សៀមរាប ៖ អ្នកបើករថយន្តឡិចស៊ិសRX 300មួយគ្រឿង ទំនងតៃកុងងងុយដេក បានហោះទម្លាក់ខ្លួនចូលទៅត្រាំទឹកលើកជើងទ្រមេឃច្រងាង តែមិនប៉ះពាល់ដល់អ្នកដទៃនោះទេ។ គ្រាន់តែម្ចាស់រថយន្តរបួសស្រាល។
ហេតុការណ៍នេះ បានកើតឡើងនាម៉ោង១១ និង៤០នាទីថ្ងៃទី២៩ខែកញ្ញា លើកំណាត់ផ្លូវជាតិលេខ៦ ក្នុងភូមិអន្លង់ពីរ ឃុំត្រពាំងធំ ស្រុកប្រាសាទបាគង។
មន្ត្រីនគរបាលមូលដ្ឋានដឹងថា រថយន្តគ្រោះថ្នាក់ខាងលើ ម៉ាកឡិចស៊ិសRX 300 ពណ៌សកាំម៉ៃ ពាក់ស្លាកលេខភ្នំពេញ2AN-8832។ បើកបរដោយឈ្មោះតូច គឹមលី ភេទប្រុស អាយុ៦៩ឆ្នាំ មានទីលំនៅភូមិទួលរការ២ សង្កាត់ចាក់អង្រែ ភ្នំពេញ។
បើកក្នុងទិសដៅពីកើតទៅលិច។ មន្ត្រីដដែលបន្តថា តាមការសាកសួរ តៃកុងងងុយដេកងោកមួយភាំង ក៏រ៉េចង្កូត ធ្លាក់ផ្លូវបែបនេះតែម្តង។ ប៉ុន្តែមិនមានគ្រោះថ្នាក់ខ្លួនឯងនិង មិនបង្កគ្រោះថ្នាក់ដល់អ្នកដទៃនោះឡើយ ដោយគ្រាន់តែម្ចាស់រថយន្តរបួសស្រាល។
មន្ត្រីដដែលបញ្ជាក់ថា ដោយគ្រោះថ្នាក់នេះបង្កដោយខ្លួនឯង ហើយមិនបានបង្កដល់អ្នកដទៃ សមត្ថកិច្ចផ្តល់សិទ្ធិឲ្យម្ចាស់រករថយន្តស្ទូច យកទៅជួសជុលដោយ ខ្លួនឯង៕
Source: Kampuchea Thmey Daily
0 Comments