ប្រដាល់ ៖ អ្នកប្រដាល់ជើងខ្លាំងកម្ពុជា២រូប ដែលឡើងប្រកួតជាមួយអ្នកប្រដាល់ថៃ កាលពីយប់ថ្ងៃទី២១ ខែមេសា ឆ្នាំ២០១៩ នៅលើសង្វៀនបាយ័នស្ទឹងមានជ័យនោះ គឺ ពុទ្ធ ឆាយរិទ្ធី អ្នកប្រដាល់ក្លិបពុទ្ធសេរីវង្សកីឡា បានវាយចាញ់ដោយពិន្ទុ ឯ មាជ សុខរ៉ា អ្នកប្រដាល់ក្លិបថ្មគោលពោធិ៍សែនជ័យ បានផ្ដួលយកឈ្នះថៃ ក្នុងទឹកទី២។
ពុទ្ធ ឆាយរិទ្ធី គេវាយចាញ់អ្នកប្រដាល់ថៃឈ្មោះក្លាឃុនសឹក ផរ.ប៉ា យ៉ាស៊ូ(Klakhunserk Phor.Payasue ) ត្រឹមពិន្ទុប៉ុណ្ណោះ បន្ទាប់ពីវាយគ្នា៥ទឹកពេញនោះ។ ឆាយរិទ្ធី ប្រកួតជា មួយ ក្លាឃុនសឹក ក្នុងប្រភេទទម្ងន់៦៧គីឡូក្រាម។
គួរបញ្ជាក់ថា ពុទ្ធ ឆាយរិទ្ធី ប្រកួតជាមួយថៃមុនជួបក្លាឃុនសឹក នេះ គេបានវាយឈ្នះអ្នកប្រដាល់ថៃផេត ឆ័ត្រឆ័យ សរ.ប៊ុនយៀម ដោយពិន្ទុ ប៉ុន្តែលើកនេះ គេវាយចាញ់ក្លាឃុនសឹកដោយពិន្ទុវិញ។
ចំពោះ មាជ សុខរ៉ា គេបានផ្តួលអ្នកប្រដាល់ថៃ ផេត ឆ័ត្រឆ័យ សរ.ប៊ុនយៀម (Phetchchharchai Sor.Bunyeam) ក្នុងទឹកទី២ប៉ុណ្ណោះ។ ពួកគេទាំងពីរ ប្រកួតគ្នាក្នុងប្រភេទទម្ងន់៦៧គីឡូក្រាមដែរ។
ផេត ឆ័ត្រឆ័យ ក្នុងការប្រកួតទឹកទី២នោះ ត្រូវសុខរ៉ា ទាត់ត្រូវចំឆ្អឹងជំនីខាងស្តាំមួយជើងឆ្វេងពេញ ធ្វើឲ្យអ្នកប្រដាល់ថៃរូបនេះ ដួលសន្លប់លែងងើបតែម្តង។ ផេត ឆ័ត្រឆ័យ នេះ កាលពីមកប្រកួតលើកមុន វាយចាញ់ពុទ្ធ ឆាយរិទ្ធី ដោយពិន្ទុប៉ុណ្ណោះ តែមកលើកនេះត្រូវសន្លប់ក្រោមសន្ទុះជើងទាត់របស់ មាជ សុខរ៉ា។
ចំពោះការប្រកួតរវាងអ្នកប្រដាល់រួមជាតិវិញ ងួន គា អ្នកប្រដាល់ក្លិបតាឡីដំរីមានរិទ្ធ ដែលត្រូវបានគេផ្តល់ឪកាសឲ្យជួបសងសឹកជាមួយសយ សុខ អ្នកប្រដាល់ក្លិបវិបុលដារិទ្ធពោធិសែនជ័យនោះ គឺជួបសំណាងមិនល្អទៀត ដោយវាយចាញ់សយ សុខ ដោយពិន្ទុទៀត។
លី តឿន ឈ្នះពានរង្វាន់បាយ័ន ទម្ងន់៦០គីឡូក្រាម
អ្នកប្រដាល់៤រូប ដែលជួបប្រកួតគ្នាដណ្តើមពានរង្វាន់អនុស្សាវរីយ៍បាយ័ន សម្រាប់ប្រភេទទម្ងន់៦០គីឡូក្រាម ឆ្នាំ២០១៩ កាលពីល្ងាចថ្ងៃសៅរ៍ ទី២០ ខែមេសា នៅលើសង្វៀនបាយ័នស្ទឹងមានជ័យនោះ ទីបំផុតបានធ្លាក់ទៅលើលី តឿន អ្នកប្រដាល់ក្លិបមកុដរាជសីហ៍។
លី តឿន មុនឈ្នះពានរង្វាន់នេះ គេបានកាត់ការប្រកួតជម្រុះ ដោយវាយឈ្នះ អៀប ឆា អ្នកប្រដាល់ក្លិបតាឯកដំបងដែកមានរិទ្ធខេត្តព្រៃវែង ដោយពិន្ទុ ហើយបានឡើងមកជួបអេអាំម៉ារីន អ្នកប្រដាល់ក្លិបអេភូថងកីឡានៅក្នុងវគ្គផ្ដាច់ព្រ័ត្រ។
អេអាំ ម៉ារីន គេបានវាយឈ្នះធា វាសនា អ្នកប្រដាល់ក្លិបនាគរាជមានជ័យ ក្នុងជម្រុះតែអកុសលគេវាយចាញ់លី តឿន ក្នុងវគ្គផ្ដាច់ព្រ័ត្រទៅវិញ ដែលគួរឲ្យស៊យបំផុត។
គួរបញ្ជាក់ថា ការប្រកួតបែបម៉ារ៉ាតុងនេះ គឺប្រកួតចែកចេញជាពីរដំណាក់កាល ដែលដំណាក់កាលទី១ ជាការប្រកួតជម្រុះ ដើម្បីជម្រុះចោលពីរនាក់ដែលចាញ់ ហើយពីរនាក់ដែលឈ្នះនោះ ត្រូវឡើងទៅជួបគ្នាក្នុងដំណាក់កាលទី២ ដែលជាការប្រកួតផ្ដាច់ព្រ័ត្រដណ្តើមពានរង្វាន់ប្រាក់លានរបស់ស្ថានីយទូរទស្សន៍បាយ័ន។
ដោយឡែក សម្រាប់ការប្រកួតគូពិសេសវិញនោះ មាស សារ៉ាក់ អ្នកប្រដាល់ក្លិបអាណាចក្រគុនខ្មែរ បានផ្តួលយកឈ្នះ ឌុម កែវដប អ្នកប្រដាល់ក្លិបយុវវាលស្បូវខណ្ឌច្បារអំពៅក្នុងទឹកទី២ប៉ុណ្ណោះ។ គូនេះ គេទស្សន៍ទាយមុនតាំងមិនទាន់ប្រកួតម្ល៉េះ ថា ឌុម កែវដប ប្រហែលជាមិនអាចទប់ជាមួយកណ្ដាប់ដៃរបស់មាស សារ៉ាក់ បាននោះទេ៕
Source: Kampuchea Thmey Daily
0 Comments