ភ្នំពេញ ៖ រឿងរ៉ាវអាស្រូវផ្លូវភេទ រវាងបងធម៌និងប្អូនធម៌ជាមន្ដ្រីកងរាជអាវុធហត្ថខណ្ឌដង្កោបន្ទាប់ពីរាប់អានគ្នាយូរៗទៅភាគីខាងប្ដីមានការទុកចិត្តលើប្អូនធម៌ហើយលោកប្អូនធម៌មានឱកាសឆក់យកប្រពន្ធបងធម៌ទៅសម្ងំសោយសុខស្រណុកកាយសប្បាយលើគំនរទុក្ខរបស់ប្ដីនិងបងធម៌ដែលខំទុកចិត្តលើអ្នកទាំងពីរ តែទីបំផុតប្រពន្ធខ្លួននិងប្អូនធម៌បានលេងមួយក្បាច់ស៊ីដាច់ប្រពន្ធបងធម៌ទៅវិញធ្វើឲ្យមហាជនមានការរិះគន់ទៅលើប្អូនធម៌និងនាងជាប្រពន្ធដែលហ៊ានលេងល្បិចឃុបឃិតគ្នាបោះបង់ប្ដីនិងបងធម៌ចោលដូចសំរាម ធ្វើឲ្យប្ដីកើតចិត្តស្ទើរឆ្កួតវង្វេងហើយប៉ុនប៉ងលេបថ្នាំសម្លាប់ខ្លួន៤លើកហើយតែមិនបានសម្រេច។
រឿងរ៉ាវនេះ បានផ្ទុះឡើងនៅថ្ងៃទី១៥ ខែកុម្ភៈ ឆ្នាំ២០១៩ បន្ទាប់ពីបុរសជាប្ដី បានស្រែកឡូឡា ឆ្ការដៃឆ្ការជើង ដោយមិនសុខចិត្តហើយបានហៅទៅដោះស្រាយគ្នានៅសាលាសង្កាត់ចោមចៅ២តែការដោះស្រាយគ្នាមិនបានចប់សព្វគ្រប់ទេដោយសាររឿងនេះ បានធ្លាក់ទៅក្នុងដៃតុលាការអស់ទៅហើយ។
ភាគីខាងប្តីដើមមានឈ្មោះ ង៉ែត ផេង អាយុ៣៩ឆ្នាំ មុខរបរអាជីវករលក់ដូរមានទីលំនៅផ្ទះលេខ៣៨ ភូមិថ្មី សង្កាត់ដង្កោ ខណ្ឌដង្កោ។ ភាគីខាងស្រីអតីតប្រពន្ធ ឈ្មោះ ឈន វ៉ាន់ស៊ីន អាយុ៣៥ឆ្នាំ មុខរបរ ជាអាជីវករ លក់ខោអាវ នៅផ្សារកាណាឌីយ៉ា បច្ចុប្បន្នរស់នៅផ្ទះល្វែង បុរីសន្តិភាព២ ភូមិតំណាក់ត្រយឹង សង្កាត់ចោមចៅ២ ជាមួយភាគីប្តីក្រោយ ជាបុរសសង្ហា ធ្វើការងារមន្ត្រីអាវុធហត្ថខណ្ឌដង្កោ មានឈ្មោះ ឈឹម ចាន់ធី អាយុ៣៨ឆ្នាំ ហើយក៏ជាមនុស្សរាប់អានគ្នា ជាបងធម៌ ប្អូនធម៌ដែរ។
តាមសម្តីភាគីប្តីដើម បានឲ្យដឹងថា ខ្លួនរាប់អានគ្នាជាមួយ បុរសឈ្មោះ ឈន វ៉ាន់ធី ជាមន្ត្រីអាវុធហត្ថខណ្ឌដង្កោ ជាបងប្អូនធម៌ អស់រយៈពេលជាង២ឆ្នាំមកហើយ ស្រឡាញ់គ្នាស្អិតល្មួត ដូចបងប្អូនបង្កើត មិនគួរណាចុងក្រោយ លូកថ្លើមបេះយកប្រពន្ធរបស់បងធម៌ ទៅនែបនិត្យធ្វើជាប្រពន្ធខ្លួន ក្នុងរូបភាពបន្លំឆបោក ដោយប្រពន្ធប្រើល្បិចថា ប្តីដើមអាយុ៤០ចូលជិតមកដល់ហើយ ឆ្នាំគត់បែបនេះ ទាល់តែលែងលះគ្នាបណ្តោះអាសន្នសិន ដើម្បីកុំឲ្យមានគ្រោះថ្នាក់ ហើយទាមទារឲ្យផ្តិតមេដៃ ចាំឆ្នាំផុតគ្រោះនឹងយកគ្នាជាប្ដីប្រពន្ធវិញ ខាងប្តីជឿសម្តីស្រីស្តូកសុខចិត្ត ផ្តិតមេដៃឲ្យនាងបាត់។
