ភ្នំពេញ ៖ ថ្លែងនៅក្នុងពិធីអបអរសាទរខួប១០០ឆ្នាំ(១៩១៩-២០១៩ )របស់អង្គការអន្តរជាតិខាងការងារ និង ខួប៥០ឆ្នាំ (១៩៦៩ -២០១៩) នៃសមាជិកភាពរបស់កម្ពុជានៅអង្គការអន្តរជាតិខាងការងារក្រោមប្រធានបទ «បង្កើនយុត្តិធម៌សង្គមលើកកម្ពស់ការងារសមរម្យ » កាលពីព្រឹកថ្ងៃទី២៨ ខែមីនា ឆ្នាំ២០១៩ នៅវិមានសន្តិភាព សម្តេចតេជោ ហ៊ុន សែន ប្រមុខរាជរដ្ឋាភិបាលកម្ពុជា បានមានប្រសាសន៍ឲ្យដឹងថា រាជរដ្ឋាភិបាលបានបង្កើតការងារធ្វើជូនប្រជាពលរដ្ឋបានយ៉ាងច្រើនក្នុងអត្រា៩៩,៣ % នៃកម្លាំងពលកម្មសរុបប្រមាណ ១០ លាននាក់។
សម្តេចតេជោ ហ៊ុន សែន បានមានប្រសាសន៍ថា «បច្ចុប្បន្ននេះរាជរដ្ឋាភិបាលបានបង្កើតការងារធ្វើជូនប្រជាពលរដ្ឋបានយ៉ាងច្រើនក្នុងអត្រា៩៩,៣ % នៃកម្លាំងពលកម្មសរុបប្រមាណ ១០លាននាក់ រួមមានកម្មករនិយោជិតសេដ្ឋកិច្ចក្នុងប្រព័ន្ធជិត ១លាន ៥សែននាក់កម្មករ និងនិយោជិតសេដ្ឋកិច្ចក្រៅប្រព័ន្ធជិត ២,៤លាននាក់ វិស័យកសិកម្មប្រមាណជាង ៤ លាននាក់ ពលករធ្វើការនៅក្រៅប្រទេសចំនួនប្រមាណ ១លាន ២សែននាក់ និងមន្ត្រីសាធារណៈចំនួនប្រមាណជាង ៥សែននាក់»។
ដើម្បីជំរុញការអនុវត្តគោលនយោបាយស្ដីពីការអភិវឌ្ឍវិស័យឧស្សាហកម្ម មុខរបរនិងការងារនិងការគាំពារសង្គម ជាពិសេសដើម្បីលើកកម្ពស់ជីវភាពសុខុមាលភាពកម្មករនិយោជិតនិងទំនាក់ទំនងវិជ្ជាជីវៈ សម្តេចតេជោនាយករដ្ឋមន្ត្រីបានចុះជួបផ្ទាល់ដើម្បីសំណេះសំណាលនិងសាកសួរសុខទុក្ខកម្មករនិយោជិតគិតចាប់ពីថ្ងៃទី២០ ខែសីហា ឆ្នាំ២០១៧ មកទល់ថ្ងៃទី២៨ ខែមីនា ឆ្នាំ២០១៩ គឺមានរយៈពេល ១៩ខែ និង ៨ថ្ងៃ បានចំនួន ៦៦លើក សរុបកម្មករនិយោជិតចំនួន ៩៥០ ០០០ នាក់ ដែលតាមរយៈនេះ សម្តេចបានរកឃើញបញ្ហាហើយបានដាក់ចេញនូវគោលការណ៍ និង វិធានការជាច្រើន ដែលបានធ្វើនិងបន្តផ្តោតការយកចិត្តទុកដាក់ដូចខាងក្រោម៖
