ភ្នំពេញ ៖ តបតាមការអញ្ជើញរបស់រដ្ឋមន្ត្រីការបរទេសឥណ្ឌូនេស៊ី លោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិនៃព្រះរាជាណាចក្រកម្ពុជា នឹងដឹកនាំគណៈប្រតិភូអញ្ជើញទៅចូលរួម និងធ្វើជាសហប្រធានកិច្ចប្រជុំ គណៈកម្មការចម្រុះកម្ពុជា-ឥណ្ឌូនេស៊ី លើកទី៤ ស្តីពីកិច្ចសហប្រតិបត្តិការទ្វេភាគីរវាងព្រះរាជាណាចក្រកម្ពុជា និងសាធារណរដ្ឋឥណ្ឌូនេស៊ី ជាមួយលោកជំទាវ រ៉េតណូ ម៉ារស៊ូឌី (Retno L.P. Marsudi) រដ្ឋមន្ត្រីការបរទេសនៃសាធារណរដ្ឋឥណ្ឌូនេស៊ី ដែលនឹងប្រព្រឹត្តទៅពីថ្ងៃទី៣ ដល់ថ្ងៃទី៤ ខែធ្នូ ឆ្នាំ២០១៨ នៅទីក្រុងហ្សាការតា។
សេចក្តីប្រកាសព័ត៌មានរបស់ក្រសួងការបរទេស ចុះថ្ងៃទី០១ ខែធ្នូ ឆ្នាំ២០១៨ បានឲ្យដឹងថា កិច្ចប្រជុំគណៈកម្មការចម្រុះលើកទី៤ នឹងពិនិត្យមើលឡើងវិញនូវកិច្ចសហប្រតិបត្តិការលើវិស័យផ្សេងៗដែលអនុវត្តដោយប្រទេសទាំងពីរ។ លើសពីនេះទៅទៀត កិច្ចប្រជុំ នឹងរិះរកលទ្ធភាពក្នុងការប្រើប្រាស់សក្តានុពលសម្រាប់ផលប្រយោជន៍រួមគ្នា និងធ្វើឲ្យស៊ីជម្រៅថែមទៀតនូវចំណងទំនាក់ទំនងមិត្តភាព និងកិច្ចសហប្រតិបត្តិការដែលបានលើកកម្ពស់អស់រយៈពេលជាច្រើនឆ្នាំដោយថ្នាក់ដឹកនាំ និងប្រជាជននៃប្រទេសទាំងពីរ។
នៅចុងបញ្ចប់នៃកិច្ចប្រជុំគណៈកម្មការចម្រុះនេះ រដ្ឋមន្ត្រីការបរទេសទាំងពីរ នឹងចុះហត្ថលេខា លើកំណត់ហេតុនៃកិច្ចប្រជុំគណៈកម្មការចម្រុះកម្ពុជា-ឥណ្ឌូនេស៊ី លើកទី៤ ៕
Source: Kampuchea Thmey Daily
0 Comments