ភ្នំពេញ ៖ ផ្ទះជួលនៅប្លុកផ្ទះឡ ស្ថិតនៅក្នុងភូមិត្រពាំងថ្លឹង សង្កាត់ចោមចៅទី១ ខណ្ឌពោធិ៍សែនជ័យមានចំនួនរាប់ពាន់បន្ទប់ និង មានអ្នកជួលស្នាក់នៅជាង១ម៉ឺននាក់ បានផ្ទុះការតវ៉ាបិទផ្លូវ បន្ទាប់ពីថៅកែម្ចាស់ផ្ទះជួលទាំងនោះ ដំឡើងថ្លៃឈ្នួលផ្ទះចំនួន១០ដុល្លារបន្ថែមទៀត បើធ្លាប់ជួលត្រឹម៣០ ឡើងដល់៤០ បើធ្លាប់ជួលត្រឹម៤០ឡើងដល់៥០ ធ្វើឲ្យពួកគាត់មិនអាចទទួលយកបាន។
ម្ចាស់ផ្ទះជួលហាក់ដឹងក្លិនណាស់ស្របពេលរាជរដ្ឋាភិបាលដំឡើងប្រាក់ខែឲ្យកម្មករបាន១២ដុល្លារបន្ថែមទៀត ស្រាប់តែឈ្នួលផ្ទះក៏ទារឡើង១០ដុល្លារទៀតដែរ។ ពលរដ្ឋជាអ្នកជួលផ្ទះបាននាំគ្នាបិទផ្លូវ បង្កឲ្យមានការភ្ញាក់ផ្អើលកាលពីវេលាម៉ោង៦និង៣០នាទីយប់ថ្ងៃទី២១ ខែមេសា ឆ្នាំ២០១៩ ក្នុងប្លុកផ្ទះឡ ភូមិត្រពាំងថ្លឹង២ សង្កាត់ចោមចៅទី១ ខណ្ឌពោធិ៍សែនជ័យ។
អាជ្ញាធរមូលដ្ឋានបានឲ្យដឹងថា ផ្ទះជួលនៅប្លុកអតីតឡឥដ្ឋខាងលើនេះមានបន្ទប់ជួលប្រមាណជាង១ពាន់បន្ទប់ និងមាន មនុស្សរស់នៅប្រមាណរាប់ម៉ឺននាក់ដោយមានការរស់នៅ រួមជាមួយមិត្តភ័ក្ដិខ្លះ និង ជាលក្ខណៈគ្រួសារខ្លះផងដែរ ដោយមានសង្កាត់២ និងខណ្ឌ២ ជាប់ព្រំប្រទល់ជាមួយគ្នា។ ក្នុងនោះ មានសង្កាត់ចោមចៅទី១ ខណ្ឌពោធិ៍សែនជ័យ និងសង្កាត់ស្ទឹមមានជ័យ៣ ខណ្ឌមានជ័យ។
ក្រុមកម្មករកម្មការិនី ស្នាក់នៅប្លុកផ្ទះជួលខាងលើនេះ បាននិយាយថា ពួកគាត់ទើបមកពីស្រុក ភ្លាមបានឮដំណឹងថា ម្ចាស់ផ្ទះជួលបានដំឡើងថ្លៃឈ្នួលផ្ទះចំនួន១០ដុល្លារ ហើយនៅក្នុងនោះផងដែរ ផ្ទះជួលធ្លាប់យកថ្លៃ៣០ដុល្លារ បានឡើង៤០ដុល្លារ ផ្ទះ៤០ដុល្លារបានឡើងទៅដល់ ៥០ដុល្លារ ហើយ បូកសរុបទាំងថ្លៃទឹកភ្លើងផងនោះ អស់ប្រមាណ៦០ដុល្លារឯណោះ តើលុយសល់ប៉ុន្មាន ដើម្បីចាយវាយក្នុងក្រុមគ្រួសារ និងតម្រូវការក្នុងជីវភាពប្រចាំថ្ងៃ។
កម្មករកម្មការិនីបានបញ្ជាក់ទៀតថា សម្ដេចនាយករដ្ឋមន្ត្រីទើបដំឡើង ប្រាក់ខែ បាន១២ដុល្លារទៀតក្នុង១ខែ ស្រាប់តែថៅកែផ្ទះជួលបានឆ្លៀតដំឡើងតាម១០ដុល្លារដែរ ដូចចាំមើលតែលុយកម្មករប៉ុណ្ណោះ ហាក់ដូចមិនចង់ឲ្យកម្មករមានជីវភាពធូរធារនឹងគេសោះ ហើយពួកគាត់សូមឲ្យ សម្ដេចនាយករដ្ឋមន្ត្រីជួយមើលផង។
គួរបញ្ជាក់ថា សម្ដេចតេជោនាយករដ្ឋមន្ត្រី នៃព្រះរាជាណាចក្រកម្ពុជាធ្លាប់បានប្រកាសថា នៅពេលកម្មករទទួលបានការដំឡើងប្រាក់ខែចំនួន១២ដុល្លារទៀតនោះ សូមកុំឲ្យខាងម្ចាស់ផ្ទះជួលដំឡើងថ្លៃឈ្នួលផ្ទះទៀតអី តែក្រុមថៅកែផ្ទះជួលហាក់មិនស្ដាប់តាមការណែនាំរបស់ប្រមុខថ្នាក់ដឹកនាំទេ នៅសុខៗនាំគ្នាដំឡើងឈ្នួលផ្ទះ ធ្វើឲ្យកម្មករចលាចលបង្កភាពស្មុគស្មាញដល់អាជ្ញាធរ។
បើតាមប្រភពព័ត៌មានពីចៅសង្កាត់ចោមចៅទី១ ខណ្ឌពោធិ៍សែនជ័យ បានឲ្យដឹងថា នៅក្នុងផ្ទះជួលខាងលើនេះក្រោម ការគ្រប់គ្រងរបស់រដ្ឋបាលស្កាត់ចោមចៅ១ មានផ្ទះជួលប្រមាណជាង៨រយបន្ទប់ និងមានមនុស្សរស់នៅប្រមាណជាង១ម៉ឺននាក់ផងដែរ។ នៅវេលា៥ល្ងាច ក្រុមកម្មករកម្មការិនី បានមកតវ៉ារួចម្តងហើយ ដោយ លោកចៅសង្កាត់ បានមកសម្របសម្រួលថា នៅថ្ងៃទី២២មេសា និង កោះហៅ ម្ចាស់ផ្ទះខាងលើ ទៅសាលាខណ្ឌ ដើម្បីចរចាគ្នា និងរកដំណោះស្រាយឲ្យពួកគាត់ហើយ នៅវេលាម៉ោង៥ល្ងាច ពួកគាត់ នឹងផ្តល់ដំណឹង ប្រាប់កម្មករកម្មការិនី ឲ្យដឹងគ្រប់ៗគ្នាផងដែរ។
បន្ទាប់ពីមានការសម្របសម្រួលរួចមក ក្រុមកម្មករដែលបានបិទផ្លូវជាង១ម៉ោងមកនោះ បានរំសាយទៅវិញ រង់ចាំស្ដាប់លទ្ធផល នៃការដោះស្រាយ៕
Source: Kampuchea Thmey Daily
0 Comments