ភ្នំពេញ ៖ លោកវេជ្ជបណ្ឌិត ហ៊ុយ រ៉េកុល ប្រធានមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ា ស៊ីតសាស្ត្រ និងបាណកសាស្ត្រ បានបញ្ជាក់ថា គិតចាប់ពីខែមករា មកទល់ចុងខែវិច្ឆិកានេះ ករណីជំងឺគ្រុនចាញ់ មានចំនួន៣ម៉ឺនករណី ក្នុងនោះករណីធ្ងន់១ម៉ឺនករណី និងគ្មានករណីស្លាប់នោះទេ។
ថ្លែងនៅក្នុងកិច្ចប្រជុំប្រឹក្សាយោបល់លើវឌ្ឍនភាពការងាររបស់ក្រុមការងារ ពិសេសថ្នាក់ខេត្ត សម្រាប់លុបបំបាត់ ជំងឺគ្រុនចាញ់ (កពខ.លគ) និងយុទ្ធសាស្ត្រលុបបំបាត់ជំងឺគ្រុនចាញ់ កាលពីថ្ងៃទី២៨ ខែវិច្ឆិកា ឆ្នាំ២០១៨ នៅទីស្ដីការក្រសួងសុខាភិបាលលោកសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល បានសាទរចំពោះលទ្ធផលនេះ តែបានជំរុញឲ្យដៃគូពាក់ព័ន្ធត្រូវបន្តការប្ដេជ្ញារួមគ្នាក្នុងការលុបបំបាត់ជំងឺគ្រុនចាញ់គ្រប់ប្រភេទនៅកម្ពុជា ត្រឹមឆ្នាំ២០២៥ និងបន្តរក្សា ឲ្យបាននូវអត្រាមរណភាពសូន្យជូនប្រជាពលរដ្ឋ។
លោកសាស្ត្រាចារ្យ បានឲ្យដឹងថា «ដើម្បីសម្រេចគោលដៅ ក្នុងការលុបបំបាត់ជំងឺគ្រុនចាញ់ប្រភេទហ្វាស៊ីប៉ារ៉ូម នៅឆ្នាំខាងមុខ និងកាត់បន្ថយជំងឺគ្រុនចាញ់ គ្រប់ប្រភេទត្រឹមឆ្នាំ២០២៥ ក្រសួងក៏បានបើកិច្ចប្រជុំនៅថ្ងៃនេះ ដើម្បីជំរុញបន្ថែមទៀត ក្នុងការលុបជំងឺគ្រុនចាញ់នៅកម្ពុជា ដែលយើងជួបជុំ ក្រុមការងារទទួលខុសត្រូវថ្នាក់មូលដ្ឋាន រួមទាំងគណៈអភិបាលខេត្ដ រួមទាំងដៃគូអភិវឌ្ឍន៍ ដែលទទួលខុសត្រូវរួមគ្នា ចែករំលែក និងស្វែងរកចំណុចខ្លាំង ដែលទទួលជោគជ័យ និងចំណុចខ្សោយដែលយើងត្រូវបំពេញបន្ថែម»។
លោករដ្ឋមន្ត្រីបានបន្ដថា លទ្ធផលដ៏ល្អនេះ គឺដោយសារតែនៅក្នុងឆ្នាំ២០១៨នេះ យើងបានប្រើប្រាស់មុងជ្រលក់ថ្នាំចំនួន៣លានមុង ចែកជូនទៅដល់ប្រជាពលរដ្ឋ ដែលរស់នៅក្នុងតំបន់ងាយរងគ្រោះដោយជំងឺគ្រុនចាញ់ ពិសេសប្រជាពលរដ្ឋ ចំណាកស្រុក ទៅរស់តំបន់ព្រៃភ្នំ ដោយមិនដឹងពីទីតាំងច្បាស់លាស់ដោយយើងបានដាក់ឲ្យភ្នាក់ងាររបស់ក្រសួងរួចហើយ ដើម្បីចែកមុង អប់រំ និងធ្វើតេស្តជូនពួកគាត់ ហើយបើឃើញនូវរោគសញ្ញាគ្រុនចាញ់ត្រូវឲ្យឱសថគាត់ភ្លាមៗ ដើម្បីព្យាបាលឲ្យបានទាន់ពេលវេលា។
ទន្ទឹមនឹងនោះ លោក រដ្ឋមន្ត្រីក្រសួងសុខាភិបាល ក៏បានអំពាវនាវដល់ប្រជាពលរដ្ឋក្នុងករណីមានបញ្ហាគ្រុនក្ដៅ បែកញើស ត្រូវមកពិនិត្យសុខភាពនៅមន្ទីរពេទ្យ ឬមណ្ឌលសុខភាព ហើយមានអ្នកស្ម័គ្រចិត្តភូមិ ដើម្បីឲ្យគាត់ធ្វើតេស្តរោគសញ្ញាគ្រុនចាញ់ បើមានរោគសញ្ញា នឹងទទួលបានឱសថភ្លាមៗដើម្បីឲ្យឆាប់ជា។
លើសពីនោះ សូមបងប្អូនប្រជាពលរដ្ឋ ដែលរស់នៅក្នុងតំបន់ងាយរងគ្រោះ ត្រូវប្រើប្រាស់មុងជ្រលក់ពណ៌ឲ្យបានគ្រប់ៗគ្នា ដើម្បីធានាបាននូវសុវត្ថិភាព និងជៀសផុតពីការចំលងជំងឺគ្រុនចាញ់៕
Source: Kampuchea Thmey Daily
0 Comments