លោក សាន ណារិទ្ធ មានឈ្មោះក្រៅថា Owenវ័យ៣១ឆ្នាំ ដែលកំពុងធ្វើជាគ្រូបង្ហាត់សាលាបាល់ទាត់រាជធានីភ្នំពេញ និងជាអតីតកីឡាករបាល់ទាត់ជម្រើសជាតិកម្ពុជា កំពុងតែមានជំងឺរលាកសួតធ្ងន់ធ្ងរ ហើយពេលនេះកំពុងតែសម្រាកព្យាបាលនៅក្នុងផ្ទះរបស់ខ្លួន។ នេះបើតាមការឲ្យដឹងពី ជិន ជុំ ដែលធ្លាប់ជាអតីតមិត្តរួមក្រុមទាំងក្នុងក្លិបអាជីព និងក្រុមជម្រើសជាតិ នាពេលកន្លងទៅ។
កីឡាករ ជិន ជុំ បាននិយាយថា Owen ត្រូវបានក្រុមគ្រួសារបញ្ជូនទៅមន្ទីរពេទ្យដែរប៉ុន្តែដោយសារការចំណាយច្រើនក្នុងមួយថ្ងៃអស់ ៣០០ដល់៤០០០ដុល្លារក៏យកត្រឡប់មកផ្ទះវិញ។ ពេលយកទៅមន្ទីរពេទ្យគេប្រាប់ថាគាត់មានជំងឺស៊ីសួតអស់មួយចំហៀងហើយគ្រួសារគ្មានលទ្ធភាពនឹងចំណាយនោះទេ។ ប្រភពព័ត៌មានបានបន្តថា៖«គេលាក់រឿងជំងឺរបស់គេ រហូតដល់ធ្ងន់ធ្ងរបែបនេះ។ ចំណែកគ្រួសារគេ ខ្វះខាតណាស់ ហើយឥឡូវគេនៅផ្ទះព្រោះអត់មានលុយមើលជំងឺខ្លួន ដោយសារចំណាយច្រើនពេក»។
សហព័ន្ធកីឡាបាល់ទាត់កម្ពុជា កាលពីឆ្នាំ២០១៧ បានដាក់គោលដៅបង្កើតសាលាបាល់ទាត់ឲ្យបាន២៥រាជធានី-ខេត្ត ដើម្បីស្វែងរកកីឡាករដែលមានទេពកោសល្យ ត្រៀមរៀបចំទទួលការប្រកួតក្នុងព្រឹត្តិការណ៍កីឡាស៊ីហ្គេមឆ្នាំ២០២៣ ដែលកម្ពុជាធ្វើជាម្ចាស់ផ្ទះ។ សាលានៅតាមបណ្តាខេត្តនេះមានកម្មវិធីហ្វឹកហាត់ដូចសាលាបាល់ទាត់ជាតិបាទី ដែរតែខុសត្រង់រឿងស្នាក់នៅ និងហូបចុក តែប៉ុណ្ណោះ។ ក្រោយពេលសម្រាកពីបាល់ទាត់ សាន ណារិទ្ធិ ក៏ទទួលការងារជាគ្រូបង្វឹកប្រចាំសាលាបាល់ទាត់តំណាងឱ្យរាជធានីភ្នំពេញ តែម្តង។
លោក សាន ណារិទ្ធិ ដែលគេដឹងថាជាអតីតកីឡាករឆ្នើមក្នុងក្រុមជម្រើសជាតិកាលពីជាង១០ឆ្នាំ ហើយលោកធ្លាប់ប្រកបអាជីពនៅក្លិបខេមរាកីឡា ព្រះខ័នរាជស្វាយរៀង ភ្នំពេញក្រោន ណាហ្គាវើល Albirex Niigata PP អាស៊ីអឺរ៉ុប និងវេស្ទើនភ្នំពេញ ជាដើម។ បុរសវ័យ៣១ឆ្នាំរូបនេះធ្លាប់លើកពានរង្វាន់លីគកំពូលកម្ពុជា នៅឆ្នាំ២០១១ និងជើងឯករងពានរង្វាន់ AFC President's Cup 2011 ជាមួយក្រុមភ្នំពេញក្រោន និងនៅឆ្នាំ២០១៣ ឈ្នះជើងឯកពានរង្វាន់សម្តេចតេជោ ហ៊ុន សែន ជាមួយណាហ្គាវើលផងដែរ៕
Source: Kampuchea Thmey Daily
0 Comments