ទារក​បី​នាក់​ ត្រូវ​បាន​គេ​ចាក់​នៅ​មណ្ឌល​ថែទាំ​កុមារ​ក្រុង ញូវយ៉ក

ប៉ូលិស​បាន​និយាយថា កម្មករ​ភេទស្ត្រី​ម្នាក់​បាន​ចាក់​ទារក​បីនាក់​ដែល​ក្នុងនោះ​មាន​ពីរ​នាក់​មាន​អាយុ​តិចជាង​មួយខែ​នៅក្នុង​មណ្ឌល​ថែទាំ​កុមារ​មួយ​ក្នុង​ទីក្រុង​ញូវយ៉ក​កាលពី​ថ្ងៃ​សុក្រ​មុន​ពេល​អា​រក​.​ដៃ​របស់​នាង​ និង​ត្រូវបាន​គេ​ចាប់ខ្លួន។

លោក Juanita Holmes ជំនួយការ​ប្រធាន​ល្បាត​សម្រាប់​នាយកដ្ឋាន​ប៉ូលិស​ក្រុង​ញូវយ៉ក​បាន​និយាយ​ក្នុង​សន្និសីទ​សារព័ត៌មាន​ថា ស្ត្រី​ម្នាក់​ដែល​មិន​បញ្ចេញ​អត្តសញ្ញាណ​អាយុ​៥២​ឆ្នាំ​ដែល​ក៏បាន​ចាក់​មនុស្សពេញវ័យ​ពីរ​នាក់​នៅក្នុង​ឧប្បត្តិហេតុ​មុននេះ​ផងដែរ​នោះ​គឺ​ស្ថិតនៅក្នុង​ស្ថាន​ភាពមិន​ធ្ងន់ធ្ងរ​ទេ។

ប៉ូលិស​មិនបាន​និយាយ​លម្អិត​អំពី​ហេតុផល​ដែល​ជំរុញ​ឲ្យ​មាន​ករណីនេះ​កើតឡើង​ទេ​។​
ប៉ូលិស​បាន​និយាយថា ក្នុងចំណោម​ទារក​ដែល​ត្រូវគេ​ចាក់​នោះ​គឺមាន​ស្រី​ពីរ​នាក់​និង​ប្រុស​ម្នាក់​។ ទារក​ទាំងបី​ត្រូវបាន​បញ្ជូនទៅ​មន្ទីរពេទ្យ​ជាមួយ​ស្ថានភាព​ធ្ងន់ធ្ងរ​ប៉ុន្តែ​មិនមាន​គ្រោះថ្នាក់​ដល់​ជីវិត​ទេ។ រដ្ឋអាជ្ញា​បាន​និយាយថា ពួកគេ​មាន​អាយុ​១៣​ថ្ងៃ​, ២២​ថ្ងៃ​និង​៣៣​ថ្ងៃ​។​

ស្ត្រី​រូបនោះ​ក៏បាន​ចាក់​បុរស​អាយុ​៣១​ឆ្នាំ​ម្នាក់​ដែល​ត្រូវបាន​គេ​ជឿថា​ជា​ឪពុក​របស់​ក្មេង​ម្នាក់​និង​ស្ត្រី​ម្នាក់​នៅឯ​មណ្ឌល​ថែទាំ Mei Xin Care ក្នុង​សង្កាត់ Flushing ផងដែរ​។ ប៉ូលិស​បាន​និយាយថា កាំបិត​ផ្ទះបាយ​និង​កាំបិត​កាប់សាច់​ប្រឡាក់​ឈាម​ត្រូវបាន​រកឃើញ​នៅ​កន្លែងកើតហេតុ​។​

ប៉ូលិស​បាន​និយាយថា មាន​កុមារ​ចំនួន​៩​នាក់​និង​ឪពុកម្តាយ​ជាច្រើន​នាក់​ស្ថិត​ក្នុងផ្ទះ​ឯកជន​មួយ​នេះ​នៅពេល​ការវាយប្រហារ​កើតឡើង​។​

អ្នកនាំពាក្យ​ប៉ូលិស​បាន​និយាយថា មនុស្សពេញវ័យ​ពីរ​នាក់​ដែល​ត្រូវបាន​គេ​ចាក់​គឺ​រស់នៅ​ក្នុងផ្ទះ​នោះ​។ អ្នកនាំពាក្យ​បាន​បន្ថែមថា ជនល្មើស​គឺជា​អ្នកធ្វើការ​នៅ​មណ្ឌល​នោះ​ប៉ុន្តែ​មិនមែន​រស់នៅ​ទីនោះ​ទេ​។​

លោក Richard Brown មេធាវី​សង្កាត់ Queens បាន​និយាយ​នៅក្នុង​សេចក្តីថ្លែងការណ៍​មួយ​ថា អ្នក​វាយប្រហារ​ត្រូវបាន​ឃុំឃាំង​នៅ​មន្ទីរពេទ្យ​ក្បែរ​នោះ​ដើម្បី​ធ្វើការ​វាយតម្លៃ​ពី​ជំងឺផ្លូវចិត្ត​ក៏ដូចជា​ការព្យាបាល​របួស​ផងដែរ​៕ AFP

​

Source: Kampuchea Thmey Daily