ប្រភពបន្ដថា ផ្ទុយទៅវិញបានតែស្នាមមេដៃហើយ ដាក់ប្តឹងឡើងទៅតុលាការ សាលក្រមចេញមកមែនទែន ឥតក្លែងបន្លំទេ អ្នកទាំង២ លែងលះ ផ្តាច់សង្វាក់នឹងគ្នាបាត់ កូន៤នាក់ ប្រុស២នាក់ ស្រី២នាក់ បានទៅខាងប្រពន្ធ តែមិនបានរបស់ទ្រព្យទេ ចិត្តប្រុសចាប់ផ្តើមវិលវល់រារេ ដូចចកអណ្តែតទឹក ទោះជាយំក៏លែងចេញដែរ ស្នាមមេដៃជាភស្តុតាងហើយ ចាប់ផ្តើមខូចចិត្ត ព្យាយាមលេបថ្នាំប៉ុនប៉ងសម្លាប់ខ្លួនចំនួន៤លើកហើយ តែមិនបានសម្រេច ខំសម្របខ្លួនតាមយថាកម្ម។
ប្រភពបន្ដថា ខណៈស្ងាត់ៗ អតីតប្រពន្ធ ទៅលួចដកលុយពីកុងធនាគារអស់ ប្រើល្បិចសុំក្រៅបន្ថែមទៀត សរុបជាង៨ពាន់ដុល្លារ ហើយគេចខ្លួនបាត់ អស់រយៈពេលជាង១ខែ ក្រោយមានសាលក្រមលែងលះ របស់តុលាការរួចមក ស្រាប់តែនៅល្ងាចថ្ងៃទី១៥ ខែកុម្ភៈ ឆ្នាំ២០១៩ តាមស្វែងរកឃើញ អតីតប្រពន្ធ ទិញផ្ទះល្វែងថ្មី ក្នុងបុរីសន្តិភាព២ សម្ងំសោយសុខ ស្រណុកមានអ្នកស្អំចិត្ត ជាប្អូនធម៌ទៅវិញ ទើបឆោឡោ ភ្ញាក់ផ្អើលស្រែកឡូឡាឡាំប៉ា រករឿងបាត់លុយពីក្នុងកុងធនាគារ ខ្លួនចង់បានសំណង ទាមទារនូវទឹកប្រាក់ចំនួន៥៥០០ដុល្លារ ទើបនាំគ្នាមកជជែករកខុសត្រូវនៅសាលាសង្កាត់ចោមចៅ២ នាព្រឹកថ្ងៃទី១៦ ខែកុម្ភៈនេះ តែមិនដាច់ស្រេច ដោយសាររឿងរ៉ាវ របស់គ្រួសារខាងលើ មានតែតុលាការទេជាអ្នកសម្រេច ហើយចំពោះករណីលួចលុយ ឬបាត់លុយយ៉ាងណានោះ អតីតប្រពន្ធទៅដកនៅធនាគារ ឯខាងសង្កាត់អូរឡាំពិក ទើបអាជ្ញាធរ សមត្ថកិច្ចពន្យល់ណែនាំ ឲ្យប្តឹងតវ៉ាយ៉ាងណា ទៅតុលាការវិញ ចំណែកលុយកាក់ បាត់ក្នុងកុងវិញ មានតែទៅសាកសួរនៅខាងធនាគារដែលខ្លួនតម្កល់លុយនោះ។ ភាគីខាងស្រីវិញ ឆ្លើយយ៉ាងខ្លី ដោយសម្តីសំអាងលើ តុលាការបាន ចេញសាលក្រមរួចហើយ លែងលះគ្នា ចំពោះលុយនៅធនាគារ ខ្លួនមិនបានលួចឡើយ។
ចំណែកប្រុសសង្ហា អះអាងថា ជាមន្ត្រីអាវុធហត្ថ ហើយត្រូវជាប្តីក្រោយរបស់ស្ត្រីខាងលើវិញ ឆ្លើយយ៉ាងខ្លី ដូចគ្នាថា រូបគេមិនបានលួចឆក់ប្លន់ យកប្រពន្ធបងធម៌ឡើយ ព្រោះតែឃើញបងធម៌ មានសាលក្រមពីតុលាការ លែងលះគ្នាហើយ ទើបរូបគេ ហ៊ានយក បងធម៌ស្រីធ្វើជាភរិយា។
ភាពចម្រូងចម្រាសគ្នា រវាង៣ភាគីខាងលើ ទោះជាភាគីខាងប្តីដើម ទាមទារលុយខ្លួន៥៥០០ដុល្លារ ដើម្បីបញ្ចប់រឿងយ៉ាងណាក្តី មិនទាន់ដាច់ស្រេចនៅឡើយ ចុងក្រោយប្រកែកឈ្លោះគ្នាមួយប្រាវ សមត្ថកិច្ច អាជ្ញាធរ ចាប់បំបែកឲ្យទៅផ្ទះវិញរៀងៗខ្លួន៕
Source: Kampuchea Thmey Daily
0 Comments