រតនគិរី ៖ ទីបំផុតជនជាតិវៀតណាមទាំង១២នាក់ ត្រូវបានឃុំខ្លួនបណ្ដោះអាសន្នតាមដីការបស់តុលាការ នៅរសៀលថ្ងៃទី២១ ខែមេសា ឆ្នាំ២០១៩ហើយ ដោយឡែកចំពោះអ្នកដែល ដឹកនាំធានានិងអ្នកបើកច្រកឲ្យពួកគាត់និងគ្រឿងចក្រ ឆ្លងដែនចូលមកគគ្រឹកគគ្រេងដោយខុសច្បាប់កំពុងដេកស្រណុកសុខស្រួលនៅឡើយ ចម្លើយនេះមានតែលោកចៅក្រម នៃតុលាការទេដែលជាអ្នក..? ។
មន្ត្រីអ្នកច្បាប់បានខ្សឹបប្រាប់ថា មេខ្លោងដឹកនាំជនបរទេសច្រើននាក់មកដេកគុកស្រុកខ្មែរ ពេលនេះ បើតាមការស៊ើបអង្កេត អាចពាក់ព័ន្ធនឹងពលរដ្ឋខ្មែរ០២នាក់ ក្នុងនោះមាន លោក សេក វិរៈ តំណាងក្រុមហ៊ុន នុភាព សុភី និង លោក ហេង រតនៈ ស្នងការរងទទួលបន្ទុកកិច្ចការព្រំដែនគោកផងដែរ ព្រោះរឿងនេះ បើខ្មោចក្នុងមិនឲ្យដៃទេ ខ្មោចក្រៅក៏មិនហ៊ានដែរ។
ប្រភពដដែលនោះបានបន្តថា គោលបំណងសំខាន់ក្នុងសំណុំរឿងនេះ គឺនាំយកគ្រឿងចក្រ០៦គ្រឿង និងជនជាតិវៀតណាម១២នាក់ មកឈូសឆាយដីព្រៃ ឱទ្យានជាតិ វីរៈជ័យ ធ្វើដេប៉ូដាក់ឈើនៅតំបន់អូរតាយ៉ាក និងឈូសធ្វើផ្លូវសម្រាប់អូសយកឈើល្អៗនៅក្នុង ដែនឧទ្យានជាតិវីរៈជ័យ ឆ្លងដែនទៅលក់នៅប្រទេសវៀតណាម។
គួរបញ្ជាក់ផងដែរថា ក្រុមហ៊ុននុភាព សុភីនេះ វិនិយោគជាមួយរាជរដ្ឋាភិបាលមានរយៈពេលជាង១០ ឆ្នាំមកហើយ តែគេពុំដែលឃើញ ក្រុមហ៊ុនមួយនេះដាំដុះដំណាំកសិឧស្សាហកម្មជាដុំកំភួនសោះឡើយ?។ មានតែដំណាំ កៅស៊ូកំប៉ិកកំប៉ុកបានប្រហែលជាង១០ហិកតាប៉ុណ្ណោះ ក្រៅពីនោះ ទុកចោលឲ្យភ្លើងឆាបឆេះសន្ធោសន្ធៅ ជាអន្លើៗ ប៉ុន្តែអ្វីជាសំខាន់នោះ គឺការកាប់រំលំបំផ្លាញព្រៃឈើ ក្នុងឧទ្យានវីរៈជ័យ ដឹកជញ្ជូនយកទៅលក់នៅប្រទេសវៀតណាមតែប៉ុណ្ណោះ។
មន្ត្រីនគរបាលអន្តោប្រវេសន៍ម្នាក់សុំមិនបញ្ចេញឈ្មោះ បានខ្សឹបប្រាប់ថា ចម្លើយពីជនជាតិវៀតណាមបានបញ្ជាក់ថា មូលហេតុដែលគេនាំគ្រឿងចក្រចូលមកនេះ គឺដោយមានការធានាពី លោក សេក វិរ: ព្រោះពួកគាត់ ជាកម្មករស៊ីប្រាក់ខែក្នុងមួយខែបាន៧.០០០.០០០ដុង(ប្រាំពីលានដុង)តែប៉ុណ្ណោះ។ ដោយអ្នកធានាបានអះអាងប្រាប់ថា មកឈូសដីក្នុងក្រុមហ៊ុនដោយពួកគេមិនបានដឹងថាឈូសដីក្រៅប្រព័ន្ធច្បាប់អនុញ្ញាតនោះឡើយ។
ប្រភពដដែលបានបន្តថា តំណាងក្រុមហ៊ុន លោក សេក វិរៈ បានទទួលលុយកក់ពីរលើក ចំនួន៧.០០០ដុល្លារលើកទីមួយ ទទួលលុយកក់៥.០០០ដុល្លារ ថ្លៃនាំចូល (អាប៊ុលដេ៦០) លើកទីពីរ ទទួលលុយកក់២.០០០ដុល្លារ (ថ្លៃដឹកប្រេង)។
ពលរដ្ឋក្នុងខេត្តរតនគីរី សូមថ្លែងអំណរគុណដល់លោកឧត្ដមសេនីយ៍ត្រី ថាវ យ៉េន មេបញ្ជាការកងរាជអាវុធហត្ថខេត្ត ដឹកនាំកម្លាំងបង្ក្រាប ក្រោមបទបញ្ជា ដ៏ក្តៅកគុករបស់នាយឧត្ដមសេនីយ៍ សៅ សុខា អគ្គមេបញ្ជាការរង កងយោធពលខេមរភូមិន្ទ និងជាមេបញ្ជាការ កងរាជអាវុធហត្ថលើផ្ទៃប្រទេស ជាប្រធានគណៈកម្មការជាតិ បង្ក្រាបបទល្មើសធនធានធម្មជាតិ ដែលការាចុះបង្ក្រាបករណីនេះកាលពីល្ងាចថ្ងៃទី១៦ ខែមេសា ឆ្នាំ២០១៩ កន្លងមក និង ឈានដល់បង្កសំណុំរឿងបញ្ជូនខ្លួន ជនជាតិវៀតណាមទាំង១២នាក់ និងវត្ថុតាងទៅតុលាការទៀតផង។
ជុំវិញបញ្ហាខាងលើនេះ លោក សេក វិរៈ និងលោក ហេង រតនះ ភ្នាក់ងារកាសែតកម្ពុជាថ្មី មិនអាចសុំការបំភ្លឺបានទេ នៅល្ងាចថ្ងៃទី២០មេសានេះ ដោយប្រព័ន្ធទូរស័ព្ទចុចចូលជាច្រើនដង ប៉ុន្តែលោកក៏បានចុចផ្ដាច់ចោលទៅវិញ៕
Source: Kampuchea Thmey Daily
0 Comments