ភ្នំពេញ ៖ លោកស្រីសាស្ដ្រាចារ្យ ទុង រដ្ឋាវី ប្រធានមជ្ឈមណ្ឌលជាតិគាំពារមាតានិងទារកបានបង្ហាញនូវការគាំទ្រទាំងស្រុង ចំពោះអនុសាសន៍របស់សម្តេចកិត្តិព្រឹទ្ធបណ្ឌិតប៊ុនរ៉ានី ហ៊ុនសែនប្រធានកាកបាទក្រហមកម្ពុជា ជាឥស្សរជនឆ្នើមថ្នាក់ជាតិ នៃផែនការសកម្មភាពរួមអគ្គលេខាធិការអង្គការសហប្រជាជាតិ ដើម្បីសុខភាពស្ត្រី និងកុមារ ព្រោះជួយធ្វើឲ្យស្ដ្រីមានផ្ទៃពោះយល់ដឹងកាន់តែច្បាស់និងយកចិត្តទុកដាក់ថែមទៀតចំពោះសុខភាពរបស់ខ្លួន។
លោកស្រីសាស្ដ្រាចារ្យ ទុង រដ្ឋាវី បានបន្តថា ជាងនេះទៅទៀតអនុសាសន៍ទាំងនេះមិនត្រឹមតែជួយក្នុងការជំរុញឲ្យស្ត្រីទៅទទួលបាននូវសេវាទៅតាមការណែនាំរបស់គ្រូពេទ្យប៉ុណ្ណោះទេថែមទាំងជួយបង្ការនិងទប់ស្កាត់ការពារកុំឲ្យឆ្លងជំងឺអេដស៍និងស្វាយសំដៅឈានទៅលុបបំបាត់ការឆ្លងមេរោគនេះនៅឆ្នាំ២០៣០ខាងមុខនេះផងដែរ។
យោងតាមសារលិខិតមួយផ្ញើជូនបង-ប្អូនជនរួមជាតិ ក្នុងទិវាជាតិសុខភាពមាតា ទារក និងកុមារថ្ងៃទី២១កុម្ភៈសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានលើកទឹកចិត្តឲ្យស្ត្រីមានផ្ទៃពោះទាំងអស់ត្រូវស្ម័គ្រចិត្តធ្វើតេស្តឈាមរកមេរោគអេដស៍និងមេរោគស្វាយដើម្បីលុបបំបាត់ពិការភាពនិងការចងជំងឺទាំងនេះពីម្តាយទៅកូន។
ជាមួយគ្នានេះដែរ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានជំរុញឲ្យស្ត្រីមានគភ៌ទាំងអស់ ត្រូវទៅពិគ្រោះយោបល់ជាមួយគ្រូពេទ្យ ឆ្មបជំនាញនៅមណ្ឌលសុខភាព ឬមន្ទីរពេទ្យដែលនៅជិតផ្ទះតាមកាលកំណត់ដើម្បីទទួលយកសេវាបង្ការ ព្យាបាលឲ្យបានទៀងទាត់និងត្រូវទៅសម្រាលកូន នៅមណ្ឌលសុខភាព ឬមន្ទីរពេទ្យជាមួយគ្រូពេទ្យដែលទទួលបានការបណ្តុះបណ្តាលត្រឹមត្រូវនិងទៅពិនិត្យសុខភាពក្រោយពេលសម្រាលទាំងមាតា និងទារក និងទទួលថ្នាំបង្ការជំងឺ១១មុខតាមការកំណត់របស់គ្រូពេទ្យ។
ទន្ទឹមនឹងនេះ សម្តេចកិត្តិព្រឹទ្ធបណ្ឌិត ដែលជាឥស្សរជនឆ្នើមថ្នាក់ជាតិ នៃផែនការសកម្មភាពរួមអគ្គលេខាធិការអង្គការសហប្រជាជាតិ ដើម្បីសុខភាពស្ត្រី និងកុមារផងនោះក៏បានណែនាំដល់ស្ត្រីត្រូវបំបៅទារកដោយទឹកដោះម្តាយតែមួយមុខគត់ចាប់ពីពេលទារកប្រសូតភ្លាមរហូតដល់ ទារកមានអាយុ៦ខែ និងផ្តល់អាហារបន្ថែមគ្រប់មុខនិងគ្រប់ជីវជាតិរួមជាមួយការបន្តបំបៅទឹកដោះម្តាយ រហូតដល់កុមារមានអាយុយ៉ាងតិច២ឆ្នាំ។
ជាងនេះទៅទៀត នៅពេលឃើញសញ្ញាគ្រោះថ្នាក់ណាមួយនៃជំងឺរលាកផ្លូវដង្ហើម ជំងឺរាក ឬ ជំងឺឆ្លងដទៃទៀត ឬ ទារក ឬ កុមារតូច មានរាងកាយស្គមនិងមិនឡើងទម្ងន់ត្រូវប្រញាប់យកទៅកាន់មន្ទីរពេទ្យភ្លាម ដើម្បីពិគ្រោះយោបល់ និងទទួលការព្យាបាលឲ្យបានទាន់ពេលវេលា។
នៅក្នុងសារលិខិតដដែលនោះ សម្តេចកិត្តិព្រឹទ្ធបណ្ឌិត បានអំពាវនាវដល់ថ្នាក់ដឹកនាំមន្ត្រីរាជការ បុគ្គលិកសុខាភិបាល អ្នកផ្តល់សេវាទាំងអស់ចូលរួមគាំទ្រអនុវត្តគោលនយោបាយ គាំពារសង្គមរបស់រាជរដ្ឋាភិបាលឲ្យមានប្រសិទ្ធភាពខ្ពស់ ដើម្បីឈានទៅសម្រេចបានគោលដៅកាត់បន្ថយអត្រាការស្លាប់របស់មាតា ការស្លាប់របស់ទារកក្នុងផ្ទៃ ការស្លាប់របស់ទារកទើបនឹងកើត និងការស្លាប់របស់កុមារអាយុក្រោម៥ឆ្នាំតាមការកំណត់នូវ គោលដៅអភិវឌ្ឍន៍ប្រកបដោយចីរភាពឆ្នាំ២០៣០៕
Source: Kampuchea Thmey Daily
0 Comments