ភ្នំពេញ ៖ តាមការកំណត់របស់ចៅក្រម នៅព្រឹកថ្ងៃទី២៣ ខែមករា ឆ្នាំ២០១៩នេះ លោក គង់ គាំ អតីតឧត្តមទីប្រឹក្សាជាន់ខ្ពស់គណបក្សសង្គ្រោះជាតិ បានចូលទៅកាន់សាលាដំបូងរាជធានីភ្នំពេញ ដើម្បីធ្វើការបំភ្លឺជុំវិញសំណុំរឿងលោក កឹម សុខា តាមការកោះហៅរបស់ចៅក្រមសាលាដំបូងរាជធានីភ្នំពេញ លោក គី ឬទ្ធី។
នៅពេលចាកចេញពីតុលាការវិញ លោកផ្តល់បទសម្ភាសន៍ដល់អ្នកសារព័ត៌មានផងដែរ ដែលនៅក្នុងកិច្ចសម្ភាសន៍នោះ លោក គង់ គាំ បានអះអាងថា លោកមិនបានដឹងអ្វីច្រើនពីទំនាក់ទំនងរវាងលោក កឹម សុខា ដែលជាថ្នាក់ដឹកនាំគណបក្សសង្គ្រោះជាតិជាមួយបរទេសនោះទេ ហើយលោកបញ្ជាក់ថា មានតែលោក សម រង្ស៊ី ប៉ុណ្ណោះ ដែលដឹងច្រើនអំពីសំណុំរឿងនេះ ហើយលោកបានសម្តែងការភ្ញាក់ផ្អើល នៅពេលលឺលោក កឹម សុខា និយាយពីទំនាក់ទំនងជាមួយបរទេសនេះ។ លោក គង់ គាំ ថ្លែងយ៉ាងនេះថា “ខ្ញុំមកជាសាក្សី ដើម្បីបំភ្លឺជុំវិញករណីជនត្រូវចោទ លោក កឹម សុខា ពីបទសន្ទិដ្ឋិភាពជាមួយបរទេសហ្នឹង ដូច្នេះនីតិវិធីរបស់តុលាការចៅក្រមស៊ើបសួរឲ្យយើងស្បថ ហើយខ្ញុំស្បថថា ដឹងអីជំរាបហ្នឹង មិនបានបំភ្លៃបំផ្លើសមួលបង្កាច់អីទេ ហើយគិតថា មេធាវីដើមចោទគេជាអ្នកដាក់បន្ទុក មេធាវីជនត្រូវចោទ គឺជាអ្នកដោះបន្ទុក ខ្ញុំជាសាក្សីមិនបានដាក់បន្ទុក មិនបានដកបន្ទុកទេ គ្រាន់តែជាការបំភ្លឺដើម្បីចៅក្រម និងតុលាការមានព័ត៌មានគ្រប់គ្រាន់ ផ្តល់យុត្តិធម៌ឲ្យអ្នកដែលត្រូវតែប៉ុណ្ណឹងទេ... ហើយការបំភ្លឺរបស់ខ្ញុំគ្រាន់តែជាជំនួយ ដើម្បីប្រភពបានច្រើន ឲ្យតុលាការពិចារណាផ្តល់យុត្តិធម៌ជនត្រូវចោទតែប៉ុណ្ណឹង ដូច្នេះខ្ញុំគិតថា អ្វីលើលោក កឹម សុខា ខ្លួនឯង”។
លោក គង់ គាំ បញ្ជាក់ដែរថា នៅក្នុងការសាកសួររបស់តុលាការនោះ “ទី១ បានសួរពីជីវិតនយោបាយរបស់ខ្ញុំ ហើយឥឡូវនេះក្រោយពីគណបក្សសង្គ្រោះជាតិរំលាយ ជាប់បម្រាម ខ្ញុំជាអ្នកសុំសិទ្ធិ ហើយទទួលបាននីតិសម្បទាធ្វើនយោបាយឡើងវិញមុនគេ”។
