កណ្តាល ៖ ស្មារតី៧ មករា ស្ថិតនៅជានិច្ចក្នុងដួងចិត្តរបស់យើងនិងជាកម្លាំងយ៉ាងធំធេងដែលធ្វើឲ្យយើងយកឈ្នះបានលើគ្រប់ឧបសគ្គ និងការលំបាកសព្វបែបយ៉ាង ក្នុងការកសាង និងការការពារមាតុភូមិ។
នេះជាប្រសាសន៍លើកឡើង របស់លោកបណ្ឌិតម៉ៅ ភិរុណ អភិបាលនៃគណៈអភិបាលខេត្តកណ្តាលនិងជាប្រធានគណៈកម្មាធិការ គណបក្សប្រជាជនកម្ពុជាខេត្តកណ្តាលក្នុងពិធីមិទ្ទីញអបអរសាទរខួបអនុស្សាវរីយ៍លើកទី៤០នៃទិវាជ័យជំនះ៧មករា ឆ្នាំ១៩៧៩។
លោកបណ្ឌិត ម៉ៅ ភិរុណ អភិបាលខេត្តកណ្តាល បានមានប្រសាសន៍ថា ជ័យជំនះ ៧មករាបានសង្គ្រោះទាន់ពេលវេលា នូវអាយុជីវិតប្រជាជនកម្ពុជារាប់លាននាក់ ដែលនៅរង់ចាំតែសេចក្តីស្លាប់ បានធ្វើឲ្យរាល់តម្លៃទាំងស្មារតី និងសម្ភារៈរបស់ប្រជាជាតិខ្មែរដែលត្រូវបាន កសាងពូនជ្រំក្នុងប្រវត្តិសាស្ត្ររាប់ពាន់ឆ្នាំរបស់ខ្លួន ហើយបានស្រកស្រុតស្ទើររលាយសាបសូន្យូបាត់អស់នៅក្នុងរបបប្រល័យពូជសាសន៍ប៉ុលពត គ្រានោះរស់ឡើងមកវិញ បានបិទទំព័រដ៏ខ្មៅងងឹតបំផុតនៃប្រវត្តិសាស្ត្រកម្ពុជា ហើយបើកឡើងនូវសករាជថ្មី គឺសករាជនៃឯករាជ្យសេរីភាព ប្រជាធិបតេយ្យ និងវឌ្ឍនភាពសង្គមជូនដល់ប្រជាជាតិដ៏កម្សត់នៃយើងក្នុងការធ្វើជាម្ចាស់លើជោគវាសនារបស់ខ្លួនពិតប្រាកដ។
លោកបានលើកឡើងថា ជាការពិតជ័យជម្នះ ៧មករា ១៩៧៩ សម្រេចបានមកដោយឈរលើមូលដ្ឋាននៃការគួបផ្សំយ៉ាងស្អិតរមួតរវាងកម្លាំងពីរគឺ កម្លាំងមហាសាមគ្គីជាតិរបស់កម្ពុជា ក្រោមការដឹកនាំរបស់គណបក្សប្រជាជនកម្ពុជា និងការជួយឧបត្ថម្ភយ៉ាងធំធេងទាន់ពេលវេលា និងមានប្រសិទ្ធភាពពីសំណាក់កងទ័ពស្ម័គ្រចិត្តវៀតណាម។
យើងមិនត្រូវភ្លេចទេថា រាល់សមិទ្ធផលដែលប្រជាជាតិយើងទទួលបានគឺមិនមែនបានមកដោយគ្មានការតស៊ូ និងការលះបង់នោះឡើយ។
លោកបណ្ឌិត ម៉ៅ ភិរុណ បានបញ្ជាក់ថា សន្តិភាព សន្តិសុខ និងស្ថិរភាពនយោបាយ បានបង្កើតឱកាសមាស ដែលពុំធ្លាប់មានដល់កម្ពុជាក្នុងការអភិវឌ្ឍសង្គម សេដ្ឋកិច្ចឲ្យសម្រេចបានសមិទ្ធផលយ៉ាងធំធេងគួរជាទីមោទនៈក្នុងរយៈពេលជាង ២ទសវត្សចុងក្រោយនេះ។ លោកបានបន្តទៀតថា សរុបមកក្នុងរយៈពេល ៤០ឆ្នាំផ្តើមពីជ័យជម្នះ ៧មករា ១៩៧៩ កម្ពុជាសម្រេចបាននូវការកែប្រែមុខមាត់ ដែលគ្មានអ្នកណាអាចនឹកស្មានដល់ហើយស្មារតី ៧ មករា ស្ថិតនៅជានិច្ចក្នុងដួងចិត្តរបស់យើង ស្មារតី ៧ មករាគឺជាកម្លាំងយ៉ាងធំធេងដែលធ្វើអោយយើងយកឈ្នះបានលើគ្រប់ឧបសគ្គ និងការលំបាកសព្វបែបយ៉ាង ក្នុងការកសាង និងការការពារមាតុភូមិ ស្មារតី ៧មករាគឺ សាមគ្គីភាព វីរភាព និងជ័យជម្នះ។
បច្ចុប្បន្នយើងកំពុងឈរយ៉ាងរឹងមាំក្នុងភាពជាម្ចាស់លើប្រទេសជាតិ និងជោគវាសនារបស់ខ្លួន ហើយក៏កំពុងឈានទៅមុខយ៉ាងស្វាហាប់ ប្រកបដោយភាពជឿជាក់។ អង្គមិន្ទិញបានបញ្ចប់បន្ទាប់ពីតំណាងអង្គពិធីឡើងធ្វើចំណាប់អារម្មណ៍ និងប្តេជ្ញាចិត្ត៕
Source: Kampuchea Thmey Daily
0 Comments