កាលពីថ្ងៃអាទិត្យ ប្រធានាធិបតីវេណេហ្ស៊ូអេឡាលោក Nicolas Maduro បានច្រានចោលឱសានវាទរបស់បណ្តាប្រទេសអឺរ៉ុប ដែលអំពាវនាវឲ្យមានការបោះឆ្នោតជាបន្ទាន់មួយ បន្ទាប់ពីមេដឹកនាំគណបក្សប្រឆាំងលោក Juan Guaido បានប្រកាសខ្លួនឯងថាជាមេដឹកនាំស្របច្បាប់របស់ប្រទេសអាមេរិកឡាទីនមួយនេះ។
រដ្ឋសហភាពអឺរ៉ុបចំនួនប្រាំពីរបានកំណត់យកថ្ងៃអាទិត្យដើម្បីឲ្យលោក Maduro អំពាវនាវឲ្យមានការបោះឆ្នោតប្រធានាធិបតីបើមិនដូច្នោះទេពួកគេនឹងទទួលស្គាល់ប្រធានសភាវ័យ៣៥ឆ្នាំរូបនេះជាប្រធានាធិបតីបណ្តោះអាសន្ន។
យ៉ាងណាក៏ដោយ លោក Maduro បាននិយាយនៅក្នុងបទសម្ភាសន៍មួយជាមួយស្ថានីយទូរទស្សន៍អេស្ប៉ាញ Sexta ថា លោកមិនរងសម្ពាធពីអ្នកដែលអំពាវនាវឲ្យលោកចុះចេញនោះទេ។
លោក Maduro បាននិយាយក្នុងបទសម្ភាសន៍នៅទីក្រុង Caracas ថា “ហេតុអ្វីបានជាសហភាពអឺរ៉ុបត្រូវតែប្រាប់ប្រទេសមួយនៅក្នុងពិភពលោកដែលមានការបោះឆ្នោតរួចទៅហើយថា ខ្លួនត្រូវតែធ្វើការបោះឆ្នោតប្រធានាធិបតីម្តងទៀតដោយសារតែពួកគេមិនត្រូវបានឈ្នះដោយសម្ព័ន្ធមិត្តស្តាំនិយមរបស់ពួកគេនោះ?”។
លោក Maduro បាននិយាយថា “ពួកគេកំពុងដាក់សម្ពាធលើយើងជាមួយឱសានវាទដើម្បីបង្ខំឲ្យយើងស្ថិតក្នុងស្ថានភាពប្រឈមមុខគ្នាមួយ”។
ទោះបីជាយ៉ាងណាក៏ដោយ លោកបានគាំទ្រផែនការសម្រាប់កិច្ចប្រជុំមួយរបស់ប្រទេសអាមេរិកឡាទីនមួយនេះជាមួយសហភាពអឺរ៉ុបនៅក្នុងកិច្ចប្រជុំ “ក្រុមទំនាក់ទំនង” ក្នុងទីក្រុង Montevideo នៅថ្ងៃព្រហស្បតិ៍សប្តាហ៍ក្រោយព្រោះវាអាចនាំឲ្យមានការសន្ទនាមួយក្នុងចំណោមពលរដ្ឋវេណេហ្ស៊ូអេឡាដើម្បីដោះស្រាយបញ្ហារបស់យើង។
ហើយគាត់បានអំពាវនាវឲ្យលោក Guaido ជួបពិភាក្សាទល់មុខគ្នាជាមួយគាត់ប៉ុន្តែត្រូវបានលោក Guaido បដិសេធរួចទៅហើយ។
គួរបញ្ជាក់ជាថ្មីថា លោក Guaido បានបង្កភាពភ្ញាក់ផ្អើលយ៉ាងខ្លាំងនៅលើពិភពលោកកាលពីថ្ងៃទី២៣ខែមករានៅពេលដែលគាត់បានប្រកាសខ្លួនឯងជាប្រធានាធិបតីស្តីទីនៅឯការជួបជុំរបស់គណបក្សប្រឆាំង។
លោក Guaido កំពុងព្យាយាមបង្ខំឲ្យមេដឹកនាំសង្គមនិយមចុះចេញពីអំណាចដូច្នេះគាត់អាចបង្កើតរដ្ឋាភិបាលអន្តរកាលនិងរៀបចំការបោះឆ្នោតប្រធានាធិបតីថ្មី៕
Source: Kampuchea Thmey Daily
0 Comments