ប្លុកកាន់អំណាចរបស់លោកនាយករដ្ឋមន្ត្រីជប៉ុន Shinzo Abe បានទទួលរងបរាជ័យពីរលើកដ៏កម្រក្នុងការបោះឆ្នោតបំពេញបន្ថែមកាលពីថ្ងៃអាទិត្យ ដែលនេះជាការព្រមានជាក់ស្ដែងមួយពីអ្នកបោះឆ្នោតមុនការបោះ ឆ្នោតជាតិសម្រាប់សភាជាន់ខ្ពស់នៅចុងឆ្នាំនេះ។
ការបរាជ័យក្នុងការបោះឆ្នោតបំពេញបន្ថែមនៃសភាជាន់ទាបក្នុងទីក្រុង Osaka ភាគខាងលិចប្រទេសជប៉ុននិងមួយទៀតនៅ លើកោះ Okinawa ដែលជាទីតាំងរបស់កងទ័ពសហរដ្ឋអាមេរិកនៅក្នុងប្រទេស នេះគឺជាការចាញ់លើកដំបូងចាប់តាំងពីលោក Abe វិលត្រលប់មកកាន់ តំណែងវិញក្នុងខែធ្នូឆ្នាំ២០១២។
លោក Abe បានប្រាប់ក្រុមអ្នកយកព័ត៌មានកាលពីព្រឹកថ្ងៃចន្ទថា “ សមាជិកនិមួយៗនៃគណបក្សប្រជាធិបតេយ្យសេរី (LDP) ដែលកំពុងកាន់អំណាចត្រូវតែទទួលយកលទ្ធផលនេះ ”។ ការបរាជ័យនៅ ក្នុងការបោះឆ្នោតថ្ងៃអាទិត្យបានកើតឡើងបន្ទាប់ពីរដ្ឋមន្ត្រី ក្រសួងអូឡាំពិកលោក Yoshitaka Sakurada លាលែងពីតំណែងមួយឆ្នាំមុនការប្រកួតកីឡាអូឡាំពិកក្រុងតូក្យូដោយសារតែការលើកឡើងរបស់លោកបានធ្វើឲ្យប៉ះពាល់ដល់ប្រជាជនដែលរងគ្រោះដោយគ្រោះរញ្ជួយដីនិងរលកយក្សស៊ូណាមិដែលបានបង្កឲ្យមានវិបត្តិនុយក្លេអ៊ែរក្នុងឆ្នាំ២០១១។
អនុរដ្ឋមន្ត្រីក្រសួងដឹកជញ្ជូនម្នាក់ក៏បានលាឈប់ពីមុខតំណែងផងដែរដោយសារតែរឿងរ៉ាវដាច់ដោយឡែក។ អត្ថបទវិចារណកថាមួយនៅក្នុងកាសែត Yomiuri បាននិយាយថា “អត្រាគាំទ្រគណៈរដ្ឋមន្ត្រីកំពុងរក្សានៅកម្រិតជាក់លាក់មួយប៉ុន្តែប្រសិនបើពួកគេមិនលុបបំបាត់ការធ្វេសប្រហែសនិងភាព អយុត្តិធម៌ទេនោះ ការបោះឆ្នោតសភាជាន់ខ្ពស់នឹងក្លាយជាការប្រយុទ្ធដ៏លំបាក”។
ការគាំទ្រដល់គណៈរដ្ឋមន្ត្រីរបស់លោក Abe គឺ៤៧ភាគរយនៅក្នុងការស្ទង់មតិមួយរបស់ទូរទស្សន៍ NHK ដែលចេញផ្សាយក្នុងខែនេះពោលគឺកើនឡើងប្រាំពិន្ទុបើធៀបនឹងខែមុន។ នៅកោះ Okinawa, អ្នកកាសែតឈ្មោះ Tomohiro Yara ដែលគាំទ្រដោយគណបក្សប្រឆាំងជាច្រើនហើយឈរឈ្មោះជាមួយយុទ្ធនាការប្រឆាំងមូលដ្ឋានរបស់សហរដ្ឋអាមេរិកគឺបានយកឈ្នះលើអតីតរដ្ឋមន្ត្រីមួយរូប។
ចំណែកនៅទីក្រុង Osaka ឯណោះវិញ, លោក Shimpei Kitagawa ដែលគាំទ្រដោយ LDP និងដៃគូតូចរបស់ ខ្លួនគឺ Komeito បានចាញ់លោក Fumitake Fujita មកពីគណបក្ស Nippon Ishin Japan Innovation៕ REUTERS
Source: Kampuchea Thmey Daily
0 Comments