គ្រូ​អ្នកចាំទី​ជនជាតិ​ជប៉ុន ទៅ​ចូលរួម​ក្លិប​នៅ​លី​គ​លំដាប់​ទី​៣​របស់​ថៃ ក្រោយ​ចាក​ចេញពី​ក្លិប​ភ្នំពេញ​ក្រោ​ន

ក្រោយ​ផុត​កិច្ចសន្យា​រយៈពេល​១​រដូវ​កាល​ជាមួយ​ក្លិប​ភ្នំពេញ​ក្រោ​ន សមាជិក​ក្នុង​ពានរង្វាន់​ជម្រើស​ជើងឯក​ជាតិ (Metfone Cambodian League) ក្នុងនាម​ជា​គ្រូបង្វឹក​អ្នកចាំទី​លោក Yasuyuki Yoshida បានសម្រេច​មិន​បន្ត​កិច្ចសន្យា​ជាមួយ​ក្រុម​ជើងឯក​៦​សម័យកាល​នេះ​ទៀត​ទេ កាលពីដើម​ខែតុលា កន្លងទៅ ​ខណៈ​លោក​នឹង​ងាក​ទៅ​បន្ត​អាជីព​នៅ​ប្រទេស​ថៃ វិញ​ម្តង​។​

​បុរស​ជនជាតិ​ជប៉ុន​រូបនេះ​ បាន​លើកឡើងថា ​៖ «​ខ្ញុំ​បាន​ផុត​កិច្ចសន្យា​ជាមួយ​ក្លិប​ហើយ ក្រោយ​ចប់​រដូវ​កាល​ថ្មីៗ​នេះ​។ ខ្ញុំ​ក៏​សម្រេច​មិន​បន្ត​កិច្ចសន្យា​ជាមួយ​ក្លិប​នេះ​ទៀត ដោយ​សុំ​មិន​និយាយ​ពី​មូលហេតុ​។ ខ្ញុំ​នៅតែ​បើកចំហ ​អាជីព​នៅ​ប្រទេស​កម្ពុជា ប្រសិនបើ​មាន​ក្លិប​ផ្សេង​ចង់បាន​ខ្ញុំ​។ ប៉ុន្តែ​នៅពេលនេះ​មាន​ក្លិប​បាល់ទាត់​មួយ​នៅ​លី​គ​លំដាប់​ទី​៣​របស់​ថៃ គេ​បាន​ទាក់ទង​មក​ខ្ញុំ​ដើម្បី​ឱ្យចូល​រួមជាមួយ​ពួកគេ​។ ខ្ញុំ​កំពុងតែ​ច​ចារ​លក្ខខណ្ឌ​មួយចំនួន​ជាមួយ​ពួកគេ​មុន​សម្រេចចិត្ត​»​។​

​យ៉ាងណាក្តី​បុរស​វ័យ​៣៤​ឆ្នាំ​រូបនេះ​ធ្លាប់បាន​អះអាងថា​លោក​មិនទាន់​រំងាប់​ចិត្ត​ប្រកប​អាជីព​ជា​កីឡាករ​នៅឡើយ​នោះទេ ទោះបីជា​បន្ត​អាជីព​ជា​គ្រូបង្វឹក​អ្នកចាំទី​ជាមួយ​ក្លិប​ភ្នំពេញ​ក្រោ​ន មួយរយៈ​ក៏ដោយ​។ លោក​ចង់​ស្វែងរក​ក្លិប​មួយ​ដែល​អាច​បន្ត​អាជីព​ជា​កីឡាករ​១​ឬ​២​ឆ្នាំ​ទៀត​សិន មុន​ចូលនិវត្តន៍​ទៅ​ប្រកប​អាជីព​ជា​គ្រូបង្វឹក​។​

​លោក Yasuyuki Yoshida ជា​ជនជាតិ​ជប៉ុន បាន​ត្រឡប់​ទៅ​ប្រកប​អាជីព​នៅ​ស្រុកកំណើត​វិញ​នៅ​ឆ្នាំ​២០១៦ ក្រោយ​ធ្វើដំណើរ​លើកដំបូង​មក​រាជធានី​ភ្នំពេញ គិត​ចាប់ពី​ឆ្នាំ​២០១៣ ដោយ​ចូលរួម​ជាមួយ​ក្រុម​អគ្គស្នងការដ្ឋាន​នគរ​បាល​ជាតិ (​ប៉ូលីស​)​។ កាលនោះ​តាមរយៈ​ទំនាក់ទំនង​ជាមួយ​កីឡាករ Takihito Ota ដែលជា​កីឡាករ​ជនជាតិ​ជប៉ុន​ដំបូង​គេ​បង្អស់​មក​ប្រកប​អាជីព​នៅ​ប្រទេស​កម្ពុជា កីឡាករ Yasuyuki Yoshida បានមក​ធ្វើជា​អ្នកចាំទី​នៅ​ក្លិប​ប៉ូលីស នៅ​ឆ្នាំ​២០១៣ និង​ឆ្នាំ​២០១៤ ហើយ​នៅ​ឆ្នាំ​២០១៥ លោក​បាន​ចេញទៅ​បន្ត​អាជីព​នៅ​ក្លិប Albirex Niigata Phnom Penh ក្នុង​លី​គ​កំពូល​កម្ពុជា ដែរ ហើយ​នៅ​ឆ្នាំ​ជាមួយគ្នា​លោក​បាន​ចេញទៅ​ក្រុម​ខេ​ម​បូ​ឌា​ន​ថា​យ​ហ្គឺ​រ ក្នុងនាម​ជា​អ្នកចាំទី​និង​គ្រូបង្វឹក​អ្នកចាំទី​។ នៅ​ឆ្នាំ​២០១៦ លោក​បានធ្វើ​ដំណើរ​ទៅ​ស្រុកកំណើត​វិញ ដោយ​ប្រកប​អាជីព​នៅ​ក្លិប​REINMEER AOMORI FC សមាជិក​ពានរង្វាន់​លី​គ​លំដាប់​ទី​៤ ក្នុងប្រទេស​ជប៉ុន​៕

​

Source: Kampuchea Thmey Daily