ភ្នំពេញ ៖ បុរសជនជាតិចិនម្នាក់សង្ស័យស្រវឹងស្រា ទើបបើកឡានម៉ាកBMWស៊េរីទំនើបមួយគ្រឿងជ្រុលទៅបុកក្បាលថ្មរនាំងពុះចែកទ្រូងផ្លូវ បណ្ដាលឲ្យក្រឡាប់កង់ទ្រមេឃខូចខាតស្ទើរទាំងស្រុងហើយអ្នកបើកបររងរបួសធ្ងន់ ត្រូវបានដឹកទៅសង្គ្រោះបន្ទាន់ផងដែរ កាលពីវេលាម៉ោង១២និង៣០នាទីយប់ រំលងអធ្រាត្រ ឈានចូលថ្ងៃទី២២ ខែកញ្ញា ឆ្នាំ២០១៨ ស្ថិតនៅចំណុចមុខអាកាសយានដ្ឋានអន្តរជាតិភ្នំពេញក្នុងសង្កាត់កាកាប២ ខណ្ឌពោធិ៍សែនជ័យ។
តាមប្រភពព័ត៌មានពីកន្លែងកើតហេតុបានឲ្យដឹងថា មុនកើតហេតុគេឃើញបុរសជនជាតិចិនម្នាក់បើករថយន្តស៊េរីទំនើបមួយគ្រឿងម៉ាកBMW ពណ៌ស ពាក់ស្លាកលេខភ្នំពេញ2S-0883 ទិសដៅពីលិចទៅកើតក្នុងល្បឿនយ៉ាងលឿន លុះមកដល់ចំណុចកើតហេតុខាងលើ បានរេចង្កូតមកខាងឆ្វេងដៃជ្រុលទៅបុកក្បាលរនាំងថ្មពុះចែកទ្រូងផ្លូវពេញទំហឹងបណ្តាលរងរបួសធ្ងន់ ត្រូវបានរថយន្តសង្គ្រោះបន្ទាន់ដឹកយកទៅសង្គ្រោះភ្លាមៗ ចំណែកក្បាលនាគពុះចែកទ្រូងផ្លូវបាក់អស់១កង់ រីឯរថយន្តបង្កក្រឡាប់ផ្ងារកង់ទ្រមេឃខូចខាតស្ទើរទាំងស្រុង។
ក្រោយកើតហេតុ សមត្ថកិច្ចមូលដ្ឋាន បានចុះមកដល់បានទំនាក់ទំនងទៅសមត្ថកិច្ចជំនាញចរាចរកក្រុងឲ្យចុះមកវាស់វែងយករថយន្តបង្កទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញរង់ចាំដោះស្រាយគ្នានៅពេលក្រោយ៕
Source: Kampuchea Thmey Daily
0 Comments