ភ្នំពេញ ៖ លោក លី ចាន់ស៊ូ ប្រធានគណៈកម្មាធិការអចិន្រៃ្តយ៍នៃសភាប្រជាជនចិនបានចាត់ទុកសម្តេចតេជោហ៊ុន សែន គឺជាមេដឹកនាំដែលល្បីល្បាញមួយរូបដែលប្រជាជនចិនបានស្គាល់ស្ទើរតែគ្រប់គ្នា។ ក្រោមការដឹកនាំរបស់សម្ដេចតេជោ បានធ្វើឲ្យមានការអភិវឌ្ឍសេដ្ឋកិច្ចយ៉ាងលឿននៅក្នុងប្រទេសកម្ពុជា ជាមួយនេះសម្ដេចតេជោបានកសាងនិងពង្រឹងពង្រីកទំនាក់ទំនងទ្វេភាគីរវាងចិននិងកម្ពុជាធ្វើឲ្យមានការកើនឡើងនិងអភិវឌ្ឍន៍ឥតឈប់ឈរ។
នេះបើយោងតាមការអះអាងរបស់លោក កៅ គឹមហួន រដ្ឋមន្ត្រីប្រតិភូអមនាយករដ្ឋមន្ត្រីបានឲ្យដឹងថា ក្រោយជំនួបរវាងសម្តេចតេជោ ហ៊ុន សែន នាយករដ្ឋមន្ត្រីកម្ពុជាជាមួយលោក លី ចាន់ស៊ូ ប្រធានគណៈកម្មាធិការអចិន្ត្រៃយ៍នៃសភាប្រជាជនចិននៅទីក្រុងប៉េកាំងនារសៀលថ្ងៃទី ២២ មករា។
លោក កៅ គឹមហួន រដ្ឋមន្ត្រីប្រតិភូអមនាយករដ្ឋមន្ត្រីបានឲ្យដឹងថា នៅក្នុងជំនួបនោះលោកលី ចាន់ស៊ូ បានមានប្រសាសន៍ថា តំណាងឲ្យសភាប្រជាជនចិនទាំងអស់បានចាត់ទុកសម្ដេចតេជោគឺជាមេដឹកនាំដែលល្បីល្បាញមួយរូប ដែលប្រជាជនចិនបានស្គាល់ស្ទើរតែគ្រប់គ្នា។
លោកបានបន្តថា ក្រោមការដឹកនាំរបស់សម្ដេចតេជោ គឺបានអភិវឌ្ឍន៍សេដ្ឋកិច្ចកម្ពុជាយ៉ាងលឿនហើយមិនត្រឹមតែប៉ុណ្ណោះសម្ដេចតេជោបានកសាងនិងពង្រឹងពង្រីកទំនាក់ទំនងទ្វេភាគីរវាងចិននិងកម្ពុជាធ្វើឲ្យមានការកើនឡើងនិងអភិវឌ្ឍន៍ឥតឈប់ឈរ។
លោកបានមានប្រសាសន៍ថា កន្លងមកសម្ដេចតេជោនាយករដ្ឋមន្ត្រីបានគាំទ្រនូវផលប្រយោជន៍ស្នូលនៃប្រទេសចិនជាពិសេសនយោបាយចិនតែមួយ ហើយលោកបានគូសបញ្ជាក់ថា ថ្នាក់ដឹកនាំចិនបានចាត់ទុកសម្ដេចតេជោ គឺជាមិត្តដែកថែបនៃប្រទេសចិន។
លោក លី ចាន់ស៊ូ បានគូសបញ្ជាក់ផងដែរថា ប្រទេសចិននឹងបន្តគាំទ្រដល់ប្រទេសកម្ពុជា លើមាគ៌ានៃការអភិវឌ្ឍដែលប្រទេសកម្ពុជាជ្រើសរើសជាពិសេសបន្តមានសន្តិភាព ស្ថិរភាព សន្តិសុខ និងការអភិវឌ្ឍសេដ្ឋកិច្ចដោយជំរុញធ្វើយ៉ាងណាឲ្យជីវភាពរស់នៅរបស់ប្រជាពលរដ្ឋមានភាពល្អប្រសើរឡើង។
លោកក៏បានមានប្រសាសន៍ផងដែរថា ជំនួបរវាងលោក ស៊ី ជិនពីង ជាមួយសម្ដេចតេជោនាយករដ្ឋមន្ត្រីកាលពីម្សិលមិញរួមទាំងពិធីជប់លៀងផងដែរនេះ គឺបានឆ្លុះបញ្ចាំងពីទំនាក់ទំនងពិសេសរវាងចិន និងកម្ពុជាហើយលោកក៏បានបញ្ជាក់ផងដែរថា សម្រាប់កិច្ចការនេះគឺនឹងទទួលបាននូវសមិទ្ធផលជាច្រើន ពិសេសនឹងនាំឲ្យទំនាក់ទំនងទ្វេ ភាគីឡើងដល់កម្រិតថ្មីទៀត។
