បេក្ខជន​ប្រធានាធិបតី​ប្រេ​ស៊ី​ល​រំពឹងថា​នឹង​ចេញពី​មន្ទីរពេទ្យ​នៅ​ចុងខែ​នេះ

បេក្ខជន​ប្រធានាធិបតី​ប្រេ​ស៊ី​ល​លោក Jair Bolsonaro បាន​និយាយ​នៅក្នុង​វីដេអូ​មួយ​ដែល​ចេញផ្សាយ​កាលពី​ថ្ងៃ​សុក្រ​ថា លោក​រំពឹងថា​នឹង​ចេញពី​មន្ទីរពេទ្យ​មុន​ចុងខែ​នេះ​បន្ទាប់ពី​លោក​ត្រូវបាន​គេ​ចាក់​ចំ​ត្រង់​ពោះ​កាលពី​២​សប្តាហ៍​មុន​។​
​
អតីត​មេបញ្ជាការ​កងទ័ព​អាយុ​៦៣​ឆ្នាំ​រូបនេះ​បាន​និយាយ​នៅក្នុង​វីដេអូ​មួយ​ដែល​បង្ហោះ​លើ Facebook ថា “​អរគុណ​ច្រើន​ចំពោះ​អ្នក​ទាំងអស់គ្នា​។ នៅ​ចុងខែ​នេះ ខ្ញុំ​នឹង​ចេញពី​មន្ទីរពេទ្យ​”​។
​គាត់​បាន​នាំមុខ​ក្នុង​ការស្ទង់មតិ​មុន​ការបោះឆ្នោត​ជុំ​ទី​១​ថ្ងៃទី​៧​ខែតុលា​ចាប់តាំងពី​អតីត​ប្រធានាធិបតី​ឆ្វេងនិយម​ដែល​ជាប់ពន្ធនាគា​រលោក Luiz Inacio Lula da Silva ត្រូវបាន​ហាមឃាត់​ពី​ការ​ឈរឈ្មោះ​ដោយសារតែ​ការកាត់ទោស​ពីបទ​អំពើពុករលួយ​។​
​
លោក Bolsonaro បាន​បន្ថែមថា “​យើង​វិល​ត្រឡប់មក​រួមគ្នា​វិញ​ដើម្បី​ធ្វើ​ឲ្យ​ប្រេ​ស៊ី​ល​ក្លាយជា​ប្រទេស​ដ៏​អស្ចារ្យ​មួយ​”​។
​
លោក Bolsonaro បានទទួល​ការវះកាត់​ចំនួន​ពីរលើក​ហើយ​ស្ថិតនៅ​មន្ទីរពេទ្យ​ចាប់តាំងពី​ថ្ងៃទី ៦​ខែកញ្ញា​មក​នៅពេលដែល​លោក​ត្រូវបាន​ចាក់​ដោយ​សកម្មជន​ឆ្វេងនិយម​ម្នាក់​ខណៈ​កំពុង​ធ្វើ​យុទ្ធនា​ការឃោសនា​នៅ​ភាគខាងត្បូង​ប្រទេស​ប្រេ​ស៊ី​ល​។​
​
នៅក្នុង​ការស្ទង់មតិ​ចុងក្រោយ​បំផុត​របស់ Datafolha ដែល​បានចេញ​ផ្សាយ​កាលពី​ថ្ងៃ​ពុធ​បាន​បង្ហាញថា គាត់​ទទួលបាន​សំឡេងគាំទ្រ​២៨​ភាគរយ​ខណៈ​បេក្ខជន​ជំនួស​លោក Lula និង​ជា​បេក្ខជន​គណបក្ស​កម្មករ​គឺ​លោក Fernando Haddad នៅ​លំដាប់​ទី​២​ដោយ​ទទួលបាន​១៦​ភាគរយ​។​
​
ថ្វីបើ​ពួកគេ​ជា​បេក្ខជន​នាំមុខ​ក៏ដោយ​ប៉ុន្តែ​លោក Bolsonaro និង Haddad គឺជា​អ្នក​ដែល​គេ​ស្អប់​បំផុត​ក្នុងចំណោម​អ្នកប្រកួតប្រជែង​តំណែង​ប្រធានាធិបតី​ទាំង​១៣​នាក់​និង​បាន​បង្កើត​អត្រា​ការជំទាស់​ខ្ពស់បំផុត​៕ AFP

​

Source: Kampuchea Thmey Daily