ទី១-អនុវត្តគោលនយោបាយ ធានាការគោរពសិទ្ធិការងារ លក្ខខណ្ឌការងារស្របតាមច្បាប់និងអនុសញ្ញាអន្តរជាតិខាងការងារ ដែលកម្ពុជាបានផ្ដល់សច្ចាប័ន។ រាជរដ្ឋាភិបាលបានចាត់ទុកការអនុវត្តសិទ្ធិការងារគឺជាការអនុវត្តសិទ្ធិមនុស្សដោយបានដាក់ចេញនូវនយោបាយផ្សាភ្ជាប់ពាណិជ្ជកម្មទៅនឹងលក្ខខណ្ឌការងារសហការជាមួយគម្រោងឃ្លាំមើលលក្ខខណ្ឌការងារនៅកម្ពុជាដែលបច្ចុប្បន្នជាគម្រោងរោងចក្រកាន់តែប្រសើរនៅកម្ពុជា(ILO-BFC)ដែលបង្ហាញពីឆន្ទៈនិងតម្លាភាពនៃបរិយាកាសការងារនៅកម្ពុជា។
ទី២-ផ្ដោតការយកចិត្តទុកដាក់ក្នុងការអភិវឌ្ឍទំនាក់ទំនងវិជ្ជាជីវៈ តាមរយៈបន្តយន្តការត្រីភាគីដើម្បីដោះស្រាយបញ្ហាជាច្រើនទាក់ទងសិទ្ធិនិងផលប្រយោជន៍របស់កម្មករ និយោជិតនិងនិយោជក។ ជាក់ស្ដែងគណៈកម្មការប្រឹក្សាការងារបានបង្កើតក្រុមការងារត្រីភាគីបានដោះស្រាយប្រាក់ឈ្នួលអប្បបរមារបស់កម្មករនិយោជិតវិស័យវាយនភ័ណ្ឌកាត់ដេរនិងផលិតស្បែកជើងបានកើនឡើងពី ៤០ដុល្លារក្នុង១ខែ នាឆ្នាំ១៩៩៧ រហូត ១៨២ដុល្លារក្នុង១ខែក្នុងឆ្នាំ ២០១៩ នេះ ហើយបានបើកផ្តល់ពីរដងក្នុងមួយខែ។
ទី៣-បន្តលើកកម្ពស់សេរីភាពអង្គការវិជ្ជាជីវៈ តាមរយៈការអនុវត្តច្បាប់ស្តីពីការងារនិងច្បាប់ស្ដីពីសហជីព។ គិតមកដល់ខែធ្នូ ឆ្នាំ២០១៨ ចំនួនប្រជាពលរដ្ឋដែលបានចុះបញ្ជីការនៅក្រសួងការងារនិងបណ្ដុះបណ្ដាលវិជ្ជាជីវៈមានចំនួន ៤៨៣៨ ក្នុងនោះសហជីពមូលដ្ឋានមានចំនួន ៤៦២១ ,សហព័ន្ធសហជីពមានចំនួន១៨០ សហភាពសហជីពមានចំនួន២៨ និងសមាគមនិយោជកមានចំនួន៩ ។
ទី៤-ផ្ដោតការយកចិត្តទុកដាក់លើការអភិវឌ្ឍអនាម័យនិងសន្តិសុខការងាររបស់កម្មករនិយោជិតជំរុញឲ្យរោងចក្រសហគ្រាសទាំងអស់មានគិលានដ្ឋានសម្រាប់សង្គ្រោះបន្ទាន់ប្រចាំរោងចក្រ មានកន្លែងហូបបាយ មានបន្ទប់បំបៅកូននិងមានទារកដ្ឋានដើម្បីកាត់បន្ថយបញ្ហាដួលសន្លប់គ្រោះថ្នាក់ការងារ បង្កើនសមត្ថភាពក្នុងការដឹកជញ្ជូននិងការធ្វើដំណើររបស់កម្មករនិយោជិត។ បន្តអនុវត្តឲ្យមានប្រសិទ្ធភាពនូវផែនការជាតិស្ដីពីការលុបបំបាត់ទម្រង់ធ្ងន់ធ្ងរបំផុតនៃពលកម្មកុមារឆ្ពោះទៅការបញ្ចប់បេសកកម្មកុមារនៅឆ្នាំ២០២៥។
