ភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជានឹងអញ្ជើញបំពេញទស្សនកិច្ចផ្លូវរដ្ឋទៅកាន់ប្រទេសនេប៉ាល់នៅចុងខែវិច្ឆិកា និងដើមខែធ្នូ ២០១៨ ខាងមុខ។ កិច្ចព្រមព្រៀងនិងអនុស្សរណៈសំខាន់ៗមួយចំនួនត្រូវបានរំពឹងថា នឹងចុះហត្ថលេខានៅក្នុងឱកាសនេះ។ នេះបើយោងតាមលទ្ធផលនៃជំនួបរវាងនាយករដ្ឋមន្ត្រីប្រទេសទាំងពី នៅបុរីញូវយ៉ក សហរដ្ឋអាមេរិក។
នៅរសៀលថ្ងៃទី២៨ កញ្ញា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានអញ្ជើញជួបពិភាក្សាការងារទ្វេភាគីជាមួយលោក ខាតហ្កា ប្រាសាដ សាម៉ាអូលី (Khadga Prasad Shama Oli) នាយករដ្ឋមន្ត្រីនេប៉ាល់។ ក្នុងជំនួបនេះ សម្តេចតេជោ ហ៊ុន សែន បានសម្តែងនូវក្តីរីករាយដែលមានឱកាសបានជួបពិភាក្សាទ្វេភាគីជាមួយគ្នា លោកនាយករដ្ឋមន្ត្រីសាជាថ្មីនៅសហរដ្ឋអាម៉េរិក។
សម្តេចបានថ្លែងនូវអំណរគុណជូនចំពោះប្រទេសនេប៉ាល់ ដែលបានបញ្ជូនអ្នកអង្កេតការណ៍របស់ខ្លួន ទៅពិនិត្យមើលដំណើរការបោះឆ្នោតសកលនីតិកាលទី៦កាលពីពេលថ្មីៗនេះនៅកម្ពុជាដោយបានវាយតម្លៃខ្ពស់ចំពោះដំណើរការបោះឆ្នោតដែលបានប្រព្រឹត្តិទៅដោយសេរី ត្រឹមត្រូវ យុត្តិធម៌ តាមបែបប្រជាធិបតេយ្យ និងលទ្ធផលគឺទទួលយកបាន។
សម្តេចតេជោនាយករដ្ឋមន្ត្រីបានមានប្រសាសន៍ជម្រាបថា សម្តេចបានទទួលសំបុត្រអញ្ជើញពីលោកនាយករដ្ឋមន្ត្រីដើម្បីអញ្ជើញទៅចូលរួមកិច្ចប្រជុំគណបក្សនយោបាយនិយមកណ្តាល នៅប្រទេសនេប៉ាល់ ក្នុងពេលខាងមុខ ព្រមទាំងបំពេញទស្សនកិច្ចផ្លូវការនៅប្រទេសនេប៉ាល់ ពិសេសអញ្ជើញទៅទស្សនាតំបន់ប្រវត្តិរបស់ព្រះពុទ្ធផងដែរ។
នៅក្នុងជំនួបពិភាក្សានេះ ប្រមុខដឹកនាំរដ្ឋាភិបាលនៃប្រទេសទាំងពីរបានស្នើឲ្យរដ្ឋមន្ត្រីក្រសួងការបរទេសនៃប្រទេសទាំងពីរធ្វើការពិភាក្សាគ្នាជុំវិញការរៀបចំកម្មវិធីនៃដំណើរទស្សនកិច្ចរបស់សម្តេចតេជោទៅកាន់ប្រទេសនេប៉ាល់ ដែលគ្រោងធ្វើឡើងនៅចុងខែវិច្ឆិកា និងដើមខែធ្នូ ២០១៨ ខាងមុខ ជាពិសេសគឺរៀបចំនូវកិច្ចព្រមព្រៀង និងអនុស្សរណៈនៃការយោគយល់គ្នាសម្រាប់ចុះហត្ថលេខាជាមួយគ្នាដែលនឹងមានសេចក្តីប្រកាសរួមនៃដំណើរទស្សនកិច្ច,កិច្ចព្រមព្រៀងលើកលែងទិដ្ឋាការលើលិខិតឆ្លងដែនការទូតនិងផ្លូវការ,កិច្ចព្រមព្រៀងស្តីពីការការពារវិនិយោគអនុស្សរណៈស្តីពីការពិគ្រោះពិភាក្សាខាងនយោបាយរវាងក្រសួងការបរទេសទាំងពីរនិងកិច្ចព្រមព្រៀងស្តីពីការពង្រឹងទំនាក់ទំនងសេដ្ឋកិច្ច នយោបាយ វប្បធម៌ នៃប្រទេសទាំងពីរ។
លោកនាយករដ្ឋមន្ត្រីនេប៉ាល់បានសម្តែងនូវការអបអរសាទរចំពោះគណបក្សប្រជាជនកម្ពុជា ដែលទទួលបានជោគជ័យភ្លូកទឹកភ្លូកដីអំពីការបោះឆ្នោតជ្រើសតាំងតំណាងរាស្ត្រដែលនាំមកនូវស្ថិរភាពនយោបាយដ៏ល្អសម្រាប់កម្ពុជា។ ជាមួយគ្នានេះ លោកនាយករដ្ឋមន្ត្រីបានសន្យាថា នឹងរៀបចំទទួលសម្តេចតេជោឲ្យបានល្អនិងជោគជ័យក្នុងពេលអញ្ជើញទៅបំពេញទស្សនកិច្ចនៅប្រទេសនេប៉ាល់នៅពេលខាងមុខ៕
Source: Kampuchea Thmey Daily
0 Comments