ភ្នំពេញ ៖ លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្ដ្រី រដ្ឋមន្ដ្រីក្រសួងទំនាក់ទំនង ជាមួយរដ្ឋសភា ព្រឹទ្ធសភា និងអធិការកិច្ច បានថ្លែងថា តាមរយៈទិវាសិទ្ធិនារីអន្តរជាតិ៨មីនានេះនារីត្រូវបានរំដោះចេញពីសម្ពាធជាច្រើនរហូតមានសមភាពស្មើនឹងបុរសដែរ។ លោកជំទាវកិត្តិសង្គហបណ្ឌិតថ្លែងបែបនេះខណៈជួបសំណេះសំណាល ជាមួយនារីក្រសួង អធិការកិច្ច ប្រមាណជាង៤០០នាក់ ក្នុងឱកាសទិវាប្រារព្ធសិទ្ធិនារី ៨មីនា ឆ្នាំ២០១៩ នៅក្រសួងអធិការកិច្ច ក្រោមប្រធានបទ លើកកម្ពស់សមភាពយេនឌ័រ និងការគាំពារសង្គមដើម្បីអភិវឌ្ឍន៍ធនធានមនុស្ស ពិធីនេះបានប្រព្រឹត្ដធ្វើនៅថ្ងៃពុធ ០១កើតខែផល្គុន ឆ្នាំចសំរឹទ្ធិស័ក ព.ស២៥៦២ ត្រូវនិងថ្ងៃទី ០៦មីនា ឆ្នាំ២០១៩។
លោកស្រី អ៊ឹង កន្ថាផាវី រដ្ឋមន្ដ្រីក្រសួងកិច្ចការនារី បានបញ្ជាក់ថា ស្ត្រីនៅក្នុងសង្គមកម្ពុជា មានស្ត្រីជាច្រើនរូបបានឋានៈ ជាអ្នកសម្រេចចិត្ត នៅលើវិស័យសាធារណៈ និងនយោបាយ នៅក្នុងនោះ មានចន្លោះឆ្នាំ២០០៩ដល់ឆ្នាំ២០១៧ ចំនួនស្ត្រីជាមន្ត្រីរាជការកើនឡើង ជាលំដាប់ពី ៣៤% ទៅ៤១%។ រាជរដ្ឋាភិបាលបានតែងតាំងស្ត្រីជាអភិបាលរងខេត្ត នៃគណៈអភិបាលរាជធានីខេត្ត២៦រូប អភិបាលក្រុង ស្រុក ខណ្ឌ ជាស្ត្រី៦រូប ស្ត្រីជាអភិបាលរង នៃគណៈអភិបាលក្រុង ស្រុក ខណ្ឌ១៨៦រូប។ ក្នុងឆ្នាំ២០១៩ ស្ត្រីជាឯកអគ្គរាជទូត មានចំនួន០៤រូប និងមន្ត្រីការទូតជាស្ត្រីដែលកំពុងប្រចាំការនៅបរទេសមានចំនួន៤៩រូប។
លោកស្រីបានបញ្ជាក់ថា កម្ពុជាសម្រេចបាននូវគោលដៅអភិវឌ្ឍសហវត្សរ៍មុនឆ្នាំកំណត់ លើសុខភាពមាតានិងទារក។ អំពើហិង្សានិងការរំលោភនានាលើស្ត្រីក៏បានថយចុះគួរឲ្យកត់សម្គាល់ផងដែរ ។ ក្រសួងកិច្ចការនារី គណៈកម្មាធិការជាតិលើកកម្ពស់សីលធម៌សង្គម តម្លៃស្ត្រីនិងគ្រួសារខ្មែរ និងក្រុមប្រឹក្សាជាតិកម្ពុជាដើម្បីស្ត្រី ក្នុងការធ្វើឲ្យកាន់តែប្រសើរឡើងនូវស្ថានភាពជីវភាព សិទ្ធិ ឋានៈ និងតួនាទីរបស់ស្ត្រីកម្ពុជា។ ជោគជ័យដ៏ធំធេងទាំងអស់នេះ បានឆ្លើយតបជាវិជ្ជមានទៅនឹងផែនការយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាលដើម្បី “កំណើន ការងារ សមធម៌ និងប្រសិទ្ធភាព” និងផែនការយុទ្ធសាស្ត្រនារីរតនៈរបស់ក្រសួងកិច្ចការនារី។ សម្តេចប្រធានរដ្ឋសភា លើកទឹកចិត្តដល់រាជរដ្ឋាភិបាល ជាពិសេសក្រសួងកិច្ចការនារី បន្ត និងជំរុញការអនុវត្តគោលនយោបាយជាតិខាងលើនេះ ឲ្យកាន់តែខ្លាំងក្លាថែមទៀត ដើម្បីឧត្តមប្រយោជន៍របស់ស្ត្រី និងក្មេងស្រី ក៏ដូចជាប្រជាជនកម្ពុជាទាំងមូល។
