រដ្ឋមន្ត្រីមួយចំនួនរបស់លោកស្រីនាយករដ្ឋមន្ត្រី Theresa May នឹងស្នើសុំ “ផែនការ B” លើសំណើ Brexit របស់លោកស្រីនៅសប្តាហ៍ក្រោយនេះ ហើយអាចលាឈប់ប្រសិនបើលោកស្រីមិនផ្លាស់ប្តូរទិសដៅ។ នេះបើយោងតាមកាសែត Telegraph ដែលបានរាយការណ៍កាលពីថ្ងៃសុក្រដោយលើកឡើងពីប្រភពមិនបញ្ចេញឈ្មោះ។
កាសែត Telegraph បានចុះផ្សាយថា ក្រុមរដ្ឋមន្ត្រីនឹងទាមទារឲ្យមានផែនការជំនួសមួយចំពោះសំណើ “Chequers” របស់លោកស្រីនៅក្នុងកិច្ចប្រជុំគណៈរដ្ឋមន្ត្រីនៅថ្ងៃចន្ទ។
ផែនការនោះត្រូវបានទទួលរងការរិះគន់រួចទៅហើយដោយមេដឹកនាំសហភាពអឺរ៉ុបនៅទីក្រុង Salzburg កាលពីដើមសប្តាហ៍នេះដែលជាហេតុជំរុញឲ្យលោកស្រី May ប្រជែងជាមួយនឹងមេដឹកនាំនៃប្លុកនេះដើម្បីសម្រេចផែនការរបស់ខ្លួន។
សមាជិកគាំទ្រ Brexit នៃគណបក្សរបស់លោកស្រីកាលពីថ្ងៃសុក្របានស្វាគមន៍ចំពោះការជំទាស់របស់លោកស្រីប៉ុន្តែសំណើ Chequers ក៏មានការរិះគន់ក្នុងស្រុកជាច្រើនផងដែរ។
កាសែត Telegraph បានចុះផ្សាយថា មានការសង្ស័យថា រដ្ឋមន្ត្រីក្រសួងការងារនិងសោធននិវត្តន៍លោកស្រី Esther McVey អាចដើរចេញពីកិច្ចប្រជុំថ្ងៃចន្ទប្រសិនបើគ្មានសំណើថ្មីត្រូវបានបង្ហាញខណៈរដ្ឋមន្ត្រីក្រសួងអភិវឌ្ឍន៍អន្តរជាតិលោកស្រី Penny Mordaunt ក៏ត្រូវបានគេចាត់ទុកថាជាបេក្ខជនលាលែងពីតំណែងផងដែរ។
នៅព្រឹកថ្ងៃសុក្រ លោកស្រី Mordaunt បាននិយាយថា អាកប្បកិរិយារបស់សហភាពអឺរ៉ុបកំពុងបង្កើនការគាំទ្រនៅចក្រភពអង់គ្លេសសម្រាប់ការចាកចេញពីប្លុកនេះបើទោះបីជាខ្លួនចាកចេញដោយគ្មានកិច្ចព្រមព្រៀងមួយក៏ដោយ។
កាសែត Telegraph បានផ្សាយថា រដ្ឋមន្ត្រីក្រសួងមហាផ្ទៃ Sajid Javid បានគាំទ្រដល់កិច្ចព្រមព្រៀងមួយដែលនឹងធ្វើឲ្យមានភាពកាន់តែងាយស្រួលសម្រាប់ចក្រភពអង់គ្លេសក្នុងការចុះហត្ថលេខាលើកិច្ចព្រមព្រៀងពាណិជ្ជកម្មប៉ុន្តែទំនងជាមិនចុះចេញទេ៕ REUTERS
Source: Kampuchea Thmey Daily
0 Comments