ភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជាបានថ្លែងគាំទ្រយ៉ាងពេញទំហឹងចំពោះភាពជាអ្នកដឹកនាំជាសកលរបស់អង្គការសហប្រជាជាតិ និង ប្តេជ្ញាអនុវត្តន៍នូវការទទួលខុសត្រូវរួមក្នុងកិច្ចប្រឹងប្រែងកសាងសង្គមមួយនៃមនុស្សជាតិដែលប្រកបដោយសន្តិភាព សមធម៌ និង មានការ អភិវឌ្ឍប្រកបដោយចីរភាព និងបរិយាប័ន្ន។
សម្តេចតេជោ ហ៊ុន សែន បានបង្ហាញការគាំទ្របែបនេះនៅក្នុងសេចក្តីថ្លែងការណ៍ដែលបានថ្លែងក្នុងកិច្ចប្រជុំទូទៅនៃមហាសន្និបាតអង្គការប្រជាជាតិលើកទី៧៣ នៅទីស្នាក់ការអង្គការសហប្រជាជាតិនាវេលាម៉ោងជាង១រំលងអធ្រាត្រថ្ងៃទី២៩ ខែកញ្ញា ឆ្នាំ២០១៨នេះ ម៉ោងនៅកម្ពុជា ដែលត្រូវនឹងម៉ោងជិត២រសៀលថ្ងៃទី២៨ ខែកញ្ញា ម៉ោងនៅទីក្រុងញូវយ៉ក សហរដ្ឋអាមេរិក។
សម្តេចតេជោ ហ៊ុន សែន នាយករដ្ឋមន្ត្រីបានបន្តថា ពិភពលោកកំពុងជួបបញ្ហាអស្ថិរភាពយ៉ាងធ្ងន់ធ្ងរ ការគំរាមកំហែងចំពោះសន្តិភាពក៏កើតមានយ៉ាងច្រើនសណ្ឋាន គឺច្រើនជាងអ្វីដែលយើងធ្លាប់បានឃើញក្នុងរយៈពេល ២៥ ឆ្នាំ កន្លងទៅនេះ។
សម្តេចបន្តទៀតថា យើងកំពុងរស់នៅក្នុងពិភពលោកមួយដែលងាយនិងប្រែប្រួល,មិនអាចព្យាករណ៍បាន ជាមួយការផ្លាស់ប្តូរយ៉ាងស្មុគស្មាញនិងការប្រឈមកាន់តែធំពីគ្រប់មុខព្រួញ រាប់ចាប់ពីការកើនឡើងនៃជម្លោះហិង្សាដែលអូសបន្លាយ និង វិបត្តិមនុស្សធម៌ដែលមិនធ្លាប់មានពីមុនមក។
សម្តេចតេជោនាយករដ្ឋមន្ត្រីក៏បានបង្ហាញអំពីការបារម្ភយ៉ាងខ្លាំង ចំពោះភាពតានតឹងដែលបង្កឡើងដោយមហាអំណាចពិភពលោក លំដាប់ទី១ នៅក្នុងរង្វង់នៃទំនាក់ទំនងការទូត និង ជម្លោះផ្ទៃក្នុងជា ច្រើនកន្លែងដែលកំពុងកើតឡើងដោយសារការជ្រៀតជ្រែកពីសំណាក់មហាអំណាចនេះ។ យើងក៏មានការ ព្រួយបារម្ភផងដែរ ចំពោះការសម្រេចចិត្តយ៉ាងតក់ក្រហល់របស់មហាអំណាចនេះ ក្នុងការដកខ្លួនចេញពីកិច្ចព្រមព្រៀងអន្តរជាតិនានាដ៏សំខាន់ជាសាកល ដែលជាការគំរាមកំហែងដល់ស្នូលនៃភាពស្របច្បាប់នៅក្នុងសណ្តាប់ធ្នាប់គតិយុត្តិអន្តរជាតិ។
សកម្មភាពជាឯកតោភាគីទាំងនេះ បាននឹងកំពុងធ្វើឲ្យចុះខ្សោយ នូវទំនាក់ទំនងរវាងបណ្តារដ្ឋ និង បង្កភាពតានតឹងនៅក្នុងសហគមន៍អន្តរជាតិ។ ប៉ុន្តែអ្វីដែលបង្កសម្ពាធធ្ងន់ធ្ងរបំផុតនោះគឺការវាយប្រហារដោយត្រង់ទៅលើ«ពហុភាគីនិយម»។
