ក្លិបបាល់ទាត់សូលទីឡូអង្គរ សមាជិកក្នុងពានរង្វាន់លីគកំពូលកម្ពុជា (Metfone Cambodian League 2018) បានប្រកាសផ្ទេរយកអ្នកចាំទី យុគ្គ អៈអារី ពីក្លិបជើងឯករងឆ្នាំចាស់បឹងកេតអង្គរ នៅថ្ងៃអង្គារ ទី១៣ វិច្ឆិកា សប្ដាហ៍នេះ ពោលគឺដើម្បីបន្ថែមសមាជិកត្រៀមរៀបចំក្រុមទទួលរដូវកាលថ្មី២០១៩ ខាងមុខ។
អតីតសមាជិកក្លិបព្រែកប្រាកីឡា, ភ្នំពេញក្រោន និងណាហ្គាវើលខាងលើ គឺជាកីឡាករថ្មីទី៣របស់ក្រុមសូលទីឡូអង្គរ ដែលមានមូលដ្ឋាននៅខេត្តសៀមរាប បន្ទាប់ពីការទៅដល់ពីសំណាក់អតីតយុវជនព្រះខ័នរាជស្វាយរៀង ២រូបគឺ ប្រាក់ សុវណ្ណពិសិដ្ឋ ជាកូនបង្កើតរបស់លោក ប្រាក់ សុវណ្ណារ៉ា និងកីឡាករ លី សារ័ត្ន កាលពីដើមខែវិច្ឆិកា កន្លងទៅ។
គេចាំថាកីឡាករគួរដឹងដែរថា យូក អះអារី បានផ្ដើមអាជីពនៅព្រែកប្រាកីឡា នៅឆ្នាំ២០០៩ មុនផ្លាស់ទៅចូលរួមជាមួយភ្នំពេញក្រោន ពីឆ្នាំ២០១១ ក្រោយក្លិបចាស់របស់ខ្លួនធ្លាក់ទៅលេងក្នុងពានរង្វាន់«ក១» នៅឆ្នាំជាមួយគ្នានោះ។ ក្រោយមកទៀតរូបគេបានសម្រេចចិត្តផ្ទេរទៅលេងឲ្យក្លិបណាហ្គាវើលរដូវកាល២០១៦ និងចុងក្រោយនៅជើងទី២ឆ្នាំ២០១៨ កន្លងទៅរូបគេបានបន្តទៅកាន់ក្លិបបឹងកេត។
សូមបញ្ជាក់ថា ក្រុមសូលទីឡូអង្គរ ក្រោមការដឹកនាំរបស់លោក Yuki Matsuda បានចំណាត់ថ្នាក់លេខ១០ ក្នុងចំណោមសមាជិកទាំង១២ក្នុងពានរង្វាន់លីគកំពូលកម្ពុជា រដូវកាលឆ្នាំ២០១៨នេះ ក្រោយរកបានជ័យជម្នះចំនួន៥ លើក ហើយធ្លាប់ស្មើ៥ លើកនិងចាញ់១២ លើកមាន២០ពិន្ទុ ដែលអាចបន្តក្នុងលីគកំពូលរដូវកាលបន្ទាប់ទៀត។ ចំណែកក្នុងពានរង្វាន់សម្តេចតេជោ ហ៊ុន សែន វិញក្រុមសូលទីឡូអង្គរ បានធ្លាក់ត្រឹមវគ្គ១៦ក្រុមចុងក្រោយ បន្ទាប់ពីចាញ់គូប្រជែងក្នុងខេត្តតែមួយគឺអង្គរថាយហ្គឺរ ដោយលទ្ធផលទាំង២ជើង៣ទល់២៕
Source: Kampuchea Thmey Daily
0 Comments