ដោយឡែកទាក់ទងលោក កឹម សុខា តុលាការបានសួរថា តើគណបក្សសិទ្ធិមនុស្សយ៉ាងណា ហើយចូលរួមជាមួយគណបក្សសមរង្ស៊ី ទៅជាគណបក្សសង្គ្រោះជាតិយ៉ាងណា? ហើយនៅពេលលោកមានតួនាទីជាទីប្រឹក្សាហ្នឹងបានដឹងបានរួមចំណែកជាមួយថ្នាក់ដឹកនាំទាំងពីរ សម រង្ស៊ី និង កឹម សុខា អ្វីខ្លះ ? ហើយលោកបានឆ្លើយថា “ការពិតខ្ញុំជាទីប្រឹក្សា ដូចដែលសម រង្ស៊ី ថ្មីៗចុងក្រោយ គាត់ថា ខ្ញុំចូលមកបំភ្លឺនេះ មិនសូវដឹងរឿងអីច្រើនទេ មានតែសម រង្ស៊ី ទេ ដែលដឹងរឿងគ្រប់យ៉ាង ប៉ុន្តែអ្នកដឹងតិច មានព័ត៌មានអ្វីជូនចៅក្រមបាន ហើយអ្នកដឹងច្រើន ក៏មានព័ត៌មានអ្វីជូនចៅក្រមបាន ដើម្បីគោលដៅតែមួយគត់ គឺរកយុត្តិធម៌ឲ្យអ្នកត្រូវចោទ”។
ជាមួយគ្នានោះ លោក គង់ គាំ អះអាងថា លោកមានការភ្ញាក់ផ្អើល ដែលមានវីដេអូ សម្លេងលោក កឹម សុខា ដែលគាត់ថា គាត់បានធ្វើការជាមួយបរទេស ដើម្បីធ្វើឲ្យមានការផ្លាស់ប្តូរនៅកម្ពុជា។ លោកបញ្ជាក់ថា “ខ្ញុំភ្ញាក់ផ្អើលនឹងប្រសាសន៍របស់គាត់នៅក្នុងវីដេអូ ហើយអាស្រ័យលើតុលាការមានជំនាញវិនិច្ឆ័យលើបញ្ហាហ្នឹងហើយបាទ...ខ្ញុំក៏មិនយល់អស់នៅក្នុងវីដេអូហ្នឹងដែលលោក កឹម សុខា គាត់បានបញ្ជាក់ថា គាត់មានទំនាក់ទំនងជាមួយសាស្ត្រាចារ្យបរទេសណា ហើយមានផែនការម៉េច ខ្ញុំអត់បានដឹងទេ។ អាថ៌កំបាំងរវាងលោក កឹម សុខា ជាមួយបរទេស ដែលយើងមិនអាចដឹងបាន ហើយមូលហេតុដែលតុលាការអញ្ជើញខ្ញុំ ដោយសារតែខ្ញុំជាទីប្រឹក្សាជាន់ខ្ពស់របស់គណបក្សសង្គ្រោះជាតិ ដែលគេយល់ថា ខ្ញុំអាចដឹងបញ្ហារបស់ថ្នាក់ដឹកនាំគណបក្សសង្គ្រោះជាតិ មានប្រធាន សម រង្ស៊ី និង កឹម សុខា។ តែខ្ញុំមកនេះគ្មានឯកសារ ខ្ញុំពិតជាមិនបានដឹងច្រើន ដូចដែលលោក សម រង្ស៊ី ថា អ្វីៗទាំងអស់ មានតែគាត់ទេ ដែលដឹងច្រើនជាងគេបាទ”។
ឆ្លើយតបសំណួរថា តើលោកបានដឹងអ្វីខ្លះពីលោក សម រង្ស៊ី និងលោក កឹម សុខា ? លោក គង់ គាំ អះអាងថា “ខ្ញុំគ្រាន់តែបានដឹងថា ទាំងពីរនាក់ គណបក្សសិទ្ធិមនុស្ស និងគណបក្សសមរង្ស៊ី ចង់បង្កើតគណបក្សសង្គ្រោះជាតិ ដើម្បីមានថាមពលប្រជែងជាមួយគណបក្សគ្រប់គ្រងអំណាច...ប្រាកដហើយ យើងអត់បានដឹងអ្វីពីការទំនាក់ទំនងដោយផ្ទាល់ជាមួយបរទេសរបស់លោក កឹម សុខា នោះទេ។