សម្តេចតេជោនាយករដ្ឋមន្ត្រីបានបន្តថា ប្រាកដណាស់នៅក្នុងពិភពសាកលភាវូបនីយកម្មរបស់យើង, អ្វីៗគ្រប់យ៉ាងត្រូវបានផ្សារភ្ជាប់គ្នា។ ប្រសិនបើយើងចាប់ផ្តើមប្រកាន់គោលនយោបាយគាំពារនិយម ឯកតោភាគីនិយម និង ធ្វើសង្គ្រាមពាណិជ្ជកម្ម ,នោះយើងនិងបិទទ្វារលែងឲ្យមានកាលានុវត្តភាពពាណិជ្ជកម្ម និង ការវិនិយោគ ដែលធ្លាប់បាននាំមកនូវវិបុលភាពសម្រាប់ប្រទេសយើង ,ទាំងតូច ទាំងធំ ជាច្រើនសតវត្សរ៍មកហើយ។
ជាលទ្ធផលចុងក្រោយយើងទាំងអស់គ្នាប្រាកដជានិងកាន់តែក្រ,កំណើនសេដ្ឋកិច្ច របស់យើងនិងធ្លាក់ចុះ ,ធនធានហិរញ្ញវត្ថុរបស់យើងនិងថមថយ,ហើយលទ្ធភាពក្នុងការសម្រេចគោលដៅ អភិវឌ្ឍន៍ប្រកបដោយចីរភាព ក៏ដូចជាក្នុងការដោះស្រាយបញ្ហាប្រឈមបង្កឡើងដោយការប្រែប្រួលអាកាសធាតុ នឹងទទួលរងផលប៉ះពាល់យ៉ាងធ្ងន់ធ្ងរ។ កត្តាទាំងអស់នេះនឹងធ្វើឲ្យប្រទេសក្រីក្រទន់ខ្សោយ ស្ថិតក្នុងស្ថានភាពក្រីក្រអូសបន្លាយកាន់តែយូរ ហើយប្រទេសទាំងក៏ងាយផលប៉ះពាល់ពីមនោគមវិជ្ជាដ៏គ្រោះថ្នាក់នៃភេរវកម្ម លទ្ធិជ្រុលនិយម និង ជម្លោះតំបន់។
សម្តេចតេជោ ហ៊ុន សែន បានបន្តថា កម្ពុជា ក្នុងនាមជាប្រទេសដែលមានសេដ្ឋកិច្ចតូច,ជឿលើអត្ថប្រយោជន៍នៃកិច្ចសហប្រតិបត្តិការអន្តរជាតិ ឈរលើវិធានគតិយុត្តិ។ សម្តេចតេជោបានបន្តថា ពិតមែន ណាស់យើងបានរីកចម្រើនដោយសារសាកលភាវូបនីយកម្ម។ ហេតុនេះហើយបានជាយើងជឿជាក់ថាពាណិជ្ជកម្មពិភពលោកមិនគួរត្រូវរាំងស្ទះដោយសារការកំណត់ពន្ធជាឯកតោភាគីនោះទេ ,ប៉ុន្តែគួរត្រូវបានលើកតម្កើងនិងគាំទ្រតាមរយៈការប្រកាន់គោលនយោបាយសមស្របព្រមទាំងការផ្តល់ក្របខណ្ឌអនុគ្រោះ ពិសេសដល់ប្រទេសកំពុងអភិវឌ្ឍន៍ ។ ស្ថិរភាពនិងការធ្វើពិពិធកម្មលើវិស័យហិរញ្ញវត្ថុ គួរត្រូវបានលើកកម្ពស់ដើម្បីជំរុញនវានុវត្តភាព និង ការអភិវឌ្ឍ។ សរុបមកយើងត្រូវរួមគ្នាថែរក្សានិងពង្រឹងរបប«ពហុភាគី និយម»។