ទី៥-បន្តអនុវត្តក្របខ័ណ្ឌគោលនយោបាយជាតិគាំពារសង្គម តាមរយៈការអភិវឌ្ឍរបបសន្តិសុខសង្គម ដែលមកទល់ពេលនេះមានសហគ្រាសគ្រឹះស្ថានជាង ១ម៉ឺន ជាសមាជិកនិងមានកម្មករនិយោជិតនិងមន្ត្រីសាធារណៈ១,៥លាននាក់កំពុងទទួលអត្ថប្រយោជន៍ទាំងអស់នេះ។ នៅឆ្នាំ២០១៩នេះ រាជរដ្ឋាភិបាលនឹងដាក់ឲ្យដំណើរការរបបសោធនសម្រាប់កម្មករនិយោជិតនិងរបបអាហារនិភ័យការងារសម្រាប់មន្ត្រីសាធារណព្រមទាំងរៀបចំកិច្ចសហប្រតិបត្តិការរបបសន្តិសុខសង្គមជាមួយប្រទេសដែលទទួលពលករកម្ពុជា។ ជាមួយនេះ រាជរដ្ឋាភិបាលបានអនុវត្តគោលនយោបាយឧបត្ថម្ភសាច់ប្រាក់ដែលកម្មការិនីទាំងក្នុងនិងក្រៅប្រព័ន្ធនិង មន្ត្រីសាធារណៈនៅពេលសម្រាលកូនមកទល់ពេលនេះកម្មការិនី សរុប ៦៥០០០ នាក់និងកូនជិត ៦៦ ០០០នាក់ ដោយសរុបជាទឹកប្រាក់ជិត ៦,៥លានដុល្លារ។ ដោយឡែក ចំពោះស្ត្រីដែលមានកូនភ្លោះ៣ បន្ថែមលើប្រាក់របស់រាជរដ្ឋាភិបាល សម្តេចតេជោនិងសម្តេចកិត្តិព្រឹទ្ធបណ្ឌិត ក៏បានឧបត្ថម្ភបន្ថែម ៥លានរៀល ផងដែរ។
ទី៦-បន្តយកចិត្តទុកដាក់ក្នុងការបណ្ដុះបណ្ដាលជំនាញវិជ្ជាជីវៈដែលប្រជាពលរដ្ឋឆ្លើយតបទៅនឹងតម្រូវការទីផ្សារការងារនិងការបង្កើតមុខរបរថ្មីៗ។ បន្តអភិវឌ្ឍសេវារកការងារធ្វើជូនប្រជាពលរដ្ឋតាមរយៈការផ្តល់ព័ត៌មានអំពីតម្រូវការការងាររបស់សហគ្រាសគ្រឹះស្ថានដែលយុវជនយុវនារីកំពុងស្វែងរកការងារធ្វើ និងជួយដល់សហគ្រាស គ្រឹះស្ថានក្នុងការស្វែងរកកម្លាំងពលកម្មតាមតម្រូវការ។ ទន្ទឹមនឹងនេះ បានបង្កើតកិច្ចសហប្រតិបត្តិការទ្វេភាគីពហុភាគីនិងកិច្ចការពារសិទ្ធិពលករទេសន្តប្រវេសន៍កម្ពុជា។
ទី៧-បន្តភាពជាដៃគូយ៉ាងជិតស្និទ្ធជាមួយនឹងអង្គការអន្តរជាតិខាងការងារ។ កន្លងមករាជរដ្ឋាភិបាលបានរួមគ្នាអនុវត្តប្រកបដោយជោគជ័យនៅកម្មវិធីការងារសមរម្យចំនួន ៤លើករួចមកហើយ ចាប់ពីឆ្នាំ២០០៥ ជាមួយដៃគូតំណាងត្រីភាគគី ហើយថ្ងៃនេះបន្ទាប់ពីពិធីនេះសម្តេចបានធ្វើជាអធិបតីក្នុងពិធីចុះហត្ថលេខាលើអនុស្សរណៈដើម្បីបន្តអនុវត្តលើកម្មវិធីការងារសមរម្យសម្រាប់ប្រទេសកម្ពុជាលើកទី៥ ឆ្នាំ២០១៩-២០២៣ សំដៅសម្រេចយកឲ្យបាននូវអាទិភាពបី៖ ទី១-ការលើកកម្ពស់មុខរបរនិងការងារនិងការអភិវឌ្ឍសហគ្រាសប្រកបដោយចីរភាព។ ទី២-ការពង្រឹងនិងពង្រីកកិច្ចគាំពារសង្គម ព្រមទាំងសុខភាពនិងសុវត្ថិភាពការងារ និងទី៣-ការធ្វើឲ្យប្រសើរឡើងនូវទំនាក់ទំនងវិជ្ជាជីវៈ និងសិទ្ធិការងារ។