សូមបញ្ជាក់ថា ចៅក្រមស៊ើបសួរសាលាដំបូងរាជធានីភ្នំពេញ លោក គី ឫទ្ធី កាលពីថ្ងៃទី២៦ ខែធ្នូ ឆ្នាំ២០១៨ បានចេញដីកាកោះហៅលោក គង់ គាំ ឲ្យចូលឆ្លើយបំភ្លឺក្នុងនាមជាសាក្សី នៅព្រឹកថ្ងៃទី២៣ ខែមករា ឆ្នាំ២០១៩ វេលាម៉ោង៨ និង៣០នាទី នៅជាន់ទី៤ បន្ទប់ “គ” ពាក់ព័ន្ធនឹងសំណុំរឿង “សន្ទិដ្ឋិភាពជាមួយបរទេស” របស់លោក កឹម សុខា។
លោក កឹម សុខា ត្រូវបានចាប់ និងឃុំខ្លួនកាលពីថ្ងៃទី៣ ខែកញ្ញា ឆ្នាំ២០១៧ ដោយចោទប្រកាន់ពីបទធ្វើសន្ធិដ្ឋិភាពជាមួយបរទេស តាមមាត្រា៤៤៣ នៃក្រមព្រហ្មទណ្ឌ។ យោងតាមក្រមព្រហ្មទណ្ឌបទធ្វើសន្ទិដ្ឋិភាពជាមួយបរទេស គឺជាអំពើត្រូវរ៉ូវគ្នាដោយសម្ងាត់ជាមួយរដ្ឋបរទេស ឬភ្នាក់ងារបរទេស ដើម្បីបង្កើតឲ្យមានអំពើប្រទូស្តរ៉ាយ ឬឲ្យមានអំពើឈ្លានពានប្រឆាំងនឹងព្រះរាជាណាចក្រកម្ពុជា។ បទល្មើសនេះ ត្រូវជាប់ពន្ធនាគារពី១៥ ឆ្នាំដល់៣០ឆ្នាំ។ តែត្រូវបានតុលាការសម្រេចដោះលែងឲ្យនៅក្រៅឃុំបណ្តោះអាសន្ន នៅវេលាទៀបភ្លឺឈានចូលថ្ងៃទី១០ ខែកញ្ញា ឆ្នាំ២០១៨ ដោយដាក់ឲ្យស្ថិតនៅក្រោមការត្រួតពិនិត្យតាមផ្លូវតុលាការ ដោយសារតែបញ្ហាសុខភាពរបស់លោក បន្ទាប់ពីឃុំខ្លួននៅក្នុងពន្ធនាគារត្រពាំងផ្លុង (ម៣) រយៈពេលជាង១ឆ្នាំ។
ការដោះលែងលោក កឹម សុខា ឲ្យនៅក្រៅឃុំបណ្តោះអាសន្ន ក្រោមការត្រួតពិនិត្យតាមផ្លូវតុលាការនេះ បានភ្ជាប់នូវលក្ខខណ្ឌចាំបាច់មួយចំនួនសម្រាប់អតីតមេបក្សប្រឆាំងនេះ ដែលរួមមានដូចជា មិនអនុញ្ញាតឲ្យចេញក្រៅពីព្រំប្រទល់នៃដែនដីដែលខណ្ឌដោយផ្លូវលេខ៣១៣ ផ្លូវលេខ៣១១ និងផ្លូវលេខ៦០៨, ត្រូវឆ្លើយតបនឹងការកោះហៅពីគ្រប់បុគ្គលដែលចាត់តាំងដោយចៅក្រមស៊ើបសួរ, មិនត្រូវជួបអតីតថ្នាក់ដឹកនាំគណបក្សសង្គ្រោះជាតិ និងបុគ្គលឬជនបរទេសដែលពាក់ព័ន្ធនឹងសំណុំរឿង និងមិនត្រូវជួបជុំធ្វើសកម្មភាពនយោបាយជាដើម៕
Source: Kampuchea Thmey Daily
0 Comments