ភ្នំពេញ ៖ កម្ពុជាបានធ្វើជាម្ចាស់ផ្ទះរៀបចំការប្រកួតវគ្គផ្តាច់ព្រ័ត្រស្តីពីអភិបាលកិច្ចនិងការអភិវឌ្ឍមេគង្គ ឡានឆាងលើកទី៤ដែលផ្តល់ឱកាសឲ្យនិស្សិតមកពីប្រទេសទាំង៦បានបង្កើតនូវគំនិតថ្មីៗដើម្បីចូលរួមអភិវឌ្ឍន៍តំបន់ទន្លេមេគង្គប្រ កបដោយចីរភាព។
លោក ជេត ជីលី សកលវិទ្យាធិការសាកលវិទ្យាល័យភូមិន្ទភ្នំពេញមានប្រសាសន៍ថាការប្រកួតវគ្គផ្តាច់ព្រ័ត្រនេះមានរយៈពេល៤ថ្ងៃគឺចាប់ពីថ្ងៃទី២៣ដល់ថ្ងៃទី២៦ ខែមករា ឆ្នាំ២០១៩ដោយមាននិស្សិតចូលរួមប្រកួតចំនួន៦០នាក់មកពីប្រទេសថៃ វៀតណាម ឡាវ ចិន មីយ៉ាន់ម៉ារួមទាំងកម្ពុជាចំនួន៣ក្រុមស្មើនឹង៩នាក់ផងដែរ។
ថ្លែងក្នុងពិធីបើកការប្រកួតវគ្គផ្តាច់ព្រ័ត្រស្តីពីអភិបាលកិច្ចនិងការអភិវឌ្ឍមេគង្គ ឡានឆាងលើកទី៤នៅមជ្ឈមណ្ឌល កិច្ចសហប្រតិបត្តិការកម្ពុជាកូរ៉េកាលពីព្រឹកថ្ងៃទី២៣ខែមករា លោកបានបន្តថា ការប្រកួតវគ្គផ្តាច់ព្រ័ត្រនេះគឺតម្រូវឲ្យក្រុមនិស្សិតនីមួយៗត្រូវឡើងការពារគម្រោងរបស់ខ្លួននៅចំពោះមុខគណៈកម្មការមកពី៦ប្រទេសផ្ទាល់ដើម្បីវាយតម្លៃនិងដាក់ពិន្ទុមុននឹងសម្រេចជ្រើសរើសនិងផ្តល់ជ័យលាភីដល់ក្រុមនិស្សិតប្រទេសណាមួយ។
ទន្ទឹមនឹងនេះលោកបានបន្ថែមទៀតថា ក្រុមនិស្សិតក៏ត្រូវធ្វើការពិភាក្សាជាមួយក្រុមនិស្សិតមកពីបណ្តាប្រទេសផ្សេងៗទៀតផងដែរ ដើម្បីឲ្យគម្រោងរបស់ខ្លួនកាន់តែទទួលបានការគាំទ្រថែមទៀតនិងក្លាយជាគម្រោង ដែលមានភាពសំ ខាន់ចំពោះសង្គមដើម្បីឈានទៅដណ្តើមយកជ័យលាភីចំណាត់ថ្នាក់លេខ១ដល់ចំណាត់ថ្នាក់លេខ៣។
លោកសកលវិទ្យាធិការបានឲ្យដឹងថា «ជារួមការប្រកួតនេះបានផ្តល់ឱកាសឲ្យនិស្សិតបានបញ្ចេញស្នាដៃរបស់ខ្លួននៅក្នុងកំរិតតំបន់និងបង្កើននូវការទំនាក់ទំនងជាមួយនិស្សិតមកពីតាមបណ្តាប្រទេសផ្សេងៗទៀតដែលអាចផ្លាស់ប្តូរនូវបទពិសោធន៍ទាក់ទងនឹងគំនិតថ្មីៗស្របទៅតាមបច្ចេកវិទ្យានាពេលបច្ចុប្បន្ន»។