ទី៨-កិច្ចសហប្រតិបត្តិការអភិវឌ្ឍន៍លក្ខខណ្ឌការងារសិទ្ធិសេរីភាពអង្គការវិជ្ជាជីវៈប្រកបដោយប្រសិទ្ធភាពនិងតម្លាភាពដើម្បីធ្វើឲ្យកាន់តែប្រសើរឡើងនូវសុខដុមបនីយកម្មទំនាក់ទំនងវិជ្ជាជីវៈលើកកម្ពស់គម្រោងបទដ្ឋានសង្គមនិងការងារក្នុងវិស័យវាយនភណ្ឌនិងកាត់ដេរក្នុងតំបន់អាស៊ី(GIZ-SLSG) គម្រោងគំនិតផ្ដួចផ្ដើមកិច្ចព្រមព្រៀងសកល(Global Deal Initiative)និងគម្រោងផ្សេងៗជាច្រើនទៀត។
គួរបញ្ជាក់ថា ព្រះរាជាណាចក្រកម្ពុជា បានចូលជាសមាជិកអង្គការអន្តរជាតិខាងការងារនៅថ្ងៃទី២៤ ខែកុម្ភៈ ឆ្នាំ១៩៦៩។ ប៉ុន្តែកិច្ចសហប្រតិបត្តិការកម្ពុជាជាមួយនឹងអង្គការអន្តរជាតិខាងការងារបានរីកចម្រើនខ្លាំងចាប់ពីឆ្នាំ១៩៩២ មកទល់បច្ចុប្បន្ននេះ ។ កម្ពុជាធ្លាប់បានជាប់ឆ្នោតជាសមាជិកពេញសិទ្ធិនៃក្រុមប្រឹក្សាភិបាលរបស់អង្គការអន្តរជាតិខាងការងារ (Governing Body ) ពីឆ្នាំ២០១៤ ដល់ឆ្នាំ២០១៧ ហើយកម្ពុជាបានខិតខំបំពេញនូវកាតព្វកិច្ចរបស់ខ្លួនទៅតាមអនុសញ្ញាដែលបានផ្ដល់សច្ចាប័នព្រមទាំងសម្រេចបាននូវសមិទ្ធផលជាច្រើនក្នុងវិស័យការងារ រួមមានការបង្កើត និងដោះស្រាយការងារជូនប្រជាពលរដ្ឋ ,ការអប់រំបណ្ដុះបណ្ដាលបច្ចេកទេសវិជ្ជាជីវៈ,ការអនុវត្តសិទ្ធិការងារ,ការអនុវត្តសេរីភាពអង្គការវិជ្ជាជីវៈ,សិទ្ធិសេរីភាពនៃកូដកម្ម,ការអភិវឌ្ឍយន្តការត្រីភាគី,ការអភិវឌ្ឍយន្តការដោះស្រាយវិវាទការងារ,ការអនុវត្តអនាម័យនិងសុវត្ថិភាពការងារ,កិច្ចគាំពារសង្គម,សមភាពយេនឌ័រក្នុងវិស័យការងារ,ការទប់ស្កាត់និងលុបបំបាត់ទម្រង់ធ្ងន់ធ្ងរនៃពលកម្មកុមារ,ការអភិវឌ្ឍគោលនយោបាយទេសន្តប្រវេសន៍ការងារដោយសុវត្ថិភាព។
