ក្រុមបាល់ទាត់សូលទីឡូអង្គរ ត្រូវប៉ះក្រុមអង្គរថាយហ្គឺរ ហើយក្រុមបឹងកេត ត្រូវជួបក្រុមភ្នំពេញក្រោននិងក្រុមព្រះខ័នរាជស្វាយរៀង ទទួលក្រុមវិសាខា ក្នុងសប្ដាហ៍ចុងក្រោយពោលគឺសប្ដាហ៍ទី២២នៃពានរង្វាន់លីគកំពូលកម្ពុជា (Metfone Cambodian League 2018) ក្នុងថ្ងៃអាទិត្យ ទី៣០ ខែកញ្ញា ឆ្នាំ២០១៨នេះ។
*សូលទីឡូអង្គរ ប៉ះអង្គរថាយហ្គឺរ
ក្រុមដែលមានមូលដ្ឋាននៅខេត្តសៀមរាប ចំនួន២ត្រៀមប្រកួតគ្នា នោះគឺក្រុមបាល់ទាត់សូលទីឡូអង្គរ ត្រៀមប៉ះក្រុមអង្គរថាយហ្គឺរ នៅវេលាម៉ោង៣និង៣០នាទីរសៀលលើទីលានកីឡដ្ឋានខេត្តសៀមរាប។ ប្រកួតនេះមានផ្សាយផ្ទាល់តាមហ្វេសប៊ុករបស់កម្ពុជាថ្មី ផងដែរ។ ក្រុមសូលទីឡូអង្គរ ក្រោមការដឹកនាំរបស់គ្រូបង្វឹកជនជាតិជប៉ុន Yuki Matsuda បានកក់កៅអីចំណាត់ថ្នាក់លេខ១០ដោយស្វ័យប្រវត្តិ នៅរដូវកាលនេះ។ គ្រូបង្វឹករូបនេះទើបតែបញ្ចប់វគ្គសិក្សាគ្រូបង្វឹកបាល់ទាត់កម្រិត AFC A License នៅប្រទេសសិង្ហបុរី កាលពីដើមឆ្នាំ។ ២១ប្រកួតកន្លងមកក្រុមសូលទីឡូអង្គរ ឈ្នះបាន៥លើក ស្មើគ្នា៤លើកនិងចាញ់ដល់ទៅ១២លើក។
ចំណែកក្រុមអង្គរថាយហ្គឺរ ឆ្លងកាត់ប្រកួត២១លើកមក ឈ្នះបាន៧ លើកស្មើគ្នាបាន៦លើក និងចាញ់៨លើកមាន២៧ពិន្ទុ។ ក្រុមនេះកំពុងតែដឹកនាំដោយលោក Oriol Mahedano ដែលជាគ្រូបង្វឹកសញ្ជាតិអេស្ប៉ាញ កាន់អាជ្ញាប័ណ្ណគ្រូបង្វឹកកម្រិត UEFA A licence។ លោក Akihiro Kato ដែលជាប្រធានក្លិបបានដាក់គោលដៅយកកៅអីនៅតំបន់ក្រុមខ្លាំងទាំង៤ប្រចាំរដូវកាល (Top4) នៅឆ្នាំនេះ ខណៈនៅឆ្នាំ២០២០ ក្លិបចង់ប្រជែងយកជើងឯក។
*បឹងកេត ជួបភ្នំពេញក្រោន
ក្រុមបឹងកេតអែហ្វស៊ី ជួបក្រុមភ្នំពេញក្រោន នៅវេលាម៉ោង៦ល្ងាចលើទីលានពហុកីឡដ្ឋានជាតិ ព្រមទាំងមានផ្សាយផ្ទាល់តាមយូធូបរបស់ CNCC។ ក្រុមបឹងកេត បានត្រឹមជើងឯករងប៉ុណ្ណោះ នៅរដូវកាលនេះ ក្រោយឆ្លងកាត់២១ប្រកួតមកនេះឈ្នះរហូតដល់១៥ប្រកួត ស្មើគ្នា៤ប្រកួតនិងចាញ់២ប្រកួតមាន៤៩ពិន្ទុ។ លោក ហៅ សុជាតិ ដែលជាគ្រូបង្វឹកកំពុងតែឈឺក្បាលរឿងកីឡាកររបួស ខណៈរូបលោកទើបតែត្រូវពិន័យមិនឱ្យចូលទីលានរយៈពេល១ខែ។
