មនុស្សយ៉ាងតិច២៩០នាក់ត្រូវបានគេដឹងថាស្លាប់នៅក្នុងការបំផ្ទុះគ្រាប់បែកជាបន្តបន្ទាប់ដែលវាយប្រហារព្រះវិហារនិងសណ្ឋាគារប្រណីតនៅក្នុងប្រទេសស្រីលង្កា។ វាជាអំពើហិង្សាអាក្រក់បំផុតដែល វាយប្រហារកោះនេះចាប់តាំងពីសង្គ្រាមស៊ីវិលដ៏សាហាវរបស់ខ្លួនបានបញ្ចប់កាលពីមួយទសវត្សរ៍មុន។
ការផ្ទុះបណ្តាក់គ្នាចំនួនប្រាំបីបានកំណត់គោលដៅលើអ្នកគោរពបូជាពិធីបុណ្យ Easter និងសណ្ឋាគារដែលមានប្រជាប្រិយភាពជាមួយភ្ញៀវទេសចរអន្តរជាតិ។ចំនួនអ្នកស្លាប់ចុងក្រោយត្រូវបានផ្តល់ឲ្យកាលពីព្រឹកថ្ងៃចន្ទដោយអ្នកនាំពាក្យប៉ូលិសម្នាក់ដែលបាននិយាយថា មានមនុស្ស៥០០នាក់ទៀតបានរងរបួស។
ព័ត៌មាននេះបានកើតឡើងប៉ុន្មានម៉ោងបន្ទាប់ពីមានព័ត៌មានមួយទៀតថា គ្រាប់បែកច្នៃដែលត្រូវបានរកឃើញនៅអាកាសយានដ្ឋានសំខាន់ក្នុងទីក្រុង Colombo ត្រូវបានដោះ។បម្រាមគោចរទូទាំងប្រទេសដែលដាក់ក្នុងរយៈពេលខ្លីបន្ទាប់ពីការផ្ទុះគឺត្រូវបានដកចេញវិញកាលពីព្រឹកថ្ងៃចន្ទ។
ទោះបីជាយ៉ាងណាក៏ដោយ នៅតែមានវត្តមានសន្តិសុខយ៉ាងច្រើននៅព្រះវិហារ St Sebastien របស់ទីក្រុងនេះដែលជាកន្លែងកើតហេតុនៃការបំផ្ទុះដ៏សាហាវមួយ។សមាគមន៍គ្រិស្តសាសនិកដ៏តូចរបស់ប្រទេសស្រីលង្កាដែលមានត្រឹមតែ៦ភាគរយនៃប្រជាជនចំនួន២១លាននាក់នោះគឺត្រូវបានកំណត់គោលដៅដោយអំពើហិង្សាកាលពីអតីតកាលប៉ុន្តែមិនដែលមានឥទ្ធិពលអាក្រក់បែបនេះទេ។
មិនមានការអះអាងទទួលខុសត្រូវភ្លាមៗទេប៉ុន្តែប៉ូលិសបាននិយាយកាលពីថ្ងៃចន្ទថា មនុស្សចំនួន២៤នាក់ត្រូវបានចាប់ខ្លួន។ រដ្ឋាភិបាលបាននិយាយកាលពីដើមថា ក្រុមអ្នកស៊ើបអង្កេតនឹងពិនិត្យមើលថាតើអ្នកវាយប្រហារមានទំនាក់ទំនងនៅក្រៅប្រទេសដែរឬក៏អត់។យ៉ាងហោចណាស់មានការផ្ទុះចំនួនពីរបានកើតឡើងពាក់ព័ន្ធនឹងអ្នកបំផ្ទុះគ្រាប់បែកអត្តឃាតរួមទាំងម្នាក់ដែលបានតម្រង់ជួរនៅកន្លែងអាហារប៊ូហ្វេក្នុងសណ្ឋាគារផងដែរ។
រដ្ឋាភិបាលបាននិយាយថា អ្នកស្លាប់រួមមានជនជាតិឥណ្ឌា៣នាក់ អង់គ្លេស៣នាក់ ២នាក់មកពីប្រទេសទួរគីនិងម្នាក់ជាជនជាតិព័រទុយហ្គាល់។ មនុស្សពីរនាក់ដែលកាន់លិខិតឆ្លងដែនចក្រភពអង់គ្លេសនិងសហរដ្ឋអាមេរិកក៏ស្ថិតក្នុងចំណោមអ្នកស្លាប់ផងដែរ៕ AFP
Source: Kampuchea Thmey Daily
0 Comments