ភ្នំពេញ ៖ ក្រសួងអប់រំយុវជននិងកីឡារួមជាមួយ សហភាពអឺរ៉ុប (EU) ទីភ្នាក់ងារសហប្រតិបត្តិការ អភិវឌ្ឍន៍អន្តរជាតិស៊ុយអែត (SIDA) និងទីភ្នាក់ងារអាមេរិកដើម្បីអភិវឌ្ឍន៍អន្តរជាតិ(USADIA) ភាពជាដៃគូសកលសម្រាប់ការអប់រំ (GPE) អង្គការយូនីសេហ្វ បានប្រកាសចាប់ផ្ដើម អនុវត្តមូលនិធិភាពជាដៃគូ សម្រាប់អភិវឌ្ឍសមត្ថភាពវិស័យអប់រំហៅកាត់ថា CDPF ឆ្នាំ២០១៨-២០២១ ក្នុងគោលបំណងដើម្បីពង្រឹងវិស័យអប់រំក្នុងប្រទេសកម្ពុជាឲ្យកាន់តែប្រសើរ។
ថ្លែងនៅក្នុងពិធីផ្សព្វផ្សាយគម្រោងមូលនិធិភាពជាដៃគូសម្រាប់អភិវឌ្ឍសមត្ថភាពវិស័យអប់រំដំណាក់កាលទីបីកាលពីថ្ងៃទី១៤ខែវិច្ឆិកាលោក បណ្ឌិតសភាចារ្យ ណាត ប៊ុនរឿន រដ្ឋលេខាធិការក្រសួងអប់រំយុវជន និងកីឡា បានមានប្រសាសន៍ថា សម្រាប់ជំហានទី៣នេះ រៀបចំឡើងផ្អែកលើបទពិសោធន៍បានមកពីជំហានទី១និងទី២ ដើម្បីពង្រឹងសមត្ថភាពរបស់ក្រសួង ក្នុងការធ្វើផែនការ ការពិនិត្យតាមដាន ការគ្រប់គ្រងហិរញ្ញវត្ថុសាធារណៈ ការអនុវត្តគោលនយោបាយ និងការគ្រប់គ្រង កំណែទម្រង់កាន់តែប្រសើរឡើង។
លោករដ្ឋលេខាធិការបន្តថា ជាងនេះទៅទៀតពង្រឹងសមត្ថភាពថ្នាក់រាជធានី ខេត្តនិងក្រុង ស្រុក នឹងបន្តអភិវឌ្ឍដើម្បីរៀបចំផែនការគ្រប់គ្រង តាមដាន និងធានាឲ្យបាននូវប្រសិទ្ធភាព នៃការអនុវត្តគោលនយោបាយ ក្នុងការផ្តល់សេវាអប់រំឲ្យបានល្អ ព្រមទាំងពង្រឹងសមត្ថភាពសាលារៀន និងគណនេយ្យភាព ទាក់ទងនឹងការធ្វើផែនការ ហិរញ្ញវត្ថុ និងការគ្រប់គ្រង ឲ្យប្រសើរឡើង ជាប្រយោជន៍ដល់កុមារកម្ពុជា ដែលត្រូវបានរំពឹងថានឹងទទួលបានការអប់រំប្រកបដោយគុណភាពនិងសមធម៌។
លោក ចច អ៊ីហ្គើ (George Edger) ឯកអគ្គរាជទូត សហភាពអឺរ៉ុបប្រចាំនៅកម្ពុជាបានមានប្រសាសន៍ថា ការបញ្ជូលថវិការួមចំណែកពី ភាពជាដៃគូសកលសម្រាប់ការអប់រំ និងយូនីសេហ្វ ក្នុងដំណាក់ថ្មីនេះ គឺជាសញ្ញាបង្ហាញពីការបំពេញការងារយ៉ាងល្អរបស់កម្មវិធី CDPF និងការទទួលស្គាល់ពីការប្រើប្រាស់បាននៃប្រព័ន្ធរបស់ប្រទេសកម្ពុជាដើម្បីសម្រេចលទ្ធផល និងបង្កើនកិច្ចសហការរួមគ្នា និងការធ្វើសុខដុមនីយកម្មសកម្មភាពនានា ឱ្យមានទិសដៅស្របគ្នាក្នុងវិស័យអប់រំ។
លោកមានជំនឿលើវិធីសាស្ត្រដែលក្រសួងអប់រំ និងដៃគូអភិវឌ្ឍសម្រេចប្រើប្រាស់ ក្នុងការអភិវឌ្ឍសមត្ថភាព និងអនុវត្តកំណែទម្រង់នានា ដែលផ្តល់អត្ថប្រយោជន៍ដល់មន្ត្រីគ្រប់ជាន់ថ្នាក់ រាប់បញ្ចូលទាំងសាលារៀនផងដែរ។
សូមបញ្ជាក់ថា មូលនិធិភាពជាដៃគូសម្រាប់អភិវឌ្ឍវិស័យអប់រំ (CDPF) បានចាប់ផ្ដើមនៅក្នុងឆ្នាំ២០១១ ហើយបានឈានដល់ដំណាក់កាលទីបី ក្នុងឆ្នាំ២០១៨នេះ ដោយមានថវិកាសរុបចំនួន ២៧លានដុល្លារ សម្រាប់អនុវត្តក្នុងរយៈពេល៤ឆ្នាំខាងមុខ នៅថ្នាក់ជាតិ ថ្នាក់រាជធានី ថ្នាក់ស្រុកនិងនៅតាមសាលា ដើម្បីគាំទ្រដល់ការអនុវត្តផែនការ ស្តីពីការអភិវឌ្ឍន៍សមត្ថភាពក្រសួង សម្រាប់ការអនុវត្តផែនការយុទ្ធសាស្ត្រវិស័យអប់រំ៕
Source: Kampuchea Thmey Daily
0 Comments