AFF U22 ៖​ គ្រូបង្វឹក​ក្រុម​ម៉ាឡេស៊ី សោកស្តាយ​ដែល​ចាញ់ ខណៈ​គ្រូ​កម្ពុជា​រីករាយ​ដែល​ក្រុម​ឈ្នះ

​ក្រុម​កម្ពុជា រកបាន​ជ័យជម្នះ​លើកដំបូង​របស់ខ្លួន​ក្នុង​ប្រកួត​បើកឆាក​ពានរង្វាន់​ជើងឯក​តំបន់​អាស៊ាន AFF U22 Championship​នៅ​ឆ្នាំ ២០១៩ ដែល​កម្ពុជា ទទួល​ធ្វើជា​ម្ចាស់ផ្ទះ​ក្នុង​រាជធានី​ភ្នំពេញ ពោល​គឺ​ក្រោយ​យកឈ្នះ​លើ​ក្រុម​ម៉ាឡេស៊ី ដោយ​លទ្ធផល ១​ទល់​០ នៅ​ល្ងាច​ថ្ងៃ​ច័ន្ទ សប្ដាហ៍​នេះ​ខណៈ​គ្រូបង្វឹក​របស់​ក្រុម​ទាំង​២​លើកឡើង​ខុសគ្នា​ក្រោយ​ចប់​ការប្រកួត​។



នៅក្នុង​សន្និសីទ​សារព័ត៌មាន​ក្រោយ​ចប់​ការប្រកួត​លោក​Ong Kim Swee គ្រូបង្វឹក​របស់​ក្រុម​ម៉ាឡេស៊ី បាន​ប្រាប់​អ្នកសារព័ត៌មាន​ថា​ «​ពិត​ណាស់ មិនល្អ​ឡើយ​សម្រាប់​លទ្ធផល ហើយ​យើង​លេង​មិន​បាន​ល្អ​ទាល់តែសោះ តែ​យ៉ាងណាមិញ​អបអរសាទរ​ដល់ក​ម្ពុ​ជា ពួកគេ​ធ្វើ​បាន​យ៉ាង​ល្អ និង​ធ្វើ​ឲ្យ​ក្រុម​របស់​យើង​មានការ​លំបាក ហើយ​យើង​ក៏បាន​គិត​អំពី​ការសម្រេចចិត្ត​មួយចំនួន​របស់​អាជ្ញាក​ណ្ដា​ល ប៉ុន្តែ​យើង​អាច​ធ្វើ​អ្វី​បាន​? យើង​ត្រូវតែ​ប្រឹង​បន្តទៀត​សម្រាប់​ប្រកួត​ក្រោយ​»​។



​ងាក​មក​មើល​លោក Felix Dalmas គ្រូបង្វឹក​របស់​ក្រុម​កម្ពុជា វិញ​បានបង្ហាញ​ពី​ទស្សនៈ​របស់ខ្លួន​ក្រោយ​កូនក្រុម​រកបាន​ជ័យជម្នះ​ថា «​យើង​បង្កើត​ឱកាស​ជាច្រើន ហើយ​ម៉ាឡេស៊ី ក៏​បង្កើត​ឱកាស​ជាច្រើន​ដូចគ្នា ពួកគេ​ពិតជា​ក្រុម​ដែល​ខ្លាំង ហើយ​ជារួម​ក្រុម​ខ្ញុំ​ឈ្នះ ១​ទល់​០ ខ្ញុំ​សប្បាយចិត្ត​ដែល​យើង​អាច​រក្សា​សំណាញ​ទី​មិន​ឲ្យ​របូត ហើយ​យើង​ធ្វើការ​យ៉ាង​ធ្ងន់​ទាំង​តំបន់​ប្រយុទ្ធ និង​តំបន់​ការពារ​។ ជា​ការពិត​ម៉ាឡេស៊ី ព្យាយាម​រក​គ្រាប់​បាល់​ត្រលប់​មកវិញ ហើយ​យើង​គ្រប់គ្រង​បាន​ទាំងអស់​។ ដូច្នេះ​ខ្ញុំ​មាន​អារម្មណ៍​ថា​ យើង​ពិតជា​ធ្វើបាន​យ៉ាង​ល្អ​»​។



