ភ្នំពេញ ៖ គេសង្ស័យថា ក្មេងដុតខ្សែភ្លើងយកស្ពាន់ នៅក្នុងដីឡូតិ៍ មួយកន្លែង ក្នុងភូមិ បឹងសាឡាងសង្កាត់ឫស្សីកែវ ខណ្ឌឫស្សីកែវ ត្រូវភ្លើងឆាបឆេះរាលដាល ផ្អើលដល់ប្រជាពលរដ្ឋ និងរថយន្តពន្លត់អគ្គីភ័យ ចំនួន២គ្រឿងទៅអន្តរាគមន៍បាញ់ពន្លត់ទាន់ពុំបណ្តាលឲ្យរាលដាលដល់លំនៅឋានឡើយ កាលពីវេលាម៉ោង ១និង៣០នាទីថ្ងៃត្រង់ទី៦ ខែមីនា ឆ្នាំ២០១៩។
តាមប្រជាពលរដ្ឋ បានឲ្យដឹងថា នៅមុនពេលកើតហេតុ គេឃើញភ្លើងបានឆេះគំនរជ័រ មួយកន្លែង នៅក្នុងដីឡូតិ៍នោះនិងរាលដាលទៅព្រៃខ្សែហុយទ្រលោមបង្កឲ្យមានការភ្ញាក់ផ្អើលដល់ប្រជាពលរដ្ឋ នាំគ្នា ជួយពន្លត់ ដែលខ្លាចឆេះរាលដាលដល់លំនៅឋាន ដែលនៅក្បែរ។
តាមព័ត៌មានបានឲ្យដឹងទៀតថា ប្រជាពលរដ្ឋ បាននាំគ្នា ភ័យស្លន់ស្លោ នាំគ្នាដងទឹកទៅជះពន្លត់ និងបានទាក់ទងហៅរថយន្តរបស់សាលាខណ្ឌឫស្សីកែវមួយគ្រឿង និងរថយន្តស្នងការក្រុងមួយគ្រឿងទៅអន្តរាគមន៍ បាញ់ពន្លត់ទាន់ ចៀសវាង ភ្លើង បានឆេះរាលដាល់ដល់លំនៅឋានរបស់ប្រជាពលរដ្ឋ។
តាមប្រជាពលរដ្ឋ បានឲ្យដឹងថា ការកើតមានអគ្គីភ័យ ភ្លើង ឆេះព្រៃនេះសង្ស័យ មានក្មេង ដុតខ្សែភ្លើង យកស្ពាន់ហើយឆេះរាលដាលទៅដល់ព្រៃ នៅក្នុងដីឡូត៍នោះតែម្តងព្រោះគេឃើញមានខ្សែភ្លើងមួយដុំនៅក្បែរនោះ៕
Source: Kampuchea Thmey Daily
0 Comments