ក្លិប​សូល​ទី​ឡូ​អង្គរ នាំចូល​កីឡាករ​បរទេស​បង្គ្រប់​កូតា ខណៈ​មាន​ម្នាក់​ធ្លាប់​លេង​នៅ​លី​គ​កំពូល​ប្រទេស​ជប៉ុន

​ក្លិប​បាល់ទាត់​សូល​ទី​ឡូ​អង្គរ ដែលជា​សមាជិក​ក្នុង​ពានរង្វាន់​លី​គ​កំពូល​កម្ពុជា (Metfone Cambodian League 2018) ដែល​មាន​មូលដ្ឋាន​នៅ​ខេត្តសៀមរាប បានប្រកាស​ពី​ជោគជ័យ​នៃ​ការនាំយក​កីឡាករ​បរទេស​ម្នាក់​២​នាក់ ដែល​ក្នុង​នោះ​ធ្លាប់មាន​បទពិសោធន៍​ប្រកប​អាជីព​នៅ​លី​គ​កំពូល​ប្រទេស​ជប៉ុន ដើម្បី​ត្រៀម​ជួយ​ក្រុម​ប្រកួតប្រជែង​ក្នុង​រដូវ​កាល​ឆ្នាំ​២០១៩ ខាងមុខ​។

កីឡាករ​បរទេស​ថ្មី​២​នាក់​ដែល​បង្គ្រប់​កូតា​កីឡាករ​បរទេស​៥​នាក់​នោះ​មាន​កីឡាករ​Kota Motoyama ជនជាតិ​ជប៉ុន ជា​អ្នកចាំទី ខណៈ​នេះ​ជា​លើកដំបូង​ហើយ​ដែល​រូបគេ​ទទួលបាន​កិច្ចសន្យា​ចាប់​អាជីព​ជា​កីឡាករ​បាល់ទាត់​។ ក្លិប​ដែល​មាន​ភាគហ៊ុន​របស់​កីឡាករ​ឆ្នើម​Keisuke Honda របស់​ជប៉ុន​នៅតែ​ជឿជាក់​កីឡាករ​រូប​នេះ​នឹង​សង្គ្រោះ​បាល់​បាន​ល្អ អំឡុង​ពេល​ប្រកួត ទោះបីជា​នៅ​ខ្ចី​បទពិសោធន៍​ក៏ដោយ​។



ចំណែក​កីឡាករ​ម្នាក់ទៀត​ គឺ​ជនជាតិ​ជប៉ុន​ដូចគ្នា​គឺជា​កីឡាករ Fumiya Kogure ដែល​ធ្លាប់មាន​បទពិសោធន៍​នៅ​ប្រទេស​ជប៉ុន​ចាប់ពី​ឆ្នាំ​២០០៨ ដល់​២០១៥ ដូចជា​ក្លិប Abirex Niigata, Mito HolyHock, Azul Claro Numazu ខណៈ​នៅ​ឆ្នាំ​២០១៥ បាន​ចេញទៅ​ចូលរួម​ក្លិប Abirex Niigata Singapore ហើយ​នៅ​ឆ្នាំ​២០១៦ ចូលរួម​ជាមួយ​ក្រុម Houng United និង​នៅ​ឆ្នាំ​២០១៨ បាន​បន្តទៅ​ចូលរួម​ជាមួយ​ក្រុម​Geylang International មុន​មកដល់​លី​គ​កំពូល​កម្ពុជា ឆ្នាំ​២០១៩​នេះ​។

​យោងតាម​ការ​កំណត់​របស់​សហព័ន្ធ​កីឡាបាល់ទាត់​កម្ពុជា (​ស​.​ប​.​ក​) បាន​បញ្ជាក់​ថា ​ក្លិប​ជា​សមាជិក​របស់​លី​គ​ខ្លួន​មាន​សិទ្ធិ​ចុះបញ្ជី​កីឡាករ​បរទេស​ចំនួន​៥​នាក់​ប៉ុន្តែ​ដាច់ខាត​ក្នុង​នោះ​ត្រូវ​តែ​មាន​កីឡាករ​ជា​ជនជាតិ​សមាជិក​ទ្វីបអាស៊ី ១​រូប​។ ដូច្នេះ​ក្រុម​សូល​ទី​ឡូ​អង្គរ មាន​កីឡាករ​បរទេស​គ្រប់​ចំនួន​ហើយដោយ​ក្នុងនោះ​មាន​កីឡាករ Kento Fujihara,Unno Tomoyuki,Motoyama Kota,Fumiya Kogure,Yuta Kikuchi ដែល​សុទ្ធ​ជា​ជនជាតិ​ជប៉ុន​។

សូមបញ្ជាក់​ថា ​ក្រុម​សូល​ទី​ឡូ​អង្គរ កាលពី​ស្ថិត​នៅ​ក្រោម​ការដឹកនាំរ​ប​ស់លោក Yuki Matsuda​ ដែល​ជា​គ្រូបង្វឹក​ចាស់ បាន​ឈរ​នៅ​ចំណាត់ថ្នាក់​លេខ​១០ ក្នុងចំណោម​សមាជិក​ទាំង​១២​ក្នុង​ពានរង្វាន់​លី​គ​កំពូល​កម្ពុជា រដូវ​កាល​ឆ្នាំ​២០១៨​ក្រោយ​រកបាន​ជ័យជម្នះ​ចំនួន​៥ លើក ហើយ​ធ្លាប់​ស្មើ​៥ លើក​និង​ចាញ់​១២ លើក​មាន​២០​ពិន្ទុ ដែល​អាច​បន្ត​ក្នុង​លី​គ​កំពូល​រដូវ​កាល​បន្ទាប់​ទៀត​។

ចំណែក​ក្នុង​ពានរង្វាន់​សម្តេច​តេ​ជោ ហ៊ុន សែន វិញ​ក្រុម​សូល​ទី​ឡូ​អង្គរ បាន​ធ្លាក់​ត្រឹម​វគ្គ​១៦​ក្រុម​ចុងក្រោយ បន្ទាប់ពី​ចាញ់​គូប្រជែង​ក្នុង​ខេត្ត​តែមួយ​គឺ​អង្គ​រថា​យ​ហ្គឺ​រ ដោយ​លទ្ធផល​ទាំង​២​ជើង​៣​ទល់​២៕

Source: Kampuchea Thmey Daily