លោក ជេត ជីលីបានរំលឹកថា មុនចូលដល់ការប្រកួតវគ្គផ្តាច់ព្រ័ត្រនេះនិស្សិតដែលមានគ្នា៣នាក់ក្នុងមួយក្រុមនៃបណ្តាប្រទេសនីមួយៗត្រូវរៀបចំសរសេរគម្រោងទាក់ទិននឹងប្រធានបទស្តីពីអភិបាលកិច្ចនិងការអភិវឌ្ឍន៍មេគង្គ ឡានឆាងផ្ញើទៅគណៈកម្មការទាំងប្រទេសពិនិត្យនិងសម្រេចហើយទីបំផុតមានក្រុមនិស្សិតសាក លវិទ្យាល័យភូមិន្ទភ្នំពេញចំនួន៣ក្រុមស្មើនឹង៩នាក់បានឈានចូលមកដល់វគ្គផ្តាច់ព្រ័ត្រនេះ។
លោកសកលវិទ្យាធិការសង្ឃឹមថា ក្រុមនិស្សិតកម្ពុជានឹងទទួលបានលទ្ធផលដូចការប្រកួតប្រជែងកាលពីឆ្នាំ២០១៨កន្លងទៅនៅប្រទេសឡាវដោយទទួលបានចំណាត់ថ្នាក់លេខ១លើការបង្កើតនូវគំនិតថ្មីៗ។
ចំណែកលោក ពិត ចំណាន រដ្ឋមន្ត្រីស្តីទីក្រសួងអប់រំយុវជននិងកីឡាដែលបានអញ្ជើញជាគណៈអធិបតីនៅក្នុងកម្មវិធីការប្រកួតបានមានប្រសាសន៍ ដោយបង្ហាញនូវការគាំទ្រចំពោះកម្មវិធីនេះព្រោះថា នឹងជួយឲ្យយុវជនកម្ពុជាកាន់តែមានសមត្ថភាពខ្ពស់លើការស្រាវជ្រាវដើម្បីឈានទៅរកភាពរីកចម្រើនពិសេសស្របទៅនឹងបដិវត្តឧស្សាហកម្មដំណាក់កាលទី៤ដែលទាមទារឲ្យប្រទេសនានាត្រូវរួមសហការគ្នាយ៉ាងជិតស្និទ្ធដើម្បីអភិវឌ្ឍន៍តំបន់ទន្លេមេគង្គប្រកបដោយចីរភាព។
លោកបានបន្តទៀតថា វាជាការពិតគឺជាការហ្វឹកហាត់មួយសម្រាប់និស្សិតនៅតាមបណ្តាប្រទេសនៅក្នុងតំបន់ទន្លេមេគង្គពិសេសនិស្សិតកម្ពុជាទទួលបាននូវឱកាសឈានទៅសហការជាមួយបណ្តាប្រទេសទាំងនោះពិសេសប្រទេសចិនដែលជាប្រទេសមួយកំពុងតែមានការអភិវឌ្ឍលើវិស័យបច្ចេកវិទ្យាកាន់តែរីកចម្រើននៅក្នុងតំបន់អាស៊ីរបស់យើងនេះ។ អីចឹងបានជាខ្ញុំចាត់ទុកថានេះគឺឱកាសល្អសម្រាប់យុវជនយើងក្នុងការឈានទៅរបស់ខ្លួនទាំងផ្នែកបច្ចេកវិទ្យាទាំងផ្នែកការគ្រប់គ្រងតាមបច្ចេកវិទ្យានាសម័យថ្មីនេះ»។
គួរបញ្ជាក់ថា ការប្រកួតវគ្គផ្តាច់ព្រ័ត្រស្តីពីអភិបាលកិច្ចនិងការអភិវឌ្ឍមេគង្គ ឡានឆាងនេះបានរៀបចំ ដំបូងនៅប្រទេសចិនដើម្បីបណ្តុះចំណេះដឹងដល់និស្សិតនៅតាមប្រទេសទាំង៦មានសមត្ថភាពទៅលើការការពារ គ្រប់គ្រង អភិបាលកិច្ចនិងការអភិវឌ្ឍតំបន់ទន្លេមេគង្គប្រកបដោយនិរន្តរភាព៕
Source: Kampuchea Thmey Daily
0 Comments