សមិទ្ធផលទាំងអស់នេះ បានរួមចំណែកយ៉ាងធំធេងក្នុងការអភិវឌ្ឍសង្គមសេដ្ឋកិច្ចកម្ពុជា ហើយកម្ពុជាកន្លងមកក៏បានចែករំលែកបទពិសោធន៍ល្អៗទាំងនេះដល់ប្រទេសជាមិត្តមួយចំនួននៅក្នុងតំបន់ផងដែរ។
លោក Graeme bukley នាយកការិយាល័យអង្គការអន្តរជាតិខាងការងារប្រចាំកម្ពុជាថៃនិងឡាវ បានបញ្ជាក់អំពីផ្លែផ្កានៃកិច្ចសហប្រតិបត្តិការ ភាពជាដៃគូមិនអាចខ្វះបានរវាងកម្ពុជានិងអង្គការអន្តរជាតិខាងការងារក្នុងរយៈពេលកន្លងមកនិងទៅអនាគត។
លោក Graeme bukley បានមានប្រសាសន៍ថា ខួប ១០០ឆ្នាំ នឹងផ្តល់ឱកាសសម្រាប់យើងមិនត្រឹមតែដើម្បីក្រឡេកមើលទៅអតីតកាលនិងអបអរប្រវត្តិសាស្ត្រនិងសមិទ្ធផលរបស់អង្គការ ILO ប៉ុណ្ណោះទេ ប៉ុន្តែថែមទាំងជាឱកាសសម្រាប់យើងសម្លឹងមើលទៅថ្ងៃអនាគត និង កំណត់មាគ៌ាដែលអាចផ្តល់លទ្ធភាពឲ្យអង្គការ ILO ក្នុងការប្រឈមមុខនឹងបញ្ហាថ្មីៗស្របពេលដែលឈានចូលទៅក្នុងសតវត្សទី២១ របស់ខ្លួន។
ក្នុងការប្រារព្ធខួប ១០០ឆ្នាំ នៅឆ្នាំនេះ អង្គការអន្តរជាតិខាងការងារបានដាក់ចេញនូវ “គំនិតផ្តួចផ្តើមស្តីពីអនាគតនៃការងារ” ។ គណៈកម្មាធិការសកលស្តីពីអនាគតនៃការងារត្រូវបានបង្កើតឡើងនៅ ឆ្នាំ២០១៧ ដើម្បីធ្វើការត្រួតពិនិត្យស៊ីជម្រៅអំពីអនាគតនៃការងារ ដែលផ្តល់មូលដ្ឋានក្នុងការវិភាគទៅលើការផ្តល់យុត្តិធម៌សង្គម នៅក្នុងសតវត្សទី២១។ ដោយសហការជាមួយដៃគូនានាទាំងនៅក្នុងអង្គការសហប្រជាជាតិ និងរាជរដ្ឋាភិបាលកម្ពុជា យើងនឹងរៀបចំឲ្យមានកិច្ចសន្ទនាថ្នាក់ជាតិមួយនាខែក្រោយដើម្បីឆ្លុះបញ្ចាំងទៅលើការកើនទ្បើងនូវតម្រូវការរបស់និយោជក និងកម្មករនិយោជិត ការផ្លាស់ប្តូរស្ថានភាពការងារ និងរបៀបដែលយើងអាចធ្វើការត្រៀមខ្លួនដើម្បីប្រឈមទៅនឹងអនាគតនៃការងារក្នុងប្រទេសកម្ពុជា។
លោក Graeme bukley បានសម្តែងសេចក្តីសោមនស្សរីករាយ ដែលឱកាសនេះជូនគ្នានឹងការដាក់ឲ្យដំណើរការកម្មវិធីការងារសមរម្យប្រចាំប្រទេសកម្ពុជាលើកទី៥ សម្រាប់រយៈពេល ២០១៩-២០២៣ ហើយសង្ឃឹមថា ការបន្តកិច្ចសហប្រតិបត្តិការថ្មីនេះនឹងមានការសម្របខ្លួននិងវិវត្តន៍តាមមធ្យោបាយប្រកបដោយនវានុវត្តន៍ ដើម្បីឆ្លើយតបទៅនឹងបញ្ហាប្រឈមនានា ក្នុងពេលអនាគតដែលមិនមានភាពប្រាកដប្រជា។ កម្មវិធីការងារសមរម្យប្រចាំប្រទេសនេះឈរលើសមាជិកភាពរយៈពេល ៥០ឆ្នាំរបស់កម្ពុជា នៅក្នុងអង្គការ ILO ហើយនឹងនាំពួកយើងឆ្ពោះទៅកាន់ទំព័រថ្មីមួយក្នុងដំណើរវិវត្តន៍នៃកិច្ចសហប្រតិបត្តិការបច្ចេកទេសរបស់អង្គការ ILO ជាមួយរាជរដ្ឋាភិបាលកម្ពុជា និងអង្គការវិជ្ជាជីវៈរបស់និយោជក និងកម្មករនិយោជិត។
កម្មវិធីការងារសមរម្យនេះរួមចំណែកក្នុងការសម្រេចនូវគោលដៅអភិវឌ្ឍជាតិរបស់កម្ពុជា។ កម្មវិធីនេះគាំទ្រការអនុវត្តយុទ្ធសាស្ត្រចតុកោណដំណាក់កាលទី៤ ,ផែនការយុទ្ធសាស្ត្រអភិវឌ្ឍជាតិ ២០១៩-០២៥ និង គោលដៅអភិវឌ្ឍប្រកបដោយចីរភាពកម្ពុជា។ កត្តាសំខាន់គឺការផ្សារភ្ជាប់កម្មវិធីការងារសមរម្យប្រចាំប្រទេសជាមួយនឹងរបៀបវារៈឆ្នាំ២០៣០ សម្រាប់ការអភិវឌ្ឍប្រកបដោយចីរភាព ដើម្បីជួយឲ្យប្រទេសកម្ពុជាសម្រេចគោលដៅអភិវឌ្ឍប្រកបដោយចីរភាព។ ក្នុងបរិបទនេះ អាទិភាពនឹងផ្តោតទៅលើការអនុវត្តគោលដៅទី៨ ៖ ធានាកំណើនសេដ្ឋកិច្ចប្រកបដោយចីរភាព និងបរិយាប័ន្ន មុខរបរពេញលេញប្រកបដោយផលិតភាព និងការងារសមរម្យសម្រាប់ប្រជាជនគ្រប់រូប។ ការរួមចំណែកទាំងឡាយទៅលើសូចនាករគាំពារសង្គម ក្រោមគោលដៅទី១ ក្នុងគោលបំណងបញ្ចប់ភាពក្រីក្រគ្រប់ទម្រង់នៅគ្រប់ទីកន្លែង ក៏មានរំលេចនៅក្នុងកម្មវិធីនេះផងដែរ ។ ការងារដែលយើងកំពុងចាប់ផ្តើមធ្វើដើម្បីគាំទ្រដល់កំណែទម្រង់ប្រព័ន្ធគាំពារសង្គមរបស់កម្ពុជា គឺជាសក្ខីភាពឆ្លុះបញ្ចាំងយ៉ាងច្បាស់ពីភាពប្រទាក់ក្រឡាគ្នានៃគោលនយោបាយមួយនេះ។
លោក Graeme bukley បន្តថា យើងត្រៀមខ្លួនសហការជាមួយអ្នកទាំងអស់គ្នាក្នុងការអនុវត្តកម្មវិធីនេះដើម្បីលើកស្ទួយយុត្តិធម៌សង្គមឆ្ពោះទៅសម្រេចឲ្យបានការងារសមរម្យសម្រាប់ប្រជាជនកម្ពុជាគ្រប់រូប និងចូលរួមអបអរទាំងអស់គ្នានូវខួប ១០០ឆ្នាំ របស់អង្គការ ILO ពេញមួយឆ្នាំ២០១៩ នេះ៕
Source: Kampuchea Thmey Daily
0 Comments