ជាការឆ្លើយតបសម្ដេចតេជោរដ្ឋមន្ត្រីបានមានប្រសាសន៍ថ្លែងអំណរគុណលោកលីចាន់ស៊ូ សម្រាប់ពាក្យពេចន៍ទាំងឡាយនូវការអបអរសាទរចំពោះលទ្ធផលនៃការបោះឆ្នោតនៅកម្ពុជា។ សម្តេចតេជោក៏បានអរគុណដល់ថ្នាក់ដឹកនាំចិនដែលកន្លងមកតែងតែទទួលនូវព្រះរាជដំណើរពិនិត្យព្រះរាជសុខភាពរបស់ព្រះមហាក្សត្រនៃព្រះរាជាណាចក្រកម្ពុជាមកកាន់ប្រទេសចិន។
សម្តេចនាយករដ្ឋមន្ត្រីបានគូសបញ្ជាក់ថា ទំនាក់ទំនងរវាងកម្ពុជានិងចិនមានលក្ខណៈពិសេស ដោយសារភាពជាដៃគូយុទ្ធសាស្ត្រគ្រប់ជ្រុងជ្រោយ។ ជាពិសេសការសម្រេចបាននូវសមិទ្ធផលជាផ្លែផ្កាមួយចំនួនលើសពីគោលដៅកំណត់ដូចជាទំហំពាណិជ្ជកម្មភាគីទាំងពីរកំណត់សម្រេចឲ្យបាន ៥ពាន់លានដុល្លារនៅឆ្នាំ២០២០។ ប៉ុន្តែនៅឆ្នាំ២០១៧ទំហំពាណិជ្ជកម្មបានកើនឡើងដល់ជិត ៧ពាន់លានដុល្លារទៅហើយ។ វិស័យទេសចរណ៍វិញកំណត់ត្រឹមតែ ០,០១ភាគរយនៃប្រជាពលរដ្ឋចិនគឺស្មើនឹង ១,៣លាននាក់ តែមកដល់ឆ្នាំ២០១៨ ភ្ញៀវទេសចរចិនបានឈានដល់១,៦លាននាក់។ ដោយឡែកអ្នកវិនិយោគពីប្រទេស ចិននៅកម្ពុជាក៏មានចំនួនច្រើនហួសការរំពឹងទុកដោយសារមានការទុកចិត្តលើនយោបាយនៃការដឹកនាំរបស់មេដឹកនាំប្រទេសទាំងពីរ។
សម្តេចតេជោ ហ៊ុន សែន បានបង្ហាញក្តីសង្ឃឹមថា មេដឹកនាំប្រទេសចិននឹងជំរុញបន្ថែមទៀតនូវកិច្ចសហប្រតិបត្តិការរវាងកម្ពុជានិងចិនផងដែរ។ សម្តេចតេជោនាយករដ្ឋមន្ត្រីបានគូសបញ្ជាក់ថា នយោបាយដែលផ្តួចផ្តើមដោយអតីតព្រះមហាក្សត្រខ្មែរ ព្រះបាទសម្ដេចព្រះនរោត្ដម សីហនុ ព្រះបរមរតនកោដ្ឋ ក្នុងការរឹតចំណងមិត្តភាពកម្ពុជានិងចិន គឺនៅតែរក្សាដដែលគ្មានអ្វីផ្លាស់ប្តូរនោះឡើយជាពិសេសនយោបាយចិនតែមួយ។
លោក លី ចាន់ស៊ូ បានឯកភាពទាំងស្រុងនូវអ្វីដែលសម្តេចតេជោ ហ៊ុន សែន បាន លើកឡើង។ លោកបានគូសបញ្ជាក់ថា ប្រជាជនចិននៅតែចងចាំនូវទុក្ខលំបាករបស់កម្ពុជា ហើយចិននិងកម្ពុជា តែងតែជួយគ្នានិងគោរពគ្នាទៅវិញទៅមក។ លោកបានសង្កត់ធ្ងន់ថា កម្ពុជានិងចិន គឺជាមិត្តដ៏ពិតប្រាកដទោះបីនៅក្នុងកាលៈទេសៈណាក៏ដោយគឺតែងតែជួយគ្នាទៅវិញទៅមក។ លោកបន្ថែមថា ចិននៅតែបន្តគាំទ្រដល់ការអភិវឌ្ឍសេដ្ឋកិច្ចរបស់ប្រទេសកម្ពុជា និងគាំទ្រសម្តេចតេជោ ហ៊ុន សែន បន្តដឹកនាំកម្ពុជា។ លោក លី ចាន់ស៊ូ ក៏បានអះអាងដែរថាទំនាក់ទំនងកម្ពុជានិងចិននៅតែបន្តរក្សានៅគ្រប់វិស័យនិងគ្រប់កម្រិត ដើម្បីជាប្រយោជន៍ប្រទេសទាំងពីរ។ លោកក៏បានអរគុណសម្តេចតេជោដែលបានអញ្ជើញលោកបំពេញទស្សនកិច្ចនៅកម្ពុជាហើយលោកនឹងរកពេលវេលាសមរម្យណាមួយដើម្បីបំពេញទស្សនកិច្ចនៅកម្ពុជា៕
Source: Kampuchea Thmey Daily
0 Comments