រុស្ស៊ី​និង​ទួរគី​ឯកភាព​គ្នា​លើ​ព្រំដែន​នៃ​តំបន់​គ្មាន​យោធា​នៅ​ប្រទេស​ស៊ី​រី​

អ្នកការទូត​ជាន់ខ្ពស់​របស់​រុស្ស៊ី​បាន​និយាយ​កាលពី​ថ្ងៃ​សុក្រ​ថា ប្រទេស​រុស្ស៊ី​និង​ទួរគី​បាន​ព្រមព្រៀងគ្នា​លើ​ព្រំដែន​នៃ​តំបន់​គ្មាន​យោធា​នៅ​ភាគ​ខាងជើង​ប្រទេស​ស៊ី​រី​ដែលជា​ផ្នែក​នៃ​កិច្ចព្រមព្រៀង​មួយ​ដែល​អាច​ពិនិត្យមើល​ការវាយប្រហារ​លើ​តំបន់​ឧទ្ទាម​ចុងក្រោយ​នៅ​ខេត្ត អ៊ី​ដ​លី​ប។

រដ្ឋមន្ត្រីការបរទេស​រុស្ស៊ី​លោក Sergei Lavrov បាន​និយាយ​បន្ទាប់ពី​កិច្ចចរចា​ជាមួយ​សម​ភាគី​បូ​ស្នៀ​លោក Igor Crnadak ថា “​យោធា​រុស្ស៊ី​និង​ទួរគី​បាន​ឯកភាពគ្នា​លើ​ព្រំដែន​ដ៏​រឹងមាំ​នៃ​តំបន់​គ្មាន​យោធា”។

ក្រុង​មូ​ស្គូ​បាន​និយាយថា តំបន់​គ្មាន​យោធា​នឹង​ជួយ​បញ្ឈប់​ការវាយប្រហារ​ចេញពី​ខេត្ត​អ៊ី​ដ​លី​ប​លើ​ទីតាំង​កងទ័ព​ស៊ី​រី​និង​មូលដ្ឋាន​យោធា​របស់​រុស្ស៊ី​នៅក្នុង​តំបន់​។​

ប្រធានាធិបតី​រុស្ស៊ី​លោក Vladimir Putin និង​សម​ភាគី​ទួរគី​លោក Recep Tayyip Erdogan បាន​ព្រមព្រៀងគ្នា​បង្កើត​តំបន់​ប្រវែង​ពី​១៥​ទៅ​២០​គីឡូម៉ែត្រ​មួយ​នេះ​កាលពី​ថ្ងៃ​ចន្ទ​បន្ទាប់ពី​កិច្ចពិភាក្សា​រយៈពេល​ជាង​៤​ម៉ោង​។​

សន្តិសុខ​នៅក្នុង​តំបន់​នេះ​ដែល​រួមបញ្ចូល​ទាំង​ផ្នែក​ខ្លះ​នៃ​ខេត្ត អ៊ី​ដ​លី​ប និង​ខេត្ត​ជិតខាង​រួមទាំង​ទីក្រុង អា​ឡេ​ប៊ូ ផងដែរ​នោះ​គឺ​នឹងត្រូវ​ត្រួតពិនិត្យ​ដោយ​កងទ័ព​ទួរគី​និង​យោធា​រុស្ស៊ី​។​

លោក Lavrov បាន​និយាយ​អំពី​តំបន់​នេះ​ថា​“​វា​គឺជា​ជំហាន​មធ្យម​ប៉ុន្តែ​ជា​ជំហាន​ចាំបាច់​”​។ លោក​បន្តថា “​នៅ​ពាក់កណ្តាល​ខែតុលា អ្នក​ប្រយុទ្ធ​ទាំងអស់​នៃ​រណសិរ្ស Al-Nusra ត្រូវតែ​ចាកចេញ​ពី​តំបន់​គ្មាន​យោធា​នេះហើយ​ឧបករណ៍​យោធា​ធុន​ធ្ងន់​ទាំងអស់​ត្រូវតែ​ដកចេញ​ពី​ទីនោះ​”​។​

ប្រទេស​រុស្ស៊ី​គឺជា​សម្ព័ន្ធមិត្ត​ដ៏​សំខាន់​របស់​រដ្ឋាភិបាល​លោក​ប្រធានាធិបតី​ស៊ី​រី Bashar al-Assad ដោយបាន​ជួយ​រដ្ឋាភិបាល​ស៊ី​រី​បង្កើត​ការត្រួតត្រា​លើ​ទឹកដី​ភាគច្រើន​របស់​ប្រទេស​នេះ​បន្ទាប់ពី​ចូលធ្វើ​អន្តរាគមន៍​នៅក្នុង​ជម្លោះ​កាលពី​ឆ្នាំ​២០១៥​។​

ទោះបីជា​យ៉ាងណាក៏ដោយ ប្រទេស​ទួរគី​បាន​គាំទ្រ​អ្នក​ប្រយុទ្ធប្រឆាំង​ដែល​កំពុង​ស្វែងរក​ការទម្លាក់​មេដឹកនាំ​ស៊ី​រី​។ ទួរគី​និយាយថា ការវាយលុក​ទ្រង់ទ្រាយ​ធំ​ប្រឆាំងនឹង​ពួក​ឧទ្ទាម​អាច​បង្ក​ឲ្យ​មានការ​ជម្លៀស​មនុស្ស​ដ៏​ធំ​ឆ្ពោះទៅកាន់​ព្រំដែន​របស់ខ្លួន​៕ AFP

​

Source: Kampuchea Thmey Daily