ភ្នំពេញ ៖ បុរសទំនើងម្នាក់ ដែលតែងតែដើរវាយតប់គេឯងបង្ករបួសស្នាមត្រូវបានសមត្ថកិច្ចនគរបាលឃាត់ខ្លួន កាលពីថ្ងៃទី១៥ ខែកុម្ភៈ ឆ្នាំ២០១៩ នៅក្នុងភូមិបុរីកម្មករ (អតីតភូមិត្រពាំងឈូក) សង្កាត់ទឹកថ្លា ខណ្ឌសែនសុខ បន្ទាប់ពីជននេះ បានមកលួចឆ្មក់វាយតប់គេបែកមុខបែកមាត់ដោយគ្មានមូលហេតុរួចរត់គេចខ្លួន។
ជនទំនើងរូបនេះឈ្មោះ ម៉ឹង ឯលវិចិត្រ ហៅចិត្រ ភេទប្រុស អាយុ៣២ឆ្នាំ ជនជាតិយួន ចូលសញ្ជាតិខ្មែរ គ្មានមុខរបរ ប្រជាជននិយាយថា បុរសម្នាក់នេះជាក្រុមជនសេពគ្រឿងញៀន ទីលំនៅផ្ទះលេខ២២ ភូមិបុរីកម្មករ(ម្តុំមុខពេទ្យលោកសង្ឃ)។
ប៉ូលិសនិយាយថា ជនសង្ស័យខាងលើត្រូវបានឃាត់ខ្លួនតាមបណ្តឹងរបស់ជនរងគ្រោះ២នាក់ ១.ឈ្មោះ ឡេង ស្ថាបនា ភេទប្រុស អាយុ២០ឆ្នាំ មុខរបរនិស្សិតមានទីលំនៅម្តុំសំណង់១២ ខណ្ឌទួលគោក។ ២.ឈ្មោះ គង់ ស្រីនិះ ភេទស្រីអាយុ២៣ឆ្នាំ មុខរបរបុគ្គលិកក្រុមហ៊ុន E.M.A មានទីលំនៅក្នុងភូមិកើតហេតុ។
ជនរងគ្រោះខាងលើបានរៀបរាប់ប្រាប់សមត្ថកិច្ចថា កន្លងមកកាលពីថ្ងៃទី០៩ ខែកុម្ភៈ ឆ្នាំ២០១៩ វេលាម៉ោង៥ កន្លះល្ងាច នេះជនដៃដល់ខាងលើបានកាន់ដំបងឈើជ្រុងលបមកវាយពួកខ្លួនដោយមិនដឹងខ្លួន ខណៈកំពុងតែឈនៅលើចិញ្ចើមផ្លូវសាធារណៈក្នុងភូមិ ហើយគេបានគេចខ្លួនបាត់ភ្លាមៗ។
ជនរងគ្រោះបន្តថា ក្រោយមកទៀតនៅវេលាម៉ោង៦ល្ងាច ថ្ងៃទី១៤ ខែកុម្ភៈ ឆ្នាំ២០១៩ ខណៈដែលពួកខ្លួនបានកំពុងតែអង្គុយនៅលើម៉ូតូក្នុងភូមិបុរីកម្មករ ក៏ស្រាប់តែជនដៃដល់ឈ្មោះ ម៉េង ឯលវិចិត្រ បានមកលបឆ្មក់វាយលើផ្ទៃមុខពួកគេទាំង២នាក់ បណ្តាលឲ្យជាំមុខនិងបែកមាត់ រួចគេ(ជនដៃដល់)បានរត់គេចខ្លួនបាត់ទៀត។ ភ្លាមៗនោះជនរងគ្រោះក៏បានមកដាក់ពាក្យបណ្តឹងនៅប៉ុស្តិ៍នគរបាលរដ្ឋបាលទឹកថ្លា ដើម្បីសុំឲ្យជួយអន្តរាគមន៍ចាប់ខ្លួនជនបង្កល្មើសតាមច្បាប់។
នៅថ្ងៃបន្ទាប់ប៉ូលិសបានបញ្ជូនកម្លាំងសម្ងាត់តាមឃ្លាំមើលជនដៃដល់ ហើយក៏បានប្រទះឃើញជនសង្ស័យកំពុងតែឈរនៅលើផ្លូវបេតុងក្នុងភូមិបុរីកម្មករដោយមានកាន់កាំបិតមួយផង ក៏បានបញ្ជូនកម្លាំងមកចាប់ខ្លួនតែម្តង នៅវេលាម៉ោង៣រសៀល ថ្ងៃទី១៥ ខែកុម្ភៈ ឆ្នាំ២០១៩ យកមកសួរនាំនិងបញ្ជូនទៅតុលាការតាមបណ្តឹងរបស់ជនរងគ្រោះទាំង២នាក់ខាងលើ៕
Source: Kampuchea Thmey Daily
0 Comments