បេសកជនជាន់ខ្ពស់បំផុតរបស់ប្រទេសចិន បានបើកសម្ពោធស្ថានទូតថ្មីមួយនៅសាធារណរដ្ឋដូមីនិកកាលពីថ្ងៃសុក្រ បន្ទាប់ពីប្រទេសការ៉ាប៊ីនមួយនេះ បានកាត់ផ្តាច់ចំណងទាក់ទងជាមួយកោះតៃវ៉ាន់ ដែលជាហេតុជំរុញឲ្យសហរដ្ឋអាមេរិកព្រួយបារម្ភចំពោះការធ្លាក់ចុះនៃចំនួនសម្ព័ន្ធមិត្តរបស់ប្រជាជាតិកោះអាស៊ីមួយនេះ។
កោះតៃវ៉ាន់ដែលប្រទេសចិនអះអាងថាជារបស់ខ្លួនឥឡូវនេះមានទំនាក់ទំនងផ្លូវការជាមួយប្រទេសត្រឹមតែ១៧ប៉ុណ្ណោះដែលស្ទើរតែទាំងអស់នៃប្រទេសទាំងនោះគឺជាប្រជាជាតិតូចៗនិងមិនសូវអភិវឌ្ឍនៅតំបន់អាមេរិកកណ្តាលនិងប៉ាស៊ីហ្វិកដូចជាប្រទេសបេលីនិងណេរុជាដើម។
អ្នកការទូតជាន់ខ្ពស់របស់រដ្ឋាភិបាលចិនលោក Wang Yi បាននិយាយនៅក្នុងសុន្ទរកថាមួយដែលផ្សាយតាមប្រព័ន្ធផ្សព្វផ្សាយចិនថា “យើងបានមើលឃើញរបកគំហើញជាប្រវត្តិសាស្ត្រ”។
រួមជាមួយការសម្រេចចិត្តរបស់សាធារណរដ្ឋដូមីនិកកាលពីខែឧសភា ប្រទេសប៉ាណាម៉ានិងអែលសាល់វ៉ាឌ័រក៏បានផ្លាស់ប្តូរការទទួលស្គាល់ទៅទីក្រុងប៉េកាំងផងដែរកាលពីពីរឆ្នាំមុន។
តៃវ៉ាន់បាននិយាយថា ប្រទេសចិនបានផ្តល់ឲ្យសាធារណរដ្ឋដូមីនិកនូវកញ្ចប់ទឹកប្រាក់ចំនួន៣.១ពាន់លានដុល្លារនៃការវិនិយោគនិងប្រាក់កម្ចីដើម្បីធ្វើឲ្យពួកគេកាត់ផ្តាច់ទំនាក់ទំនងបើទោះបីជាប្រទេសចិនបាននិយាយថា មិនមានលក្ខខណ្ឌសេដ្ឋកិច្ចអ្វីក៏ដោយ។
លោក Wang បាននិយាយថា សាធារណរដ្ឋដូមីនិកគឺជាដៃគូពាណិជ្ជកម្មធំបំផុតរបស់ចិននៅក្នុងតំបន់ការ៉ាប៊ីនដែលជាមូលដ្ឋានគ្រឹះនៃចំណងទាក់ទងផ្នែកការទូត។
លោកបាននិយាយថា “សេដ្ឋកិច្ចកំពុងអភិវឌ្ឍនិងពង្រីកទីផ្សាររបស់ចិនបាននាំមកនូវផលប្រយោជន៍ពិតប្រាកដដល់សាធារណរដ្ឋដូមីនិក”។
លោកបានបន្តថា “សាធារណរដ្ឋដូមីនិកដែលបង្កើតទំនាក់ទំនងការទូតជាមួយប្រទេសចិនគឺមិនផ្តោតគោលដៅលើភាគីទីបីណាមួយទេហើយមិនប៉ះពាល់ដល់គោលនយោបាយបរទេសរបស់គ្នាទៅវិញទៅមកដែរនិងមិនធ្វើឲ្យប៉ះពាល់ដល់ឥទ្ធិពលប្រពៃណីនិងសិទ្ធិស្របច្បាប់របស់បណ្តាប្រទេសដទៃទៀតនៅក្នុងតំបន់ឡើយ”។
គួរបញ្ជាក់ថា លោក Wang ក៏នឹងធ្វើទស្សនកិច្ចនៅប្រទេស ហ្គូយ៉ាណា និង ស៊ូរីណាម ផងដែរមុនពេលថ្លែងសុន្ទរកថានៅមហាសន្និបាតអង្គការសហប្រជាជាតិក្នុងទីក្រុងញូវយ៉ក៕ REUTERS
Source: Kampuchea Thmey Daily
0 Comments