សូម​បញ្ជាក់​ថា ​ពានរង្វាន់ AFF U22 Championship មាន​ក្រុម​ចំនួន​៨​ចូលរួម​ដោយ​ក្នុង​នោះ​ពូ​ល A​មាន វៀតណាម ថៃ ទី​ម័​រ​ខាងកើត និង​ហ្វី​លី​ពិន ខណៈ​ឯ​ក្នុង​ពូ​ល B វិញ​មាន​ឥណ្ឌូណេស៊ី ម៉ាឡេស៊ី មី​យ៉ាន់​ម៉ា និង​ម្ចាស់ផ្ទះ​កម្ពុជា​។ ការប្រកួត​ធ្វើឡើង​ពី​ថ្ងៃ​ទី​១៧ ខែកុម្ភៈ ដល់​ថ្ងៃទី​២ ខែមីនា ឆ្នាំ​២០១៩ ក្នុង​រាជធានី​ភ្នំពេញ​។ សម្រាប់​ប្រកួត​ក្នុង​ពូ​ល B គឺ​ត្រូវ​ប្រកួត​នៅ​ថ្ងៃ​ពុធ ទី​២០ ខែកុម្ភៈ ឆ្នាំ២០១៩ ដោយ​ក្រុម​ឥណ្ឌូណេស៊ី ប៉ះ​ម៉ាឡេស៊ី នៅ​ម៉ោង​៣និង៣០​នាទី​រសៀល ហើយ​កម្ពុជា ទទួល​មី​យ៉ាន់​ម៉ា នៅ​ម៉ោង​៦និង៣០​នាទី​ល្ងាច លើ​ទីលាន​ពហុ​កីឡដ្ឋាន​ជាតិ​។ ចំណែក​ចំណាត់ថ្នាក់​បណ្តោះ​អាសន្ន​ ក្រោយ​ប្រកួត​បាន​ម្នាក់​១​ប្រកួត ក្រុម​កម្ពុជា ឈរ​កំពូល​តារាង​មាន​៣​ពិន្ទុ ហើយ​ក្រុម​មី​យ៉ាន់​ម៉ា ឈរ​លេខ​២ និង​ឥណ្ឌូណេស៊ី ឈរ​លេខ​៣ មាន​១​ពិន្ទុ​ដូចគ្នា​និង​ក្រុម​ម៉ាឡេស៊ី ឈរ​លេខ​៤​បាត​តារាង​តាម​ពិតទៅ​ពានរង្វាន់​ប្រភេទ​យុវជន U22 នេះ​ត្រូវ​បាន AFF សហការគ្នា​បង្កើតឡើង​វិញ នៅ​ឆ្នាំ​២០១៩ ខាងមុខ ក្រោយពី​ខកខាន​ជា​យូរ​មកហើយ ពោលគឺ​តាំងពី​ឆ្នាំ ២០០៥ មកម្ល៉េះ​។ គណៈកម្មការ​ក៏បាន​កំណត់​ដែល​ថា ​ក្រុម​ខ្លាំងជាងគេ​ចំនួន​៤​ក្រុម នៃ​ពានរង្វាន់ AFF U22​នេះ នឹង​ទទួលបាន​កៅអី​ឡើងទៅ​លេង​ក្នុង​វគ្គ​ជម្រុះ​ពាន​បាល់ទាត់​យុវជន​ក្រោម​អាយុ​២៣​ឆ្នាំ (U23) ប្រចាំ​ទ្វីបអាស៊ី (AFC U-23) ផងដែរ៕

Source: Kampuchea Thmey Daily