កងទ័ពអូស្ត្រាលីត្រូវបានដាក់ពង្រាយដើម្បីដោះស្រាយគ្រោះមហន្តរាយទឹកជំនន់ដែលមានតែម្តងគត់ក្នុងមួយសតវត្សរ៍ដែលបានជន់លិចផ្ទះសម្បែង សាលារៀននិងព្រលានយន្តហោះនៅភាគខាងជើងប្រទេសដោយបង្ខំឲ្យមនុស្សរាប់រយនាក់ភៀសខ្លួននិងនាំឲ្យមានសត្វក្រពើនៅតាមដងផ្លូវ។
កងកម្លាំងការពារអូស្ត្រាលីបាននាំយកបាវខ្សាច់ចំនួន៧០,០០០បាវ, ដាក់ពង្រាយយានយន្តដឹកទំនិញនិងបានជួយប្រជាពលរដ្ឋដែលនៅជាប់គាំងលើដំបូលផ្ទះរបស់ពួកគេកាលពីថ្ងៃចន្ទខណៈដែលភ្លៀងរដូវមូសុងបានធ្លាក់យ៉ាងជោគជាំនៅរដ្ឋ Queensland ភាគខាងជើង។
ជាធម្មតា ភាគខាងជើងប្រទេសអូស្ត្រាលីតែងតែជួបប្រទះភ្លៀងធ្លាក់ខ្លាំងនៅរដូវមូសុងប៉ុន្តែភ្លៀងធ្លាក់នាពេលថ្មីៗនេះបានធ្វើឲ្យតំបន់ខ្លះទទួលបានទឹកភ្លៀងដ៏ធ្ងន់ធ្ងរក្នុងរយៈពេលមួយសប្តាហ៍។ អាជ្ញាធរត្រូវបង្ខំចិត្តបើកទំនប់វារីអគ្គិសនីមួយកាលពីរាត្រីថ្ងៃអាទិត្យដោយបញ្ចេញនូវអ្វីដែលគេហៅថា “លំហូរល្បឿនដ៏គ្រោះថ្នាក់និងលឿន”។
នៅទីក្រុង Townsville ដែលរងការវាយប្រហារយ៉ាងធ្ងន់ធ្ងរ, រថយន្តភាគច្រើនត្រូវបានលិចលង់ជាមួយទឹកជម្រៅត្រឹមចង្កេះ។
ប្រជាពលរដ្ឋមិនមែនគ្រាន់តែប្រឈមមុខនឹងទឹកជំនន់ភ្លាមៗ ការបាក់ដីនិងការដាច់ចរន្តអគ្គីសនីប៉ុណ្ណោះទេប៉ុន្តែថែមទាំងត្រូវប្រឈមមុខនឹងសត្វក្រពើទឹកប្រៃជាច្រើនក្បាលដែលគេមើលឃើញនៅតាមដងផ្លូវផងដែរ។
ប៉ូលិសរដ្ឋ Queensland បានចេញការព្រមានដល់ប្រជាជនកុំឲ្យចូលក្នុងទឹកជំនន់។
សេវាគ្រាអាសន្នបានតស៊ូដើម្បីឆ្លើយតបនឹងទំហំនៃគ្រោះមហន្តរាយនេះខណៈមនុស្សជាង១,១០០នាក់បានអំពាវនាវសុំជំនួយ។
មេបញ្ជាការក្នុងតំបន់លោក Scott Winter បាននិយាយថា “ទូកតូចៗបានធ្វើការពេញមួយយប់ដើម្បីជម្លៀសសមាជិកសហគមន៍”។
អ្នកភូមិ Townsville ប្រហែល៤០០នាក់បានស្វែងរកទីជំរកនៅបន្ទាយយោធា Lavarak ។
ក្រុមមន្ត្រីបាននិយាយថា ផ្ទះរហូតដល់ទៅ២០,០០០ខ្នងមានហានិភ័យនៃការជន់លិចប្រសិនបើភ្លៀងនៅតែបន្តធ្លាក់៕ AFP
Source: Kampuchea Thmey Daily
0 Comments