រតនគីរី ៖ រថយន្តសាំយ៉ុង ដឹកឈើ១គ្រឿង ត្រូវបានកម្លាំងបរិស្ថានធ្វើការ បង្ក្រាប ហើយយកមករក្សាទុកនៅទីស្នាក់ការ ដែនជម្រកសត្វព្រៃលំផាត់ ស្ថិតនៅភូមិថ្មី ឃុំជ័យឧត្តម ស្រុកលំផាត់។
បើតាមការបង្ហើបឲ្យដឹង ពីមន្ត្រីបរិស្ថាននៅ ទីនោះសុំមិនបង្ហាញឈ្មោះ បានឲ្យដឹងថា ក្នុងចំណោម រថយន្តដឹកឈើ ក្រុមឈ្មួញ ជាច្រើន ដែលមកសាងឈើស្តុកដាក់លើរថយន្ត នៅត្រង់ចំណុច វាលថ្ម ដែនជម្រកសត្វព្រៃលំផាត់ និងតាមផ្ទះក្រុមសាច់ញាតិ របស់មន្ត្រីបរិស្ថានដែលសាងសង់នៅលើផ្ទៃដីដែន អភិរក្សការពារសត្វព្រៃ ជាប់នឹងផ្លូវជាតិលេខ៧៦ តែអកុសលរថយន្ត១ គ្រឿង នេះក៏ត្រូវបានបង្ក្រាបភ្លាមៗតែម្តង។
ជាក់ស្តែងកាលពីរសៀល ថ្ងៃទី២០ ខែកញ្ញា ឆ្នាំ២០១៨នេះ លោក ធីម វិចិត្រ ប្រធានស្នាក់ការ ដែន ជម្រកសត្វព្រៃលំផាត់ បានឲ្យដឹងថា ករណីចាប់ រថយន្តដឹកឈើ ល្មើសច្បាប់ ខាងលើនេះមិនមែន លោក ជាអ្នកបង្ក្រាបនោះទេ គឺ កម្លាំងសមត្ថកិច្ចនៃ មន្ទីរបរិស្ថានខេត្ត ជាអ្នកបង្ក្រាប ហើយយករថយន្ត ដែលផ្ទុកបទល្មើសនេះមកផ្ញើប៉ុណ្ណោះ។
ទោះជាដូច្នេះក្តី លោក ផុន ខេមរិន្ទ ប្រធានមន្ទីរ បរិស្ថានខេត្តរតនគីរី ពាក់ព័ន្ធករណីបង្ក្រាបរថយន្ត ដឹកបទល្មើសព្រៃឈើខាងលើ លោកបានបញ្ជាក់ឲ្យដឹង នៅរសៀលថ្ងៃទី២០ ខែកញ្ញា នេះ ថា រថយន្តដឹកឈើ ខាងលើនេះ កម្លាំងរបស់លោក បានធ្វើការបង្ក្រាបកាលពី ថ្ងៃទី១៨ ខែកញ្ញា ឆ្នាំ២០១៨ មកម្ល៉េះ តែពេលនេះលោកកំពុងធ្វើឯកសារបញ្ជូនទៅតុលាការ ខេត្តចាត់ការតាមនីតិវិធីច្បាប់។
សូមបញ្ជាក់ថា រថយន្តសាំយ៉ុងដឹកឈើ១គ្រឿងខាងលើនេះ សង្ស័យមិនបានបង់លុយឲ្យមន្ត្រីបរិស្ថាននោះហើយមើលទៅ ? ទើបបានជាធ្វើការបង្ក្រាបយ៉ាងតក់ក្រហល់បែបនេះ ប៉ុន្តែកន្លងមកមានរថយន្តគ្រប់ប្រភេទជាច្រើនគ្រឿងបានដឹកជញ្ជូនឈើឆ្លងកាត់មុខទីស្នាក់ការបរិស្ថាននោះមិនបានធ្វើការបង្ក្រាបឡើយ ដោយសាររថយន្តទាំងនេះបានចូលបង់លុយគ្រប់ចំនួន៕
Source: Kampuchea Thmey Daily
0 Comments