លោកជំទាវកិត្តិសង្គហបណ្ឌិតម៉ែន សំអន ថ្លែងបន្ថែមថា ដើម្បីលើកស្ទួយនូវតួនាទីស្ត្រីដែលជាឆ្អឹងខ្នងនៃសេដ្ឋកិច្ច និងសង្គមជាតិ ក្នុងកិច្ចគាំពារសង្គមឲ្យមានប្រសិទ្ធភាពនោះ សូមអំពាវនាវដល់អគ្គនាយកដ្ឋានទាំង៥ នៃក្រសួងអធិការកិច្ច ត្រូវបន្ដអនុវត្ដ បង្កើនស្នាដៃ និងសហការឲ្យបានល្អជាមួយ ដៃគូអភិវឌ្ឍន៍ សង្គមស៊ីវិល វិស័យឯកជន។
ថ្ងៃនេះ ក្រសួងអធិការកិច្ច បានប្រារព្ធទិវាអន្តរជាតិនារី ៨មីនា ខួបលើកទី១០៨ ក្រោមប្រធានបទ លើកកម្ពស់សមភាពយេនឌ័រ និងការគាំពារសង្គម ដើម្បីអភិវឌ្ឍធនធានមនុស្ស គឺមានអត្ថន័យជ្រាលជ្រៅ និងកិត្តិសព្ទបំផុត។ ពិធីអបអរសាទរទិវាអន្តរជាតិនារី ៨ មីនា ត្រូវបានពិភពលោកប្រារព្ធធ្វើឡើងជារៀងរាល់ឆ្នាំ ដើម្បីរំលឹកនូវការតស៊ូ និងគំរូវីរភាពរបស់នារីៗក្នុងការទាមទារសិទ្ធិសេរីភាព និងគេចផុតពីទង្វើជិះជាន់នានា។ សម្រាប់នៅកម្ពុជាមិនថាតែសិទ្ធិនារី ឬបុរសនោះឡើយ គឺត្រូវបានបាត់បង់អស់ក្នុងរបបកម្ពុជាប្រជាធិបតេយ្យប្រល័យពូជសាសន៍ ប៉ុល ពត។ សិទ្ធិសេរីភាពរបស់ប្រជាពលរដ្ឋខ្មែរ ព្រមទាំងស្ត្រីផងបានកើតមានជាថ្មីក្រោយរបបដ៏យង់ឃ្នងរបស់ ប៉ុល ពត ត្រូវបានវាយផ្តួលរំលំនៅថ្ងៃទី៧ ខែមករា ឆ្នាំ១៩៧៩។ ចាប់តាំងពីថ្ងៃរំដោះរហូតដល់ពេលបច្ចុប្បន្នរាជរដ្ឋាភិបាលកម្ពុជា តែងបានយកចិត្តទុកដាក់ជានិច្ចក្នុងការលើកកម្ពស់ស្ត្រី រហូតបង្កើតបានជាពាក្យស្លោកថា ស្ត្រីជាឆ្អឹងខ្នងសេដ្ឋកិច្ចជាតិ។ នារីបានធ្វើសកម្មភាពបង្កើតស្នាដៃ និងបានចូលរួមចំណែកទទួលនិងការតែងតាំងដោយរាជរដ្ឋាភិបាលបានផ្ដល់នូវការលើកទឹកចិត្ដ។ ជាទីបញ្ចប់លោកជំទាវកិត្តិសង្គហបណ្ឌិតបានថ្លែងថា នារីយើងមានការអភិវឌ្ឍលើគ្រប់វិស័យ ទាំងផ្លូវចិត្ដ ផ្លូវកាយ ក្នុងនោះ ក៏បានមានសិទ្ធិសេរីភាពគ្រប់យ៉ាង ដូចជាមានសិទ្ធិប្រកប មុខរបរក្នុងការធ្វើអាជីវកម្ម ពាណិជ្ជកម្ម ឧស្សាហកម្ម កសិកម្ម វប្បធម៌ ទេសចរណ៍ និងការគោរពនូវទំនៀមទម្លាប់ប្រពៃណី ច្បាប់ពីការដឹងគុណ ដល់បងប្អូនញាតិមិត្ត៕
Source: Kampuchea Thmey Daily
0 Comments