ភ្នំពេញ ៖ ជម្លោះរវាងបងប្អូនបង្កើត ដែលជនបង្កជាមនុស្សញៀនថ្នាំដល់កម្រិតបង្កជាជម្លោះជាមួយបងប្អូន និង ក្រុមគ្រួសារឈានទៅដល់ទាញដំបងឈើទៅវាយសំពងលើបងប្រុសរបស់ខ្លួនបណ្ដាលឲ្យបាក់ដៃនិងបាក់ឆ្អឹងជំនីរងរបួសធ្ងន់ ទើបដឹងដល់សមត្ថកិច្ចចុះទៅចាប់ខ្លួនដល់ផ្ទះ កាលពីវេលាម៉ោង៩ និង៥០នាទីព្រឹក ថ្ងៃទី១៩ ខែកុម្ភៈ ឆ្នាំ២០១៩ ស្ថិតនៅក្នុងភូមិត្រពាំងអញ្ចាញ២ សង្កាត់ត្រពាំងក្រសាំង ខណ្ឌពោធិ៍សែនជ័យ។
ជនបង្កឈ្មោះ ឈិត សីហា ហៅយ៉ា ភេទប្រុស អាយុ៣១ឆ្នាំ មុខរបរ កម្មកររោងចក្រ មានស្រុកកំណើត សង្កាត់វាលវង់ ខណ្ឌ៧មករា មានប្រពន្ធឈ្មោះ ប្រាក់ រាតាវុទ្ធី អាយុ២៨ឆ្នាំ មុខរបរ កម្មការនីរោងចក្រ មានកូនប្រុស២នាក់ ក្នុងបន្ទុករស់នៅផ្ទះកើតហេតុខាងលើ។ ចំណែកបងប្រុសរងគ្រោះឈ្មោះ ឈិត ចាន់វិច្ឆិកា អាយុ៣៥ មុខរបរ កម្មកររោងចក្រ រស់នៅផ្ទះកើតហេតុជាមួយគ្នា រងរបួសធ្ងន់ បាក់ដៃ និងបាក់ឆ្អឹងជំនី។
តាមប្រភពព័ត៌មានបានឲ្យដឹងថា ជនសង្ស័យជាមនុស្សប្រើប្រាស់គ្រឿងញៀននិងញៀនថ្នាំដល់កម្រិត មុនកើតហេតុ ជនសង្ស័យបង្កជម្លោះក្នុងគ្រួសារដោយឈ្លោះប្រកែក ជាមួយម្ដាយទើបពេលនោះ បងប្រុសបង្កើតបានលូកមាត់និយាយហាមឃាត់កុំឈ្លោះជាមួយម្ដាយ ពេលនោះក៏ទាក់ពាក្យសម្ដីជាមួយបងប្រុសបន្ថែមទៀត ក៏ឈានទៅដល់ប្រើប្រាស់ ដំបងឈើ និងដែក វាយទៅលើបងបង្កើតរបស់ខ្លួន បណ្តាលឲ្យរងរបួសធ្ងន់ ហើយជេរប្រមាថទាំងម្តាយ បង្កឲ្យភ្ញាក់ផ្អើលដល់ សមត្ថកិច្ចចុះទៅអន្តរាគមន៍ភ្លាមៗ ហើយថែមទាំងជេរគំរាមដល់សមត្ថកិច្ចថែមទៀត។ តែទោះយ៉ាងណាសមត្ថកិច្ចបានចូលទៅចាប់អូស.កជនបង្ករុញឡើងឡាន ដឹកយកមកកាន់ ផ្នែកជំនាញអធិការដ្ឋានខណ្ឌ ដើម្បីអនុវត្តន៍បន្តទៅតាមនីតិវិធី៕
Source: Kampuchea Thmey Daily
0 Comments