សម្តេចតេជោនាយករដ្ឋមន្ត្រីបានបន្តថា ជាការពិតសន្តិភាពដែលគ្មានការអភិវឌ្ឍមិនអាចស្ថិតស្ថេរបានឡើយ។ ក្នុងបរិបទនេះ “គោលដៅអភិវឌ្ឍន៍ប្រកបដោយចីរភាព” របស់អង្គការសហប្រជាជាតិមានតួនាទីសំខាន់ណាស់ក្នុងការនាំផ្លូវយើងឆ្ពោះទៅរកវិបុលភាពជូនប្រជាជន។ កម្ពុជាយល់ថា គោលដៅអភិវឌ្ឍន៍ប្រកបដោយចីរភាពគឺជាកាលានុវត្តភាពដ៏សំខាន់សម្រាប់កិច្ចប្រឹងប្រែងកាត់បន្ថយភាពក្រីក្រ នឹង ការសម្រេចបាននូវការអភិវឌ្ឍប្រកបដោយចីរភាពនិងមានបរិយាបន្ន។ រាជរដ្ឋាភិបាលកម្ពុជានិងអនុម័តក្នុងពេលដ៏ឆាប់ខាងមុខនេះនូវ“គោលដៅអភិវឌ្ឍន៍ប្រកបដោយចីរភាពកម្ពុជា”ដែលត្រូវបានធ្វើជាតូបនីយកម្មពេញលេញហើយយើងនឹងប្រើប្រាស់គោលដៅទាំងនេះដើម្បីតម្រង់ទិសគោលនយោបាយនិងផែនការរយៈពេលមធ្យមនិងរយៈពេលវែងរបស់កម្ពុជា។
សម្តេចតេជោបន្តថា បន្ថែមលើនេះការទប់ស្កាត់ជម្លោះគឺជាបុរេលក្ខខណ្ឌសម្រាប់សន្តិភាពចីរភាព។ កងរក្សាសន្តិភាពអង្គការសហប្រជាជាតិមានតួនាទីដ៏សំខាន់ពិសេសនៃជួរមុខក្នុងកិច្ចប្រឹងប្រែងនេះ។ ហេតុដូច្នេះហើយទើបកម្ពុជាស្វាគមន៍យ៉ាងខ្លាំងក្លាចំពោះទស្សនវិស័យរបស់លោកអគ្គលេខាធិការអង្គការសហប្រជាជាតិអង្គការ អាន់តូនីញ៉ូ ហ្គូតេរែស ស្ដីពីការកសាងនិងរក្សាសន្តិភាពជាពិសេសលើការបន្តផ្ដោតការយកចិត្តទុកដាក់ទប់ស្កាត់ជម្លោះ។កម្ពុជាគឺជាអ្នកគាំទ្រប្រកបដោយសង្គតភាពចំពោះនិមាបន្នកម្មសន្តិភាពនិងសន្តិសុខរបស់អង្គការសហប្រជាជាតិ។
ជាក់ស្តែងអស់រយៈពេល ១២ ឆ្នាំមកនេះដែលកម្ពុជាបានចូលរួមបញ្ជូនកងកម្លាំងមួកខៀវរាប់ពាន់នាក់ទៅបំពេញប្រតិបត្តិការរក្សាសន្តិភាពក្រោមឆត្រអង្គការសហប្រជាជាតិ។ ក៏ប៉ុន្តែការរក្សាសន្តិភាពកំពុងជួបប្រទះនឹងបញ្ហាប្រឈមដែលពុំធ្លាប់មានពីមុនមកដោយតួអង្គមិនមែនរដ្ឋបានបង្កសង្គ្រាមឧទានវាយប្រហារមកលើកងកម្លាំងរក្សាសន្តិភាពរបស់យើងបណ្ដាលឲ្យបាត់បង់ជីវិតនិងពិការជាច្រើននាក់។ យើងជំពាក់គុណធំដ៏ធំធេងចំពោះពលីកម្មរបស់វីរបុរសថែរក្សាសន្តិភាពនៃអង្គការសហប្រជាជាតិទាំងអស់នេះ។ យ៉ាងណាក៏ដោយមោទនភាពនិងពលីកម្មរបស់ពួកគេ ពុំបានកែប្រែនូវការប្ដេជ្ញាចិត្តរបស់យើងក្នុងការបន្តរួមចំណែកដល់បុព្វហេតុដ៏ឧត្តុង្គឧត្តមនេះឡើយ៕
Source: Kampuchea Thmey Daily
0 Comments