ចំណែកក្រុមភ្នំពេញក្រោន ក្រោមការដឹកនាំរបស់លោក Sean Sainsbury ជាគ្រូបង្វឹកជនជាតិអង់គ្លេស សំបូរទៅដោយកីឡាករវ័យក្មេងច្រើនអមដោយកីឡាករបរទេសដែលមានសមត្ថភាព។ ក្រុមនេះអស់ឱកាសក្នុងការប្រជែងយកពាននៅរដូវកាលនេះហើយ តែនៅឱកាសរក្សាកៅអីចំណាត់ថ្នាក់លេខ៥ ដោយត្រូវប្រជែងជាមួយក្រុមព្រះខ័នរាជស្វាយរៀង។ ប្រកួតបាន២១លើកមកនេះភ្នំពេញក្រោន ឈរចំណាត់ថ្នាក់លេខ៥ មាន៣៣ពិន្ទុក្រោយឈ្នះបាន១០លើក ស្មើ៣លើក និងចាញ់៨លើក។
*ព្រះខ័នរាជស្វាយរៀង ជួបវិសាខា
ក្រុមព្រះខ័នរាជស្វាយរៀង ត្រូវប៉ះក្រុមវិសាខា នៅវេលាម៉ោង៦ល្ងាចលើទីលានកីឡដ្ឋានខេត្តស្វាយរៀង ព្រមទាំងមានផ្សាយផ្ទាល់តាមប៉ុស្តិ៍ BTV News ផងដែរ។ ក្រុមព្រះខ័នរាជស្វាយរៀង មួយរយៈចុងក្រោយនេះហាក់ជួបបញ្ហារឿងកីឡាកររបួសនិងកីឡាករសំខាន់ៗជាប់ពិន័យពីសំណាក់គណៈកម្មការវិន័យរបស់សហព័ន្ធកីឡាបាល់ទាត់កម្ពុជា។ លោក Conor Nestor គ្រូបង្គោលក្លិបព្រះខ័នរាជស្វាយរៀង សរសើរកូនក្រុមក្នុងប្រកួតចុងក្រោយដែលធ្វើបានល្អ។ យ៉ាងណាលោកបានដោះដូរកីឡាករគួរឲ្យភ្ញាក់ផ្អើលមួយដើម្បីត្រៀមជើងទី២នេះ។ ជ័យជម្នះនេះគឺចាំបាច់សម្រាប់ព្រះខ័នរាជស្វាយរៀង ក្នុងការរក្សាចំណាត់ថ្នាក់ល្អមួយប្រចាំរដូវកាល។
ចំណែកក្រុមវិសាខា វិញបានរក្សាកៅអីចំណាត់ថ្នាក់លេខ៣ដោយស្វ័យប្រវត្តិទៅហើយ ក្រោយប្រកួតបាន២១លើកឈ្នះបាន១៤លើក ស្មើគ្នាបាន៣លើកនិងចាញ់៤លើក។ លោក ហុក សុជីវ័ន្ត គ្រូបង្វឹករបស់វិសាខា បានរំពឹងថាកូនក្រុមអាចបន្តរកបានជ័យជម្នះថែមទៀតទោះបីជាអស់ឱកាសប្រជែងកៅអីកំពូលតារាងក៏ដោយ៕
Source: Kampuchea Thmey Daily
0 Comments