ភ្នំពេញ ៖ មានហេតុការណ៍អគ្គិភ័យមួយ បានកើតឡើង ដោយសារផ្ទុះកំប៉ុងបាញ់ថ្នាំផ្ទះកាត់ដេរ និងស្តុកក្រណាត់មួយកន្លែង តែសំណាងល្អត្រូវបានប្រជាពរដ្ឋ នាំគ្នា ជួយពន្លត់ទាន់ ពុំបណ្តាលឲ្យរងការខូចខាតធ្ងន់ធ្ងរនោះទេ កាលពីវេលាម៉ោង២រសៀល ថ្ងៃទី២១ ខែមេសា ឆ្នាំ២០១៩ នៅភូមិ កោះអណ្តែត សង្កាត់ទួលសង្កែទី២ ខណ្ឌឫស្សីកែវ។
ផ្ទះ ដែលត្រូវភ្លើងឆេះនោះធ្វើពីឈើប្រក់ស័ង្កសី ជាផ្ទះកាត់ដេរ និងស្តុកក្រណាត់ ដែលមានម្ចាស់ឈ្មោះ ជិន សុវណ្ណារ៉ា ភេទប្រុស អាយុ៣៩ឆ្នាំ ជាជាងកាត់ដេរ។
តាមសាក្សីបានឲ្យដឹងថា នៅមុនពេលកើតហេតុ ស្រាប់តែឮស្នូរផ្ទុះនៅជាន់ទី១ បង្កឲ្យទៅជាអណ្ដាតភ្លើង ឆេះភ្លាមៗ ប្រជាពលរដ្ឋ ក្បែរ រួមនឹងម្ចាស់ផ្ទះ បាននាំគ្នាដងទឹកជួយពន្លត់ ដោយសារតែមានការសាមគ្គី និងជួយគ្នាពន្លត់ទាន់ ពុំបណ្តាលឲ្យខូចខាតធ្ងន់ធ្ងរនោះទេ។
បើទោះបីយ៉ាងណា នៅក្នុងហេតុការណ៍នោះ មានរថយន្តពន្លត់អគ្គិភ័យមួយគ្រឿងរបស់ស្នងការក្រុងបានទៅអន្តរាគមន៍បាញ់ពន្លត់ផងដែរ ចៀសវាងភ្លើងឆាបឆេះរាលដាលតទៅទៀត។ តាមម្ចាស់ បានឲ្យដឹងថា ការកើតមានអគ្គិភ័យនេះបណ្តាលមកពីផ្ទុះកំប៉ុងបាញ់ថ្នាំពណ៌ ដែលកូនចៅរបស់គាត់ទិញមកបាញ់ម៉ូតូ ហើយទុកជាន់លើក្បែរដំបូល អាចបណ្តាលឲ្យក្តៅផ្ទុះក្លាយជាអគ្គិភ័យតែម្តង៕
Source: Kampuchea Thmey Daily
0 Comments