពេញផ្ទៃប្រទេស កម្ពុជាក៏មានសម្បត្តិបេតិក ភណ្ឌវប្បធម៌អរូបីដ៏សម្បូរបែបផងដែរដូចជា របាំ ល្ខោន តន្ត្រី គំនូរ ចម្លាក់ សិប្បកម្ម សំលៀកបំពាក់ ម្ហូបអារហារ ប្រពៃណី ទំនៀមទម្លាប់ និងពិធីបុណ្យនានាជាមួយនឹងចំណេះដឹង ជំនាញ បច្ចេកទេស ដែលបានផ្ទេរពីជំនាន់មួយទៅជំនាន់មួយរហូតមកដល់សព្វថ្ងៃនេះ។ កេរដំណែលវប្បធម៌ទាំងនេះ គឺជាដួងព្រលឹង និងជាអត្តសញ្ញាណជាតិខ្មែរដ៏រឹងមាំ មានតម្លៃមហាសាលមិនអាចកាត់ថ្លៃបាន ហើយក៏កំពុងដើរតួនាទីដ៏សំខាន់ផងដែរ ក្នុងការអភិវឌ្ឍសេដ្ឋកិច្ចសង្គម ចូលរួមកាត់បន្ថយភាពក្រីក្ររបស់ប្រជាជន ជាពិសេសតាមរយៈវិស័យទេសចរណ៍វប្បធម៌។
លោកជំទាវកិត្តិសង្គហបណ្ឌិត ម៉ែន សំអន បានលើកឡើងបន្ថែមទៀតថា ដោយមានការយកចិត្តទុកដាក់ពីរាជរដ្ឋាភិបាលកម្ពុជា ដែលមានសម្តេចតេជោហ៊ុន សែនជានាយករដ្ឋមន្ត្រីនោះ វិស័យសិល្បៈវប្បធម៌ជាតិត្រូវបានលើកម្ពស់ទាំងនៅលើឆាកជាតិនិងអនុ្តរជាតិ។ ជាក់ស្ដែងសម្បត្តិវប្បធម៌របស់ខ្មែរយើងមួយចំនួនត្រូវបានពិភពលោកទទួល ស្គាល់ និងបានដាក់បញ្ចូលជាបេតិកភណ្ឌពិភពលោក និងបេតិកភណ្ឌវប្បធម៌អរូបី នៃមនុស្សជាតិមានជាអាទិ៍ ប្រាសាទតំបន់អង្គរ, ប្រាសាទព្រះវិហារ ,តំបន់ប្រាសាទសំបូរ ព្រៃគុក ,របាំក្បាច់បុរាណខ្មែរ, ល្ខោនស្បែកធំ ល្បែងទាញ ព្រ័ត្រ និងចាប៉ីដងវែង។
ជាមួយគ្នានេះ សម្បត្តិបេតិកភណ្ឌវប្បធម៌មួយចំនួនទៀតក៏បាននឹងកំពុងរៀបចំឯកសារ ដើម្បីស្នើសុំដាក់បញ្ចូលជាបេតិកភណ្ឌពិភព លោក និងបេតិកភណ្ឌវប្បធម៌អរូបី នៃមនុស្សជាតិជាបន្តបន្ទាប់ទៀតផងដែរ។
ដោយឈរលើមូលដ្ឋាននៃធនធានវប្បធម៌នេះហើយ ទើបកម្ពុជាត្រូវបានគេចាត់ថ្នាក់ជាគោលដៅទេសចរណ៍មួយ ប្រកបដោយចីរភាព៕
Source: Kampuchea Thmey Daily
0 Comments