ភ្នំពេញ ៖ កម្លាំងកងរាជអាវុធហត្ថរាជធានីភ្នំពេញ ថ្ងៃពុធ ៧រោច ខែផល្គុន ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២៧ ខែមីនា ឆ្នាំ២០១៩ បានទទួលការផ្សព្វផ្សាយអំពីផែនការការងារសោធននិវត្តន៍ដល់មន្ត្រីដែលដល់អាយុកាលចូលនិវត្តន៍ឲ្យជ្រាបជាព័ត៌មានផងដែរ។ ពិធីនេះបានប្រព្រឹត្តទៅដោយមានការចូលរួមពីកម្លាំងកងរាជអាវុធហត្ថរាជធានីភ្នំពេញ បានប្រជុំផ្សព្វផ្សាយការងារសោធននិវត្តន៍ ក្រោមវត្តមានលោកឧត្តមសេនីយ៍ឯក ស៊ិន សុផាន្នី មេបញ្ជាការរង កងរាជអាវុធហត្ថលើផ្ទៃប្រទេស។
លោកឧត្តមសេនីយឯក ស៊ិន សុផាន្នី បានថ្លែងនូវការប្រឹងប្រែងបំពេញភារកិច្ចបានល្អជុំវិញការការពារ បង្ការ សង្គ្រោះ និង បង្ក្រាបបទល្មើសតូចធំច្រើនករណី កន្លងមកតាមក្រមសីលធម៌ជាកងទ័ពពិសេសជាមន្ត្រីបម្រើរាស្ត្រដោយស្មោះស្ម័គ្រ។
លោកឧត្តមសេនីយ៍បានជំរុញឲ្យកងកម្លាំងអាវុធទាំងអស់ ទោះដល់អាយុចូលនិវត្តន៍ក្តីមិនដល់ក្តីត្រូវខិតខំបំពេញតួនាទីបម្រើសុខទុក្ខជូនប្រជាពលរដ្ឋបន្តទៀត ដែលឈរលើស្មារតីទទួលខុសត្រូវខ្ពស់ប្រកបដោយក្តីស្មោះត្រង់ហើយម៉ឺងម៉ាត់។
ជាមួយនឹងការទទួលព័ត៌មានផ្សព្វផ្សាយការងារសោធននិវត្តន៍នេះដែរកម្លាំងកងរាជអាវុធហត្ថរាជធានីភ្នំពេញ ក៏បន្តអនុវត្តភារកិច្ចដោយក្រោកពីព្រលឹម រួសរាន់ងូតទឹក ស្លៀកពាក់ រង់ចាំទទួលបទបញ្ជា ចេញបេសកកម្ម ការពារ សន្តិសុខ សណ្តាប់ធ្នាប់ សុវត្ថិភាព ជួយសម្រួលចរាចរជូនសិស្សានុសិស្សឆ្លងផ្លូវ គណៈប្រតិភូជាតិ និងអន្តរជាតិ តាមភូមិសាស្ត្រសំខាន់ៗ ក្នុងរាជធានីភ្នំពេញ។
ក្រៅពីបេសកកម្មការងាររបស់កម្លាំងក្នុងទីបញ្ជាការ កម្លាំងមូលដ្ឋានអាវុធហត្ថខណ្ឌទាំង១២ នៃរាជធានីភ្នំពេញ ក៏បានបន្តចេញល្បាតការពារ សន្តិសុខ សុវត្ថិភាព ជួយសម្រួលចរាចរជូនបងប្អូនប្រជាពលរដ្ឋ ទាំងនៅលើដងផ្លូវ និងទាំងកំពុងសម្រាន្តលង់លក់ក្នុងគេហដ្ឋាន តាមភូមិសាស្ត្រខណ្ឌរៀងៗខ្លួននាពេលរាត្រី ដោយពុំខ្លាចភាពនឿយហត់ឡើយ ក្នុងនាមជាមន្ត្រីបម្រើរាស្ត្រដោយស្មោះត្រង់ហើយម៉ឺងម៉ាត់រាល់ការបំពេញការងារ៕
Source: Kampuchea Thmey Daily
0 Comments