ភ្នំពេញ ៖ លោកសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល បានជំរុញឲ្យថ្នាក់ដឹកនាំក្រសួង ថ្នាក់នាយកដ្ឋាន ថ្នាក់ដឹកនាំមន្ទីរសុខាភិបាលរាជធានី-ខេត្ត ទាំងអស់បន្តយកចិត្តទុកដាក់និងជំរុញកិច្ចការកែលម្អគុណភាពសេវាសុខាភិបាលឲ្យកាន់តែប្រសើរឡើងថែមទៀត។
នៅក្នុងកិច្ចប្រជុំដ៏មានសារសំខាន់នេះ លោករដ្ឋមន្ត្រីបានដាក់ចេញនិងជំរុញការងារកែលម្អគុណភាពសេវាជាបន្តទៀត ព្រមទាំងបានណែនាំដល់សមាជិក-សមាជិកាអង្គប្រជុំទាំងអស់ត្រូវ បន្តការខិតខំក្នុងការប្រតិបត្តិការផ្តល់សេវាសុខាភិបាលឲ្យសកម្មនិងយកចិត្តទុកដាក់ជាងមុនជូនដល់ប្រជាពលរដ្ឋ។ ត្រូវពង្រឹងវិន័យការងារនិងកែប្រែទម្លាប់ការងារ ដោយផ្តើមចេញពីបុគ្គលម្នាក់ៗ ដើម្បីជំរុញការកែលម្អគុណភាពសេវា និងធានាសេវា២៤ម៉ោង បន្ថែមទៀត ឲ្យបានគ្រប់មូលដ្ឋានសុខាភិបាលសាធារណ។ ត្រូវជំរុញការអភិវឌ្ឍន៍បន្ថែមនូវហេដ្ឋារចនាសម្ព័ន្ធសុខាភិបាល ព្រមទាំងយកចិត្តទុកដាក់ក្នុងការថែទាំនិងជួសជុលសម្ភារ:-បរិក្ខារពេទ្យ ឲ្យបានល្អ។
ទន្ទឹមនឹងនេះ លោកសាស្ត្រាចារ្យម៉ម ប៊ុនហេង បានបញ្ជាក់ថា ត្រូវជំរុញការពង្រឹងសមត្ថភាពបច្ចេកទេសពេទ្យបន្ថែមដោយគិតពីគុណភាព ប្រសិទ្ធភាព សុវត្ថិភាព និងសមធម៌ សម្រាប់ការផ្តល់សេវាសុខភាពសាធារណ។ ត្រូវបន្តការយកចិត្តទុកដាក់ការងារគ្រប់គ្រងឱសថ-បរិក្ខារពេទ្យ បន្ថែមទៀត តាមគោលការណ៍ណែនាំប្រតិបត្តិនិងជំរុញការងារគ្រប់គ្រងបុគ្គលិក និងហិរញ្ញវត្ថុ ឲ្យបានល្អតាមគោលការណ៍ណែនាំបន្ថែមទៀត។
នៅក្នុងកិច្ចប្រជុំនោះលោករដ្ឋមន្ត្រី បានផ្សព្វផ្សាយគោលនយោបាយនិងយុទ្ធសាស្ត្រចតុកោណដំណាក់កាលទី៤របស់រាជរដ្ឋាភិបាលអាណត្តិទី៦នៃរដ្ឋសភា និងបានថ្លែងនូវអំណរគុណយ៉ាងជ្រាលជ្រៅជាទីបំផុតក្នុងនាមថ្នាក់ដឹកនាំក្រសួងនិងក្នុងនាមលោកផ្ទាល់ ជូនចំពោះសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលសម្តេចបានផ្តល់ទំនុកចិត្តនិងការតែងតាំងជារដ្ឋមន្ត្រី រដ្ឋលេខាធិការ និងអនុរដ្ឋលេខាធិការនៃក្រសួងសុខាភិបាល។
គួរបញ្ជាក់ថា កន្លងមកក្រសួងសុខាភិបាលបានបន្ដខិតខំប្រឹងប្រែងពង្រឹងនិងពង្រីកគ្រប់សេវាកម្មទាំងអស់ទាំងគុណភាពពិនិត្យព្យាបាលសម្ភារបរិក្ខារពេទ្យនិងហេដ្ឋារចនាសម្ព័ន្ធ ឲ្យបានកាន់តែប្រសើរបន្ថែមទៀតដើម្បីបំពេញទៅតាមតម្រូវការប្រជាពលរដ្ឋទូទាំងប្រទេស។
ក្រៅពីនេះលោករដ្ឋមន្ដ្រីក្រសួងសុខាភិបាលបានជំរុញឲ្យមន្ដ្រីសុខាភិបាល គ្រូពេទ្យទូទាំងប្រទេស ត្រូវបន្ដបង្កើនការយកចិត្តទុកដាក់និងពង្រឹងពង្រីកគុណភាពសេវាព្យាបាលជូនប្រជាពលរដ្ឋឲ្យកាន់តែមានប្រសិទ្ធភាពខ្ពស់ថែមទៀត។
លោករដ្ឋមន្ត្រីបានបន្តថា ការយកចិត្តទុកដាក់ទៅលើសេវាព្យាបាលជំងឺនេះពិតជាមានសារសំខាន់ណាស់ក្នុងការបង្កើននូវភាពជឿជាក់របស់ប្រជាពលរដ្ឋមកលើសេវារបស់រដ្ឋយើង។
ដូចនេះគ្រូពេទ្យត្រូវគោរព និង ប្រកាន់ឲ្យបានខ្ជាប់ខ្ជួននូវក្រមសីលធម៌វិជ្ជាជីវៈគ្រូពេទ្យឲ្យបានល្អប្រសើរ។ ព្រោះថាគ្រូពេទ្យ មានតួនាទីដ៏សំខាន់បំផុត ក្នុងការផ្ដល់សេវាសុខភាពជូនប្រជាពលរដ្ឋ សុវត្ថិភាព និងប្រកបដោយប្រសិទ្ធភាពខ្ពស់ ដូចនេះយើងត្រូវមានការទំនួលខុសត្រូវខ្ពស់ ទាំងចំណេះ ជំនាញ និងបទពិសោធន៍ ធ្វើអ្វីមួយត្រូវមានការប្រុងប្រយ័ត្នជានិច្ច ពិសេសត្រូវចាត់ទុកថា អ្នកជំងឺ ដូចជាសមាជិកគ្រួសាររបស់យើងមួយរូបផងដែរ៕
Source: Kampuchea Thmey Daily
0 Comments