ដួង ម៉ានិច ៖ ខ្ញុំស្អប់បំផុតមនុស្សដែលយកអារម្មណ៍មករាប់អានមិនយកបេះមករាប់អាន !

ភ្នំពេញ ៖ តារាសម្ដែងស្រី ដែលច្បាមបានទីផ្សារសម្ដែងច្រើន កញ្ញា ដួង ម៉ានិច ថ្មីៗនេះ បានបង្ហាញអារម្មណ៍មិនសប្បាយចិត្ត ពោលពាក្យផ្លែផ្កាលើបុគ្គលមួយចំនួន ដែលរាប់អាននាងសម្លឹងមើលឃើញតែផលប្រយោជន៍ផ្ទាល់ខ្លួន ដោយមិនបានគិតពីភាពស្មោះ និង មនោសញ្ចេតនាទៅថ្ងៃអនាគត។

ការបញ្ចេញអារម្មណ៍មិនសប្បាយចិត្តរបស់តារាស្រីរាងតូចច្រឡឹងចង្កាស្រួច កញ្ញា ដួង ម៉ានិច នាពេលនេះ បានធ្វើឲ្យមហាជនអ្នកគាំទ្រមួយចំនួនយល់ឃើញថា ការលើកឡើងរបស់នាងពេលនេះប្រហែលជាតារាស្រីរូបនេះ អស់នូវភាពអត់ទ្រាំ ហើយក៏មានចេតនាចង់ឲ្យបុគ្គលរូបនោះ មានការភ្ញាក់រម្លឹកចំពោះទង្វើរបស់ខ្លួន។ ប៉ុន្តែរហូតមកទល់ពេលនេះ នាងមិនបានបញ្ចេញអត្តសញ្ញាណពិតរបស់បុគ្គលនោះនៅឡើយទេ។

កញ្ញា ដួង ម៉ានិច បានរៀបរាប់ចេញពីអារម្មណ៍របស់ខ្លួនបែបនេះថា មនុស្សដូចខ្ញុំ តែខ្ញុំដាក់ចិត្តថារាប់អានអ្នកណាហើយ គឺរាប់អានដោយអស់ពីចិត្ត មិនមែនសម្ដែងទេ ត្រូវដឹងហើយ ខ្ញុំមិនចេះសម្ដែងមុខ ល្អក្រោយ និយាយដើមទេ បើមនុស្សខ្ញុំមិនចូលចិត្ត ខ្ញុំមិននៅជិតទេ ត្រូវចាំ។ មនុស្សខ្ញុំអត់ដែលគិតអាក្រក់ ឬចង់ធ្វើអាក្រក់លើនរណាម្នាក់ទេ ពីព្រោះមនុស្សខ្ញុំមើលមនុស្សក្នុងផ្លូវល្អច្រើនជាងអ្នកដែលគិតគេក្នុងផ្លូវអាក្រក់។

តារាសម្ដែងដែលក្តាប់បានឱកាសគ្រង់តំណែងតួឯកច្រើនរឿង កញ្ញា ដួង ម៉ានិច បានបន្ថែមទៀតថាដូចអ្នកខ្លះអាត្មានិយម ព្រោះតែខ្លួនជាមនុស្សអាក្រក់មិនដឹងខ្លួន ហើយក៏មើលគេក្នុងផ្លូវអាក្រក់ដូចខ្លួនដែរ ខ្ញុំមិន perfect ទេ តែខ្ញុំស្អប់បំផុតមនុស្សដែលយកអារម្មណ៍មករាប់អានមិនយកបេះមករាប់អាន ហើយចង់និយាយថា មនុស្សខ្ញុំស្លូត ឬក៏កាចអាស្រ័យលើទង្វើមនុស្សធ្វើលើខ្ញុំប៉ុណ្ណោះ ចាំពីថ្ងៃនេះទៅ….។

តារាសម្ដែង កញ្ញា ដួង ម៉ានិច មួយរយៈពេលចុងក្រោយ នៃអាជីពសិល្បៈរបស់នាង ត្រូវបានគេមើលឃើញថា តារាស្រី ហាក់មានភាពកាក់កបច្រើនជាមួយការចេញសម្ដែងខ្សែភាពយន្ត ខណៈដែលផលិតករមួយចំនួន តែងសម្លឹងឃើញពីសមត្ថភាព និងទេពកោសល្យរបស់តារាស្រីរូបនេះ។ នេះក៏ចាត់ទុកថាជាឱកាសដ៏ល្អក្នុងការក្រសោបលុយធំ ដើម្បីភាពហ៊ឺហារបស់នាងផងដែរ៕